އަފްޣާނިސްތާނުން އެމެރިކާ ސިފައިން ފައިބައިގެން ދިއުމުން ބިދޭސި ސިފައިންގެ މަރުކަޒެއް ޕާކިސްތާންގައި ހެދުމަށް ޕާކިސްތާނުން ފުރުސަތެއް ނުދޭނެ ކަމަށް އެގައުމުން ބުނެފިއެވެ. މިކަން ކަށަވަރު ކޮށްދެއްވާފައި ވަނީ ނޫސްވެރިންނާ ވާހަކަ ދައްކަވަމުން ޕާކިސްތާންގެ ޚާރިޖީ ވަޒީރު ޝާހް މަހްމޫދު ޤުރެއިޝީއެވެ.
އަފްޣާނިސްތާންގެ ސުލްޙައަށް ޕާކިސްތާނުން ފުރިހަމައަށް ތާއީދުކުރާ ކަމަށް އޭނާ ވިދާޅުވިއެވެ. އަދި އަފްޣާން ހަމަނުޖެހުމުގައި ވަކި އެއްވެސް ފަރާތަކަށް ޕާކިސްތާނުން ތާއީދުކޮށް މަދަދު ދީ ނަހަދާނެ ކަމަށެވެ. ޕާކިސްތާން އަބަދުވެސް އޮންނާނީ އަފްޣާނިސްތާންގެ ސުލްއަށް ފަހިކޮށްދޭ ފަރާތެއްގެ ގޮތުގައި ކަމަށް އޭނާ ވިދާޅުވިއެވެ.
ނޫސްވެރިން، ޤުރެއިޝީއަށް މި ސުއާލު ދެންނެވީ އެމެރިކާއިން އަފްޣާނިސްތާނުން ފައިބައިގެން ދިއުމަށް ފަހު މެދުތެރޭ އޭޝިއާގައި ސިފައިން ބޭތިއްބުމަށް ބޭނުން ވެގެން އެތައް ގައުމަކާ އެކަމާ ބެހޭ ގޮތުން ވާހަކަ ދައްކާ ކަމުގެ ރިޕޯޓްތަކާ ގުޅިގެންނެވެ.
އަފްޣާނިސްތާނުން އެމެރިކާ ސިފައިން ފައިބައި ނިމޭނީ މިއަހަރުގެ ސެޕްޓެމްބަރު 11 އަށެވެ.
އަފްޣާނިސްތާނުގެ ހަމަނުޖެހުމުގައި އުޅެނީ ސަރުކާރާއި ތާލިބާން އެވެ. ތާލިބާންވެސް ވަނީ ދެ ބަޔަކަށް ބެހިފައެވެ. ޕާކިސްތާނުން ތާއީދު ކުރާ ފެކްޝަނަކީ، ހަރުކަށި ހަނގުރާމަވެރި ބައެކެވެ.
