ޗައިނާގެ ސައިނޯފާމްގެ ވެކްސިންގެ ބާރުކުޑަވެގެން، ތިން ވަނަ ޑޯޒެއް ޖެހުމަށް ޔުނައިޓެޑް އެރަބް އެމިރޭޓްސްއާއި ބަހުރައިން އިއްޔެ ނިންމައިފިއެވެ. ޔޫއޭއީއަކީ، ދެވަނަ ޑޯޒް ޖެހިތާ ހަ މަސްފަހުން ތިން ވަނަ ޑޯޒް ޖެހުމަށް ހުޅުވާލާ ފުރަތަމަ ގައުމުތަކަކީ، ޔޫއޭއީއާއި ބަހްރައިންއެވެ. ޗައިނާގެ ޑިޒީޒް ކޮންޓްރޯލްއާ ބެހޭ އިސް މަސްއޫލުވެރިއާ މިދިޔަ މަހު ވަނީ ޗައިނާގެ ވެކްސިންގެ ރައްކާތެރިކަން ދަށްކަމަށް އެއްބަސްވެ ވަޑައިގެންފައެވެ.
ޔޫއޭއީގެ ވެކްސިނޭޝަން ޕްރޮގްރާމުގެ އެންމެ މައިގަނޑު ވެކްސިންއަކީ ސައިނޯފާމް ވެކްސިންއެވެ. ސައިނޯފާމް އިން މިހާތަނަށް މި ވެކްސިންއާ ބެހޭ ގޮތުން ދީފައިވަނީ ވަރަށް މަދު ޑޭޓާއެކެވެ. ސައިނޯފާމްގެ ޓްރާންޕެރެންސީ ކުޑަކަމުން ގިނަ ފާޑުކިޔުންތައް އަމާޒުކޮށްފައި ވެއެވެ. ޗައިނާގައިވެސް އާންމު ކޮށް މީހުންނަށް ދެމުން ގެންދަނީ މި ވެކްސިންއެވެ. އަދި މިއީ ޗައިނާގެ ވެކްސިން ޑިޕްލޮމެސީގެ އަސާސީ ބައެކެވެ.
ޑަބްލިއުއެޗްއޯ އިން ސައިނޯފާމްއަށް އިމަޖެންސީގައި ބޭނުން ކުރަން ހުއްދަ ދިނީ މަހުގެ ކުރީ ކޮޅުގައެވެ.
ސައިނޯފާރމް ބޭނުން ކުރާ ގައުމުތަކުގެ ތެރޭގައި ހަންގެރީއާއި ޕާކިސްތާނާއި ސަރބިއާއާއި ސީޝެލްސްއަދި ސްރީލަންކާ ހިމެނެއެވެ.
ސައިނޯފާމް އަމިއްލައަށް އުފައްދަން ފެށި ފުރަތަމަ ގައުމަކީވެސް ޔޫއޭއީއެވެ. ޔޫއޭއީން ވަނީ މީގެކުރިން މި ވެކްސިންއަކީ 86 ޕަސެންޓް ކާމިޔާބު ވެކްސިންއެއް ކަމަށް ބުނެފައެވެ. ނަމަވެސް އެ ނަތީޖާއަށް ވާސިލުވި ގޮތުގެ އިތުރު ތަފްސީލެއް ހާމަކޮށްފައެއް ނުވެއެވެ.
ޔޫއޭއީގައި ސައިނޯފާމް ވެކްސިން އެންމެނަށް ދޭން ފެށި ފުރަތަމަ ސިޓީއަކީ އަބޫދާބީއެވެ. ދުބާއީން ދޭން ފެށީ، ފައިޒަރއާއި އެސްޓްރާޒެނެކާއެވެ. ފަހުން އަބޫދާބީން ވަނީ ފައިޒަރވެސް ދޭން ފަށާފައެވެ.
