ތާލިބާނުން އަފްޣާނިސްތާންގެ ވެރިރަށް ކާބުލް ކައިރީގައި އޮންނަ ސަރަހައްދެއް އެމީހުންގެ ކޮންޓްރޯލްގެ ދަށަށް ގެނަސްފިކަމަށް ޚަބަރުތައް ބުނެއެވެ. އަފްޣާނިސްތާން ހޯމް މިނިސްޓްރީން ބުނާ ގޮތުން އެމީހުން ވަނީ ވަގުތީ ގޮތުން ސިފައިންނާއި ފުލުހުން މި ސަރަހައްދުން ފަހަތަށް ޖައްސާލާފައެވެ. ސިފައިން ފަހަތަށް ޖެހިފައި ވަނީ ތާލިބާނަށް ބޮޑެތި ގެއްލުންތައް ދިނުމަށްފަހު ކަމަށްވެސް ދާޚިލީ ވުޒާރާއިން ބުނެއެވެ.
ތާލިބާނުން ރަސްމީ ކޮށް ބުނެފައި ވަނީ މައިދާން ވަރްދަކްގެ ނިރްކް ޑިސްޓްރިކްޓް އެމީހުންގެ ބާރުގެ ދަށަށް އައިސްފައިވާ ކަމަށެވެ. އަދި ފުލުހުންގެ އިދާރާއި ސިފައިންގެ މަރުކަޒާއި ޖާސުސީ އިދާރާވެސް މިހާރު އޮތޯ ތާލިބާންގެ އަތްދަށުގައި ކަމަށް އިޢްލާން ކޮށްފައި ވެއެވެ.
ތާލިބާންގެ ތަރުޖަމާން ބުނެފައި ވަނީ، ސަލާމަތީ ބާރުތަކުގެ ހަތިޔާރާއި އެމީހުންގެ ތެރޭން ގިނަ އަދަދެއްގެ މީހުން އަސީރުކޮށްފައިވާ ކަމަށެވެ. މި ޑިސްޓްރުކްޓްގެ ސަރުކާރުގެ މައި އޮފީހުގައި ހުޅުޖަހާފައިވާ ކަމަށްވެސް ތާލިބާނުން ބުންޏެވެ.
އަފްޣާނިސްތާން ސަރުކާރުން ބުނާ ގޮތުގައި ރޯދަ މަސްތެރޭގައި ތާލިބާނުން ވަނީ ޖާނު ގޮއްވާލުމުގެ 15 ހަމަލަ ދީފައެވެ. އަދި ރޯދަ މަހު ދީފައިވާ ހަމަލަތަކުގައި 255 މީހުން މަރުވެ، 500 މީހަކަށް ހާނީއްކަ ވެފައިވާ ކަމަށް ބުނެފައި ވެއެވެ.
