ވެކްސިންގެ އަގު ބޮޑުވެގެން ދުނިޔެއިން ދަނީ ޝަކުވާ ކުރަމުންނެވެ. ރިޕޯޓްތައް ބުނާ ގޮތުން ވެކްސިން އުފެއްދި ހަތަރު ކުންފުންޏަކުން އަލަށް ދުނިޔޭގައި ނުވަ ބިލިއަނަރުން އުފަންވެއްޖެއެވެ. މި ވެކްސިން އުފެއްދި ހަތަރު ކުންފުނީގެ ތެރޭން ދެ ކުންފުންޏަކީ ޗައިނާގެ ދެ ކުންފުންޏެވެ.
ވެކްސިންގެ އަގުތައް މަތިވެފައި ވަނީ ފޯމިއުލާ އީޖާދު ކުރި ކުންފުނިތަކުން ކޮންމެ ވެކްސިންއަކަށް ރޯޔަލްޓީ ނެގުމަށް ނިންމާފައިވާތީއެވެ. އިންޑިއާއާއި ދެކުނު އެފްރިކާއިން ޑަބްލިއުޓީއޯގައި އެދިފައި ވަނީ ވަކި މުއްދަތަކަށް ވެކްސިންގެ ފިކުރީ ހައްގު ދޫކޮށްލުމަށް ނިންމައި ދިނުމަށެވެ. މިމައްސަލާގައި ދެކޮޅަށް ވާހަކަ ދެއްކުމަށްފަހު އެންމެ ފަހުން ޔޫރަޕުން ވެސް ވަނީ މިއަށް އާނބަސް ބުނެފައެވެ.
އަހަރު ނިމޭއިރު މުޅި އާބާދީއަށް ވެކްސިން ދޭނެކަމަށް ބުނެފައިވާ އިންޑިއާ ގައި ސަރުކާރު ހަސްފަތާލުތަކުން ވެކްސިން ހިލޭ ލިބުނަސް މީހުން އެތަންތާކަށް ދާކަށް ބޭނުމެއް ނުވެއެވެ. އަދި އަމިއްލަ ހަސްފަތާލާއި ކްލިނިކްތަކުން މިއަށް އަގު ނަގައެވެ.
އިންޑިއާއަށް ދެ ޝިޕްމެންޓް ލިބިފައިވާ ރަޝިޔާއިން އުފައްދާފައިވާ ސްޕްޓްނިކް ވެކްސިން ޖަހަމުން ދަނީ ފަސް ޕަސެންޓްގެ ޖީއެސްޓީ ނުހިމަނައި، 948 ރުޕީސްއަށެވެ. އެއްބަޔަކަށް އަގު ބޮޑު ކަމަށް ފާހަގަ ކުރެވޭއިރު ތޮއްޖެހުމަށް ބޭނުން ނުވާތީ ހަސްފަތާލަށް ނުގޮސްވޭތޯ އަނެއް ބަޔަކު ބަލައެވެ.
އިންޑިއާގައި ސްޕްޓްނިކް ފުޅާދާއިރާއެއްގައި އާންމުންނާ ހަމައަށް ފޯރާނީ އަންނަ މަހުގެ ހިސާބެއްގައެވެ.
ބެލެވޭ ގޮތުގައި ސްޕްޓްނިކް އިންޑިއާގެ ހަޔެއް ނޫނީ ހަތް ލެބޯޓްރީއެއްގައި އުފައްދާނެއެވެ. މި ވެކްސިން އިންޑިއާގައި އުފައްދަން ފެށުމުން، މީގެ އަގުތައް ބޮޑުކޮށް ދަށްވެގެންދާނެ ކަމަށް މިވެކްސިން އިންޑިއާގައި ވިއްކާ ޑރ. ރެއްޑީ ލެބޯޓްރީން ބުނެއެވެ.
ދުނިޔޭގައި އަދިވެސް ގިނަ ގައުމުތަކަކީ ވެކްސިންގެ އެންމެ ޑޯޒެއްވެސް ލޮލަށް ނުފެންނަ ގައުމުތަކެވެ.
