ސްރީލަންކާގެ އީސްޓަރ ބޮމުގެ ހަމަލާގައި ފައްޅި ގޮއްވާލި މީހުންނަށް ފައިސާ ހޭދަކޮށްފައިވާ ހަތަރު ދިވެހިންނާ ބެހޭ މަޢްލޫމާތު ހޯދައި ގަނެވިއްޖެކަމަށް ލަންކާގެ ޕަބްލިކް ސެކިއުރިޓީ މިނިސްޓަރ ސަރަތު ވީރަސޭކަރަ ވިދާޅުވެއްޖެއެވެ.
މީޑިއާއާ ވާހަކަ ދައްކަވަމުން ދިވެހިންނާ ބެހޭ އިތުރު ތަފްސީލެއް އޭނާ ހާމައެއް ނުކުރައްވައެވެ. ނަމަވެސް މިހާތަނަށް ތަހްގީގަށް ހޯދިފައިވާ އިތުރު މަޢްލޫމާތު ހާމަ ކުރައްވަމުން އޭނާ ވިދާޅުވީ އީސްޓަރ ބޮމުގެ ހަމަލާގެ މޭސްތިރިއަކީ ނައުފަރު މައުލަވީ ކަމަށެވެ. ކުރިން ހާމަކޮށްފައިވާ މަޢްލޫމާތުގައި ބުނެފައި ވަނީ މި ޖަރީމާގެ މޭސްތިރިއަކީ ޖާނު ގޮއްލައިގެން މަރުވި ޒަހްރާން ހާޝިމީ ކަމަށެވެ.
އެމެރިކާ ގެ ޖާސޫސުން ގެ އެހީތެރިކަމާއެކު ސްރީލަންކާއިން ހިންގި ތަހްގީގުން އެނގުނީ 2016 އިން ފެށިގެން އައިސިސް އަލްގައިދާ ގެ ފިކުރު ސްރީލަންކާ ގައި އިންދުމަށް ނައުފަރު މައުލަވީ މަސައްކަތް ކޮށްފައިވާ ކަމަށެވެ. އަދި މީހުންގެ ސިކުނޑި ދޮވެލުމަށް ކިޔަވައިދިން ހަރުކަށި ފިކުރުގެ މަންހަޖުވެސް ތައްޔާރުކޮށްދީ ފައިވަނީ ނައުފަރު މައުލަވީ ކަމަށެވެ.
މައުލަވީ ވަނީ ނޫރެލިއާއާއި ބަޓިކައްލޯގައި ހަރުކަށި ފިކުރު ފެތުރުމަށް މަސައްކަތް ކޮށްފައި ކަމަށް ވީރަސޭކަރަ ވިދާޅުވިއެވެ.
އޭނާ ވިދާޅުވީ، މިކަމުގެ ހެކިތަކަށް ބާރު ލިބެނީ ޒަހްރާން ހާޝިމީގެ އަންހެނުންގެ ބަޔާނާއި މައުލަވީގެ ގެއިން ހޯދާފައިވާ ލިޔުންތަކާއި އޭނާގެ ލެޕްޓޮޕުން ލިބެން ހުރި މަޢްލޫމާތުންނެވެ. ހާޝިމީގެ އަންހެނުންނަކީ މައުލަވީގެ ފަހަރިއެކެވެ.
އޭނާ ވިދާޅުވިގޮތުގައި މި ކަމުގައި ފައިސާ ހޭދަކޮށްފައިވާ ހަތަރު ދިވެހިން ފައިސާ ހޭދަކޮށްފައިވަނީ ލަންކާގެ ޖަމާއަތޭ އިސްލާމީ ޖަމްއިއްޔާގެ ރައީސް ސާދިގް އަބްދުﷲ މެދުވެރިކޮށެވެ.
މިކަމުގައި ފުލުހުންގެ އަތުނުޖެހި ގައުމުން ބޭރުގައި ހުރި ލަންކާ މީހެއްގެ ވާހަކަ ކިޔައިދެއްވަމުން އޭނާ ވިދާޅުވީ ލުގުމާން ތާލިބް އަތު ނުޖެހުނަސް ހަރުކަށި ފިކުރާ ގުޅިގެން އޭނާގެ ދަރިއަކު އޮސްޓްރޭލިއާގައި ހައްޔަރުކޮށްފައިވާ ކަމަށެވެ. ތާލިބްގެ ތިބެނީ ދެކުދިންނެވެ. އޭނާއާ ބެހޭ އިތުރު ތަފްސީލެއް ވީރަސޭކަރަ ނުދެއްވައެވެ.
