އަޔޯދިޔާގެ ރަންޖަންޕޫރް އަވަށުގެ މީހުން އެ ވިލެޖްގެ އިސް މީހާގެ މަގާމަށް މުސްލިމަކު ހޮވައިފިއެވެ. ހިންދީންގެ ބައިގިނަ މި އަވަށުގައި އެމީހުން ދައްކައިދޭން ބޭނުންވީ އެއްބައި ވަންތަ ކަމެވެ. މި އަވަށުގައި ދިރިއުޅޭ ހަމައެކަނި މުސްލިމް ޚާންދާނަކީ، ހާފިޒް އަޒީމުއްދީންގެ އާއިލާއެވެ. މި އަވަށުގެ އިމާމް މީހަކީވެސް އަޒީމުއްދީންއެވެ.
އަޒީމުއްދީނަކީ މި މަގާމަށް ވާދަކުރި ހަމައެކަނި މީހާއެއް ނޫނެވެ. އޭނާއާ ބައިގިނަ މީހުންގެ ތެރޭން ހަ މީހުން ވާދަ ކުރިއެވެ. އަވަށުގެ 600 ވޯޓުން 200 ވޯޓް އޭނާ ހޯދިއެވެ.
އަޔޯދިޔާއަކީ، ހިންދީންނާއި މުސްލިމުންގެ ބައިބައި ވުން ދައްކަން ބައެއް ފަރާތްތަކުން ރަމްޒަކަށް ބޭނުން ކުރާ ތަނެކެވެ.
އަޒީމުއްދީނަކީ ދަނޑުވެރިއެކެވެ. އަދި އޭނާއަކީ މަދަރްސާއަކުން ގްރޭޖުއޭޓްވެފައިވާ ގުރުއާން ހިތުދަސް ދަންނަބޭކަލެކެވެ. ދިހަ އަހަރުވަންދެން ކިޔަވައިދޭން އުޅުމަށްފަހު އޭނާ އައިސް އާއިލާގެ ދަނޑުވެރި މަސައްކަތާ ގުޅުނީއެވެ.
އަޔޯދިޔާ މިސްކިތުގެ ޓްރަސްޓް ބޯޑުންވެސް ވަނީ މި އިންތިޚާބުގައި އަވަށު މީހުން ދައްކައި ދިން އެއްބައިވަންތަކަމަށް މަރުހަބާ ކިޔާފައެވެ.
