މަސްތުވާ ތަކެތި ވިއްކާ މީހުންގެ ސުވަރުގެއަކަށް ޕާކިސްތާން ވެފައިވާ ކަމަށް ޕާކިސްތާން ސުޕްރީމް ކޯޓުން ބުނެފިއެވެ. މަސްތުވާ ތަކެތީގެ ވިޔަފާރީގައި ޙުކުމް ކޮށްފައިވާ މީހެއްގެ ޖަލު ޙުކުމާ މެދު އިސްތިއުފާނަށް ހުށަހެޅިފައިވާ މައްސަލަ ބައްލަވަމުން، ސުޕްރީމް ކޯޓުގެ ޖަސްޓިސް ގާޒީ އަހުމަދު ޙުސެއިން ވިދާޅުވީ، މަސްތުވާ ތަކެތި ވިއްކާމީހުންގެ ސުވަރުގެއަކަށް ޕާކިސްތާން ވެފައިވާ ކަމަށެވެ.
ޖަސްޓިސް އިޢްޖާޒުލްހަސަން އިސްވެ އިންނަވާ ތިން ފަނޑިޔާރުންގެ ބެންޗުން ބަލަމުން ދަނީ ފަސް ކިލޯ ޗަރަސް ސްމަގްލް ކުރުމުގެ ތުހުމަތުގައި ހައިކޯޓުން ދަމަހައްޓާފައިވާ ދަށުކޯޓު ޙުކުމް ކޮށްފައިވާ މައްސަލާގައެވެ.
މުއްތަހަމްގެ ފަރާތުން ވާހަކަ ދައްކަމުން އޭނާގެ ވަކީލު ބުނެފައި ވަނީ ހިފަހައްޓާފައިވާ މަސްތުވާ ތަކެތި ތަހުލީލު ކޮށްފައި ވަނީ ކަނޑައަޅާފައިވާ އެސްއޯޕީއާ އެއް ގޮތަކަށް ނޫން ކަމަށެވެ. އަދި ހެކިބަސް ދީފައިވަނީ ސަރުކާރު މުވައްޒަފުން ކަމަށާއި އެނޫން ބަޔަކު ދައުލަތަށ ްހެކިންގެ ގޮތުގައި ހުށަ ނޭޅުނު ކަމަށެވެ.
ޖަސްޓިސް ގާޒީ މުޙައްމަދު އަމީން ވިދާޅުވީ ގައުމުގައި މަސްތުވާ ތަކެތީގެ ވިޔަފާރި ކުރާ މީހުން ކޮންމެވެސް ޓެކްނިކަލް މައްސަލައަކާ ގުޅިގެން ދޫވެގެންދާއިރު ވެސް ގައުމުގެ ޝަރީފް ރައްޔިތުން ހެކިބަސްދޭން ނައަންނަ ކަމަށެވެ. އެހެން ގައުމުތަކުގައި މަސްތުވާ ތަކެތީގެ ވިޔަފާރި ކުރާ މީހުން ދަންޖައްސާއިރު ޕާކިސްތާން ވެގެން ދަނީ މަސްތުވާ ތަކެތީގެ ވިޔަފާރި ވެރިންނަށް ސުވަރުގެއަކަށް ކަމަށެވެ.
މިވާހަކަތަކަށް ފަހު ސުޕްރީމް ކޯޓުން ވަނީ މައްސަލަ ބޭރުކޮށްލައި، އޭނާގެ ހުކުމް ދަމަހައްޓާފައެވެ.
