އީރާނުގެ ކުރީ ގެ ރައީސް އަހްމަދީ ނީޖާދު އެގައުމުގެ ރައީސްކަމަށް ކުރިމަތި ލައްވައިފިއެވެ. އަހްމަދީ ނީޖާދު ވަނީ ރިއާސީ ކެންޑިޑޭޓެއްގެ ގޮތުގައި ރަޖިސްޓްރީ ވެވަޑައިގެން ނިކުންނެވުމަށްފަހު ހޯމް މިނިސްޓްރީގެ ބޭރުގައި ތިބި އޭނާގެ ސަޕޯޓަރުންނާ ވާހަކަ ދައްކަވާފައެވެ.
އީރާންގެ ރިއާސީ އިންތިޚާބަށް ނިކުންނަވާނެ ކަމަށް ބެލެވުނު މިހާރުގެ ޚާރިޖީ ވަޒީރު މުޙައްމަދު ޖަވާދު ޒަރީފް މިއަދު ވިދާޅުވީ އޭނާ އިންތިޚާބްގައި ބައިވެރިވުމަކީ ގަމުގެ މަސްލަހަތަށް ފައިދާ ހުރި ކަމެއް ނޫން ކަމަށެވެ.
އަޙްމަދީ ނީޖާދު ވަނީ އޭނާގެ ރިއާސީ ދައުރު ނިމުމަށްފަހު އާންމު ރައްޔިތެކޭ އެއްފަދައިން ދިރިއުޅުއްވާފައެވެ. އޭނާ އަކީ ކުރިންވެސް މުދައްރިސެކެވެ. އަދި މިހާރުވެސް ޔުނިވަރސިޓީތަކުގައި ކިޔަވައި ދެއްވައިގެން އޭނާއަށް މަހަކަށް 300 ޑޮލަރު ލިބޭ ކަމަށް ވެއެވެ. އަދި ހުސްވަގުތުގައި އޭނާ ހޭދަކުރައްވަނީ ބަކަރި ހުއިހެއްޕެވުމުގައެވެ. އޭނާގެ އަނބިކަނބަލުންނަކީ ކުރިންވެސް ސްކޫލެއްގެ މަސައްކަތު މީހެކެވެ. މިހާރުވެސް އޭނާ އުޅެނީ އެމަސައްކަތުގައެވެ.
އަހްމަދީ ނީޖާދަކީ ސާދާ ދިރިއުޅުމެއް އުޅުއްވި ބޭފުޅެކެވެ. ވެރިކަމުގައިވެސް އޭނާ ބޭރު ދަތުރުފުޅުތަކުގައި ބިންމަތީގައި ރަޖާ ފަތުރުއްވައިގެން ނިންދެވި ކަމަށް އެއިރު ރިޕޯޓް ކޮށްފައި ވެއެވެ.
ނީޖާދްގެ އިތުރުން ސިފައިންގެ ތާއީދު ލިބިފައިވާ ކެންޑިޑޭޓަކާއި ޝަރުއީ ދާއިރާގެ ތާއިދު ލިބިފައިވާ ކެންޑިޓެއްވެސް އެހެން އިތުރު ކެންޑިޑޭޓުންނާއެކު އީރާންގެ ރިއާސީ އިންތިޚާބަށް ކުރިމަތި ލައްވާފައި ވެއެވެ.
