އިންޑިއާއަށް 500 މިލިއަން ޑޮލަރުގެ ކޮވިޑް19ގެ ހިލޭ އެހީ ދީފި ކަމަށް ވައިޓްހައުސްއިން ބުނެފިއެވެ. ނޫސްވެރިންނާ ވާހަކަ ދައްކަމުން ތަރުޖަމާން ވިދާޅުވީ، މި އެހީއަކީ، އެމެރިކާގެ ސަރުކާރާއި ސްޓޭޓް ސަރުކާރުތަކާއި އެމެރިކާގެ ކުންފުނިތަކާއި ޖަމުއިއްޔާ ޖަމާއަތްތަކާއި އަމިއްލަ ފަރުދުންގެ ފަރާތުން ދީފައިވާ ސާމާނުތަކުގެ ޖުމުލަ އަގު ކަމަށެވެ.
ޖޯ ބައިޑެންގެ ސަރުކާރުން ބުނެފައި ވަނީ ދެކުނު އޭޝިއާގެ އެހެން ގައުމުތަކަށް ވެސް އެހީތެރިކަން ފޯރުވައި ދިނުމަށް އެމެރިކާއިން މަސައްކަތް ކުރަމުންދާ ކަމަށެވެ. އެގޮތުން އޮކްސިޖަންއާއި މާސްކާއި ރެޕިޑް ޓެސްޓް ކިޓްތައް ލައިގެން ހަތް މަތިންދާ ބޯޓް ފޮނުވާފައި ވާނެ ކަމަށް ބުނެފައި ވެއެވެ.
އެމެރިކާއިން މަސައްކަތް ކުރަމުންދަނީ 80 މިލިއަން ޑޯޒްގެ ވެކްސިން ގައުމުތަކަށް ފޮނުވުމަށެވެ.
