ދުނިޔޭގައި ހުރި ބޭނުން ކޮށްފައިވާ ޕްލާސްޓިކް ގެ އެންމެ ބޮޑު ފަރުބަދަ ހުރީ ޗައިނާގައެވެ. ޗައިނާއިން ވަނީ 2019 ގައި ބޮލަކަށް 18 ކިލޯގެ ޕްލާސްޓިކް ބޭނުންކޮށް އުކާލާފައެވެ. އެކަމަކުވެސް، ޗައިނާއަކީ އެންމެ ގިނައިން ބޮލަކަށް ޕްލާސްޓިކް ކުނިބުނި އުފައްދާ ގައުމެއް ނޫނެވެ.
ކޮންމެ އަހަރަކުވެސް ދުނިޔޭގައި ޕްލާސްޓިކް ބޭނުންކުރާ ނިސްބަތާ ބެހޭ ދިރާސާ ޕްލާސްޓިކް މޭކާރޒް އިންޑެކްސްގައި ހިމަނައެވެ. އޮސްޓްރޭލިއާގައި ހުންނަ ޖަމުއިއްޔާއަކުން ނެރެފައިވާ މި ދިރާސާފައި ބުނާ ގޮތުން އެއްފަހަރާ ބޭނުން ކޮށް އުކާލާ ޕްލާސްޓިކްގެ ދެބައިކުޅަ އެއްބައި އުފައްދަނީ ދުނިޔޭގެ 20 ކުންފުންޏަކުންނެވެ. މި ވިހި ކުންފުނިން ހަތަރު ބައިކުޅަ އެއްބައި ކުންފުންޏަކީ ޗައިނާއިން އޮޕަރޭޓް ކުރާ ކުންފުތަކެވެ.
ދުނިޔޭގެ އެންމެ އާބާދީ ބޮޑު ގައުމުގައި އެއްފަހަރާ ބޭނުން ކޮށްފައި އުކާލާ ޕްލާސްޓިކް ގިނައިން ބޭނުން ކުރާނެ ކަމީ ހައިރާން ވާން ޖެހޭފަދަ ކަމެއް ނޫނެވެ. އެކަމަކު ހައިރާން ވާން ޖެހޭ ކަމަކީ އެއް ފަހަރާ ބޭނުން ކޮށްފައި އުކާލާ ޕްލާސްޓިކް އެންމެ ގިނައިން ބޮލަކަށް ޖެހޭ ގައުމަކީ ޗައިނާ ނޫން ކަމެވެ.
އޮސްޓްރޭލިއާގައި އަހަރަކު ކޮންމެ ބޮލަކަށް 59 ކިލޯގެ ޕްލާސްޓިކް ކުނި އުކާލައެވެ.
އެމެރިކާގައި އަހަރަކު ބޮލަކަށް 53 ކިލޯގެ ކުނި އުކާލައެވެ.
ދެކުނު ކޮރެއާގައި އަހަރަކު ބޮލަކަށް 44 ކިލޯގެ ޕްލާސްޓިކް ކުނި އުކާލައެވެ.
ޕްލާސްޓިން ކުނިބުނި އުކާލާ ނިސްބަތުން ޗައިނާ ދަރަޖަ ކުރެވެނީ 45 ވަނައިގައެވެ. އެކަމަކުވެސް ޗައިނާގެ ޕްލާސްޓިކް ކުރި ފަރުދަބައަކީ ދުނިޔޭގެ އެންމެ ބޮޑު ޕްލާސްޓިކް ކުނީގެ ފަރުބަދަ އެވެ.
ޗައިނާގައި ޕްލާސްޓިކް ކުނި އުފައްދާ ކުންފުނިތަކަށް ބަލާއިރު، ސައިނޯޕެކް އަކީ ދުނިޔޭގެ ތިން ވަނަ އެވެ.
ޗައިނާގައި ޕްލާސްޓިކްއާއި ތިމާވެށްޓަށް ގެއްލުން ދޭ ކަންތައްތަކަށް އިތުރު ސަމާލުކަމެއް އައިސްފައި ވަނީ 2060ހާ ހަމައަށް ޗައިނާއަކީ ކާބަން ނިއުޓްރަލް ގައުމަކަށް ހެދުމަށް ރައީސް ޝީ ޖިންޕިން އިޢްލާން ކުރެއްވުމުންނެވެ. ޗައިނާއިން ދަނީ ޕްލާސްޓިކް ރިސައިކަލް ކުރާނެ ގޮތާއި އިރުގެ އަވިން ހަކަތަ އުފެއްދުމަށް ކުރި ހޯދަމުންނެވެ.
