ޖައްވަށް ސެޓެލައިޓް ފޮނުވުމަށާއި ސެޓެލައިޓް އުފެއްދުމަށް މަސައްކަތް ކުރާ އިންޑިއާގެ އަމިއްލަ ކުންފުނީގައި އިންޑިއާގެ ސާދާގަރު، ކާރު އުފައްދާ މަހިންދްރާ ކުންފުނީގެ އާނަންދު ބައިވެރިވެއްޖެއެވެ.
ޗެންނާއި އިން އޮޕަރޭޓް ކުރާ އިންޑިއާގެ އަމިއްލަ ޖައްވީ ކުންފުނި އަގްނީކުލް އިން ދަނީ އިންވެސްޓަރުން ހޯދަމުންނެވެ. މިހާތަނަށް މި ކުންފުނިން ވަނީ 11 މިލިއަން ޑޮލަރު ހޯދާފައެވެ.
އަގްނީކުލް އިން ބޭނުން ވަނީ އެއްހާސް ކިލޯގެ ބަރުދަން އުފުލޭ ވަރުގެ ރޮކެޓް އުފައްދައި، ކުދި ސެޓެލައިޓްތައް އުފައްދައި ޖައްވަށް ފޮނުވުމުގެ ވިޔަފާރީގައި ހަރަކާތްތެރި ވުމަށެވެ.
މިކުންފުނިން އަދި ބޭނުންކުރަނީ އިސްރޯގެ ތަޖުރިބާއާއި އިސްރޯގެ ފެސިލިޓީތަކެވެ. އިންޑިއާ ސަރުކާރުން ވަނީ ޖައްވީ މަސައްކަތުގައި އުޅެން ބޭނުންވާ އަމިއްލަ ކުންފުނިތަކަށް އެހީތެރިވުމަށް ނިންމާފައެވެ.
އަގްނީކުލްއިން ވަނީ މިދިޔަ އަހަރު އޮކްޓޯބަރުގައި އަގްނީލެޓްގެ ނަމުގައި ރޮކެޓެއް ޓެސްޓް ކޮށްފައެވެ. މިރޮކެޓް ފޮނުވައި ދިނީ އެލަސްކާ އޭރޯ ސްޕޭސް އިންނެވެ. އެކުންފުނިން ބުނިގޮތުގައި މި ރޮކެޓަކީ، 3ޑީ ޓެކްނޮލޮޖީ ބޭނުން ކޮށްގެން ޕްރިންޓް ކޮށްފައިވާ ރޮކެޓެކެވެ. އަދި އެކުންފުނިން ސެޓެލައިޓު އުފެއްދުމަށް ވެސް ވިސްނަނީ މި ގޮތަށެވެ. މިއީ ޚަރަދު ކުޑަވާނެ ގޮތެއްކަމަށް ބުނެފައި ވެއެވެ.
އަގްނީކުލް ވެގެންދާނީ އިންޑިއާގައި ޖައްވަށް ސެޓެލައިޓެއް ފޮނުވާ އަމިއްލަ ކުންފުންޏަށެވެ.
އިންޑިއާގެ ސްޕޭސް ދާއިރާއަކީ 7 ބިލިއަން ޑޮލަރުގެ ވިޔަފާރީގެ ދާއިރާއެކެވެ. މިއީ ދުނިޔޭގެ 360ބިލިއަން ޑޮލަރުގެ ސްޕޭސް ވިޔަފާރީގައި ދޭއް އިންސައްތައެވެ. ނަމަވެސް އިންޑިއާއިން މަސައްކަތް ކުރަމުން ދަނީ 50 ބިލިއަން ޑޮލަރުގެ ވިޔަފާރީގެ ދާއިރާއަކަށް އެގައުމުގެ ސްޕޭސް ވިޔާފާރި ތަރައްއްގީ ކުރާށެވެ.
