އެމެރިކާގެ ރައީސް ޖޯ ބައިޑެން، އިޒްރޭލާއި ފަލަސްތީނުގެ ހަމަނުޖެހުމުގައި އަދި ގެންގުޅުއްވާ ސިޔާސަތަކީ ވާނުވާ ބައްލަވަން ހުންނެވުންކަމަށް ވޮޝިންޓަން ޕޯސްޓުން ބުނެފިއެވެ.
ކުރީގެ ރައީސް ބިލް ކްލިންޓަން ވަނީ އޭނާގެ ފުރަތަމަ ފަސް އަހަރުގެ ތެރޭގައި އިޒްރޭލް ފަލަސްތީން ސުލްހައިގެ ސަމިޓެއް ބާއްވަވާފައެވެ. އޮބާމާ ވަނީ މެދު އިރުމައްޗަށް ޚާއްސަ މަންދޫބެއް އައްޔަން ކުރައްވާފައެވެ. އެއްވެސް މީހަކަށް ނުކުރެވުނު ކަންކޮށް ސުލްހަ ގާއިމް ކޮށް ދައްކާލާނަމޭ ވިދާޅުވި ޓްރަމްޕްވެސް މަސައްކަތްތަކެއް ކުރެއްވިއެވެ. ޖޯޖް ޑަބްލިޔު ބުޝް ވެސް އޭނާގެ ރިއާސަތުގެ ފަހު ބައިގައި މެދު އިރުމައްޗަށް މަސައްކަތްތަކެއް ކުރެއްވިއެވެ. އެހެނަސް މި ހުރިހައި ބޭފުޅުން ވެސް ވަނީ ފެއިލްވެ ވަޑައިގެންފައެވެ.
ބައިޑެން ވަނީ އޭނާގެ ސަމާލުކަން، މެދު އިރުމަތިން ޗައިނާއަށް ގެންދަވާފައެވެ. ސަރުކާރެއް އެކުލަވާ ނުލެވި، ސިޔާސީ ކޯޅުންތަކެއްގައި އުޅޭ، އިޒްރޭލާއެކުވެސް ސީރިއަސް ވާހަކަތަކެއް ދައްކަވާކަށް ބައިޑެން ބޭނުންފުޅެއް ނުވެއެވެ.
ބައިޑެންގެ ވެރިކަމުގައި ޚާރިޖީ ސިޔާސަތަށް ޚާއްސަ ސަމާލުކަމެއް ދެއްވުމަކީ އޭނާގެ މުހިންމު ލަނޑު ދަނޑިއެކެވެ. އަދި އޭނާގެ ޚާރިޖީ ދާއިރާގެ ތަޖުރިބާއިން އޭނާއަކީ މެދުއިރުމައްޗާއި މުސްލިމުންގެ އިހުސާސް އެންމެ ރަނގަޅަށް ދަނެވަޑައިގަންނަވާނެ ރައީސް ކަމަށް ބެލެވެއެވެ.
ތަޖުރިބާކާރުން ވިދާޅުވާ ގޮތުގައި އަދި، ބައިޑެން ހުންނެވީ ވާނުވާ ބެއްލެވުމުގައެވެ.
