ޤަތަރުގެ އެދުމަކަށް ބާއްވާފައިވާ އަރަބި ޚާރިޖީ ވަޒީރުން ވަނީ އިންޓަރނޭޝަނަލް ކްރިމިނަލް ކޯޓުން އިޒްރޭލުގެ އުދުވާންތައް ތަހްގީގު ކުރުމަށް އެދިފައެވެ. މިކަމުގައި އިޒޒްރޭލުގެ މުހިންމު އަރަބި ވިޔަފާރި ބައިވެރިޔާ ޔޫއޭއީގެ ވިސްނުން އަދި ކަށަވަރެއް ނުވެއެވެ.
މިހާރުވެސް އިޒްރޭލުން ދަނީ ފަލަސްތީނަށް ހަމަލަތައް ދެމުންނެވެ.
ދާދި ދެންމެއަކު، އެފްރިކަން ޔޫނިއަން އިންވެސް ވަނީ އެފްރިކާގެ ގައުމުތަކުގެ ނަމުގައި، އިޒްރޭލުގެ އުދުވާން ކުށްވެރިކޮށް ބަޔާނެއް ނެރެފައެވެ.
ޑްރޯން މެދުވެރިކޮށް އިޒްރޭލުން ފަލަސްތީނުގެ އަމާޒުތަކަށް ހަމަލަ ދީ އިމާރާތްތައް ބިމާ ހަމަ ކޮށްލުމާއެކު ޤައްސާމް ބްރިގޭޑުން ވަނީ އިޒްރޭލަށް ސަތޭކައަށް ވުރެން ގިނަ ރޮކެޓް ހަމަލަ އަމާޒުކޮށްފައެވެ.
ޔަހޫދީ ދައުލަތުގެ ހިމާޔަތުގައި އެމެރިކާ ގާއިމް ކޮށްދީފައިވާ ދިފާއީ ދަނގަނޑު ގުއްބު ފޫއަޅުވާލައި ޤައްސާމްގެ ރޮކެޓްތައް ވަނީ ޔަހޫދީ ވެރިރަށް ޓެލްއަވީވަށް ފޯރާފައެވެ.
ޔަހޫދީ އަކު މަރުވި ކަމަށާއި ބައެއް މީހުން ޒަޚަމް ވިކަމަށް ރިޕޯޓްތައް ބުނެއެވެ.
މީޑިއާއިން ހާމަ ކުރި ރިޕޯޓްތަކުން ބަހާއި ވިޔަފާރި ސަރަހައްދަކާއި ކާރުތަކެއްގައި އަލިފާން ރޯވެފައިވާ މަންޒަރު ފެނެއެވެ. އަސްގަލާނުން އީލާތަށް އޮންނަ ތެޔޮ ހޮޅިއާއި ތެޔޮ ރައްކާ ކޮށްފައިވާ ޓޭންކް ތަކެއްގައި ރޯވެފައިވާ މަންޒަރުތައްވެސް މީޑިއާއިން ދައްކައެވެ.
އިޒްރޭލުގެ ދިފާއީ ވަޒީރު ވަނީ ފަލަސްތީނުގެ އަމާޒުތަކަށ ްހަމަލަ ދެމުން ދާނެ ކަމަށް ބުނެފައެވެ.
އިޒޒްރޭލުން ޑްރޯން ހަމަލާތައް ދެމުން ދާއިރު އިޒްރޭލުގެ ސިފައިން ދަނީ ފަލަސްތީނުގެ ގެތަކަށް ވަދެ މީހުން ހައްޔަރުކުރަމުންނެވެ. ބައެއް ގެތަކަށް ގކަރުނަ ގެސް ޖަހަމުންދާ ކަމަށްވެސް ބުނެފައި ވެއެވެ.
މިރޭ ވެސް އިޒްރޭލު ސިފައިންގެ ހުރަސް އެޅުމަށް ބެލުމެއް ނެތި، ފަލަސްތީނު މީހުން ވަނީ މަސްޖިދުލްއަގްސާގައި ނަމާދުކޮށްފައެވެ.
ރާއްޖެއާ ގަޑީގެ ގޮތުން ފަލަސްތީނު އުޅެނީ ދެ ގަޑި އިރު ފަހަތުގައެވެ.
