އިނގިރޭސިވިލާތުގެ އަގު ބޮޑު ސްކޫލެއްގައި، އަންހެނުން ރޭޕް ކުރުމުގެ ސަގާފަތް އާންމު ކަމަށް ބުނެ، އަންހެން ކުދިން ފިރިހެން ކުދިންނާ އެކު އިށީންނަން ދެކޮޅު ހަދާކަމަށް އެސްކޫލުން ބުނެފިއެވެ. ޔޫކޭގެ ތަޢްލީމީ ދާއިރާގެ މިންގަނޑުތައް ކަނޑައަޅާ އޮފްސްޓެޑްއިން ދަނީ މިމައްސަލަ ބަލަމުންނެވެ.
ބަރކްޝަޔަރގެ ވެލިންގޓަން ކޮލެޖަކީ، އަހަރަކު 30 ހާސް ޕައުންޑްގެ ފީއެއް ދައްކައިގެން ކިޔަވައިދޭ ސްކޫލެކެވެ. މި ސްކޫލުގައި އަންހެން ކުދިން ބުނާ ގޮތުން ރޭޕް ކަލްޗަރއަށް ފިރިހެން ކުދިން ހައްސާސްވެފައި ނެތުމުން އެމީހުންނާއެކު އިށީދެގެން ތިބެން ހިތް ނޭދޭ ކަމުގައެވެ.
މިކަން ސްކޫލުގެ އިދާރާގެ ސަމާލުކަމަށް އައިސްގެން ކުދިންގެ ތަޖުރިބާތައް ހިއްސާ ކުރުމަށް ހުޅުވާލުމުން އަންހެން ކުދިން ވަނީ ފިރިހެން ކުދިން ކޮށްފައިވާ ކޮމެންޓްތަކާއި އެކުދިންގެ ގުނަވަންތަކާ ބެހޭ ގޮތުން ދައްކާފައިވާ ވާހަކަތަކާއި އެމީހުންގެ ޖަޒުބާތު ކިޔައި ދީފައެވެ.
ސިފައިންގެ އޮފިސަރުންގެ ފިރިހެން ދަރިންނަށް ކިޔަވައިދޭން ހުޅުވި މި ސްކޫލަކީ، 150 އަހަރު ވެފައިވާ ސްކޫލެކެވެ. އަންހެން ކުދިން މި ސްކޫލުގައި ބައިވެރި ކުރިތާ އަދި ވެފައި ވަނީ ވިއްސަކަށް އަހަރެވެ. މިއީ އިނގިރޭސިވިލާތުގެ އެންމެ ކުރީގައި އުޅޭ އެއް ސްކޫލެވެ.
ވެލިންގޓަން ކޮލެޖްގެ ފަސްބައިކުޅަ ދެބަޔަކީ އަންހެން ކުދިންނެވެ. ސްކޫލު މެނޭޖްމަންޓުން ބުނަނީ، ޖިންސުގެ ހަމަހަމަކަމަށް ހައްސާސް ކުރުމަށް އިތުރު މަސައްކަތްތަކެއް ކުރަން ޖެހިފައިވާ ކަމަށެވެ.
