ޕާކިސްތާންގެ ހޯމް މިނިސްޓްރީގެ ޕާމަނަންޓް ސެކްރެޓަރީ ހައްޔަރު ކޮށްގެން އިސްލާމްއާބާދު ހައިކޯޓަށް ގެނައުމަށް އެކޯޓުން އަމުރު ނެރެފިއެވެ. ޕާކިސްތާންގައި ގެއްލިފައިވާ މީހުންގެ މައްސަލަތައް ގިނަވެގެން ހުށަހަޅާފައިވާ ޝަކުވާތަކާ ގުޅިގެން އިސްލާމްއާބާދު ހައިކޯޓުން ހޯމް މިނިސްޓްރީއަށް އަންގާފައި ވަނީ ޚައިބަރު ޕަޚްތޫންޚުވާ ޕްރޮވިންސްގައި ހުރި މީހުން ބަންދުކުރާ ތަންތާނގެ ލިސްޓަކާއި އެތަންތާގައި ބައިތިއްބާފައިވާ މީހުންގެ ލިސްޓާއި އަދި ގެއްލިފައިވާ މީހަކު އެއިން ލިސްޓެއްގައި ހިމެނޭނަމަ، އެމީހަކާ ދިމާއަށް ފާހަގަ ޖަހައިގެން އެލިސްޓް ހައިކޯޓަށް ހުށަހެޅުމަށެވެ.
ކޯޓުގެ މިއަމުރު ޕާމަނަންޓް ސެކެޓްރީ ތަންފީޒުކޮށްފައި ނުވުމުން، މިމަހުގެ 27 ގެ ކުރިން އޭނާ ހައްޔަރުކޮށްގެން ގެނައުމަށް ކޯޓުން ފުލަހަށް އަމުރު ކުރީއެވެ. އަދި އޭނާގެ ބަންދަކީ ބެއިލްއަށް ދޫނުކުރެވޭނެ ބަންދެއް ކަމަށްވެސް ކޯޓުން ބުންޏެވެ.
ހައިކޯޓުން ވަނީ ގެއްލިފައިވާ މީހުންގެ މައްސަލަތައް ބެލުމަށް ބުދަ ދުވަހު ޝަރީއަތުގެ މަޖިލީހެއް ބާއްވަން ތާވާލު ކުރައްވައިފައެވެ. މިމަޖިލިސް ކެންސަލް ކުރަން ޖެހުނީ ޕާމަނަންޓް ސެކްރެޓަރީ ހާޒިރުވެ ނެތުމުންނެވެ.
ކޯޓުން ބުނެފައި ވަނީ މީގެ ކުރިން ނެރެފައިވާ އެތައް އަމުރަކާވެސް މި ފަރާތް ޚިލާފްވެފައިވާ ކަމަށެވެ.
