އިންޑިއާގެ އުއްތްރަ ޕްރަދޭޝްގައި މިސްކިތެއް ތަޅާލައި ބިމާ އެއްވަރުކޮށްލައިފިއެވެ. އުއްތަރަ ޕްރަދޭޝްގެ ސުންނީ މުސްލިމް ވަގްފް ބޯޑާއި އޯލް އިންޑިއާ މުސްލިމް ޕާސަނަލް ލޯ ބޯޑުން ވަނީ މި އަމަލު ކުށްވެރިކޮށްފައެވެ.
އުއްތްރަ ޕްރަދޭޝްގެ ބާރަބަންކީގެ އިދާރާއިން އެތައް ސަތޭކަ އަހަރު ވެފައިވާ މިސްކިތް އިމާރާތް ކޮށްފައި ވަނީ ގާނޫނާ ޚިލާފެއް ކަމަށް ބުނެ އެތަނާ ބެހޭ ލިޔެކިޔުންތައް ހުށަހެޅުމަށް މިސްކިތުގެ އިދާރާއަށް އެންގިއެވެ. މިސްކިތުންގެ ވަގްފް ބަލަހައްޓާ ފަރާތުން ވަނީ މިމައްސަލަ ކޯޓަށް ހުށަހަޅާފައެވެ.
ބާރާބަންކީ އަކީ އަޔޯދިޔާއާ 62 މޭލު ދުރުގައި އޮންނަ ޓައުނެކެވެ.
މިފަރާތްތަކުން އެދިފައި ވަނީ ކޯޓެއްގެ ގާޒީއަކު އިސްވެ ހުންނަވައިގެން މި މައްސަލަ ބަލައި ދިނުމަށެވެ. ފުލުހުން ވަނީ މިސްކިތް ތަޅާލައި މިސްކިތުގެ ގާތައް ހިސާބުގެ ކޯރަކަށް އަޅާލާފައެވެ.
ވަގްފް ބޯޑާއި މުސްލިމް ޕާސަނަލް ލޯބޯޑުން ބުނާ ގޮތުގައި މި އަމަލަކީ އުއްތްރަ ޕްރަދޭޝްގެ ސަރުކާރުން ހިންގާފައިވާ ގާނޫނާ ޚިލާފް ފިޔަވަޅެކެވެ. މި ދެ އިދާރާއިން ވަނީ މިމައްސަލަ އައްލާހްއާބާދު ހައިކޯޓަށް ހުށަހަޅާފައެވެ. އަދި އެދިފައި ވަނީ އުއްތްރަޕަރަދޭޝް ސަރުކާރުން މި މިސްކިތް އަލުން އިމާރާތް ކޮށް ދިނުމަށެވެ.
އުއްތްރަ ޕްރަދޭޝް ގައި މިސްކިތްތައް ތަޅާލުމުގެ އަމަލުތަކަކީ އާދައިގެ ކަމެކެވެ. މިފަދަ އެހެން މައްސަލަތައް ވެސް މި ސްޓޭޓްގައި ހިނގަމުން ދެއެވެ. މި ސްޓޭޓްގެ ޗީފް މިނިސްޓަރއަކީ މުސްލިމުންނާ ދޭތެރޭ ތަފާތު ވިސްނުމުގެ މީހެކެވެ.
