ސްރީލަންކާގެ އަހުލީ ހަނގުރާމައިގައި ހިންގާފައިވާ ބޮޑެތި ޖަރީމާތައް ތަހުގީގު ކުރުމަށް އެމެރިކާ ކޮންގްރެސްއިން ގޮވާލައިފިއެވެ.
ކޮންގްރެސްގެ ދެ ޕާޓީން ބައިވެރިވެގެން ވޯޓުން ފާސްކޮށްފައިވާ ގަރާރުގައި މައިގަނޑު 7 ކަމަކަށް އަލި އަޅުވާލާފައި ވެއެވެ. މިގަރާރަކީ، ސްރީލަންކާގެ އަހުލީ ހަނގުރާމައިގައި ހިންގާފައިވާ އަނިޔާވެރި އަމަލުތައް ތަހުގީގު ކުރުމަށް ބައިނަލްއަގްވާމީ ނިޒާމެއް ގާއިމް ކުރުމަށް ގޮވާލާ ގަރާރެކެވެ.
ލަންކާ އަހުލީ ހަނގުރާމަ ނިމުނުތާ 12 އަހަރު
މި ގަރާރުގައި، ޔޫއެން ހިއުމަން ރައިޓްސް ކައުންސިލްގެ ހުށަހެޅުމަށް ސްރީލަންކާގައި ހިއުމަން ރައިޓްސްއަށް އަރައިގެންފައިވާ މީހުންގެ މައްސަލަތައް އެމެރިކާއިން ތަހުގީގު ކޮށް ޝަރިއަތް ކުރުމާ ބެހޭ ގޮތުން އިތުރަށް ބަލަން ޖެހޭކަންކަން ބެލުމަށް ގޮވާލާފައި ވެއެވެ. އަދި ސްރީލަންކާގެ އަހުލީ ހަނގުރާމައިގައި ބޮޑެތި ޖަރީމާތައް ހިންގާފައިވާ މީހުންގެ މައްސަލަތައް ބެލުމަށް އދގެ އާންމު މަޖިލީހާއި ސަލާމަތީ މަޖިލީހާއި ޔޫއެން ހިއުމަން ރައިޓްސް ކައުންސިލްއާ ގުޅިގެން ބައިނަލްއަގްވާމީ މެކެނިޒަމެއް ތައާރަފް ކުރުމަށްވެސް ހުށަހަޅާފައި ވެއެވެ.
ސްރީލަންކާގެ އަހުލީ ހަނގުރާމައިގައި ހިންގާފައިވާ އިންސާނީ ހައްގުތަކާ ދެކޮޅުވެރި އަމަލުތައް ޑޮކިއުމެންޓް ކުރުމަށް ޔޫއެން ހިއުމަން ރައިޓްސް ކައުންސިލުން މަސައްކަތް ކުރުން އަވަސް ކުރުމަށް ގޮވާލާފައި ވެއެވެ. އަދި މި މައްސަކަތަށް ސްރީލަންކާގެ ސަރުކާރަށް ބެހިޔަ ނުދިނުމަށްވެސް އަންގާފައި ވެއެވެ.
ސްރީލަންކާގެ މިހާރުގެ ރައީސަކީ އަހުލީ ހަނގުރާމަ ނިމުނުއިރު ހުންނެވި ޑިފެންސް މިނިސްޓަރެވެ. އަދި މިހާރުގެ ބޮޑު ވަޒީރަކީ، އެއިރުގެ ރައީސް އެވެ.
