ހޯމަ ދުވަހުގެރޭ މެލޭޝިޔާގައި ހިނގި އެކްސިޑެންޓްގައި 200 އަށްވުރެ ގިނަ މީހުންނަށް އަނިޔާވެއްޖެއެވެ. އެކްސިޑެންޓް ހިނގައިފައިވަނީ މެލޭޝިޔާގެ ވެރިރަށް ކުއާލަލަމްޕޫރުގައި ހުރި ދުނިޔޭގެ އެންމެ އުސް އިމާރާތް ކަމުގައިވާ ޕެޓްރޮނަސް ޓްވިން ޓަވަރު ކައިރީ ބިމު އަޑީގައެވެ.
މެލޭޝިޔާގެ ޗީފް ޕޮލިސް މުޙައްމަދު ޒައިނަލް އާ ހަވާލާދީ ރޮއިޓަރސް އިން ބުނާ ގޮތުގައި ހޯމަދުވަހުގެރޭ އަށްގަޑި ސާޅީސް ފަހެއް އެހައިކަންހާއިރު ހިނގި މި އެކްސިޑެންޓް ހިނގަން މެދުވެރިވީ 213 މީހުނާ އެކު ދަތުރު ކުރި ރޭލެއް މަރާމާތު ކުރުމަށްފަހު ފަސިންޖަރުން ނުލައި ދަތުރުކުރި ރޭލަކާއި މުޑި އަރައިގެންނެވެ.
މި އެކްސިޑެންޓްގައި 47 ވަރަކަށް މީހުން ވަނީ ވަރަށް ބޮޑަށް ޒަޚަމް ވެފައެވެ. އަދި 166 މީހުނަށް އެކި ވަރުގެ އަނިޔާ ލިބިފައި ވެއެވެ. މި އެކްސިޑެންޓް ހިނގީ ކޭއެލްސީ ސްޓޭޝަނުގެ ބިމު އަޑީގެ 100 މީޓަރުގެ ޓަނަލް އެއްގައެވެ.
ފުލުހުންގެ ޗީފް މުޙައްމަދު ޒައިދު ވިދާޅުވި ގޮތުގައި މިހާރު މި މައްސަލަ ތަހުގީގު ކުރަމުންދާ ކަމަށެވެ. ލަފާކުރެވޭ ގޮތުގައި މި އެކްސިޑެންޓް ދިމާވަން މެދުވެރިވެފައިވަނީ އޮޕަރޭޝަން ކޮންޓްރޯލްގެ މައުލޫމާތު ދިނުމުގެ މައްސަލައަކުންނެވެ.
މެލޭޝިޔާގެ ޓްރާންސްޕޯޓް މިނިސްޓަރ ވީކާސިއޯންގް ހާމަކުރެއްވި ގޮތުގައި މިއީ މެލޭޝިޔާގެ މެޓްރޯ ސިސްޓަމްގެ 23 އަހަރުގެ ތާރީޚުގައި ހިނގި އެންމެ ބޮޑު އެކްސިޑެންޓެވެ. އެހެންކަމުން މިކަމުގެ ތަހުގީގު ވަރަށް ފުންކޮށް ކުރެވޭނެ ކަމަށް އޭނާ ވިދާޅުވިއެވެ.
