ޕެސިފިކް ސަރަހައްދުގައި ޗައިނާއިން ނުފޫޒު ގަދަ ކުރުމަށް ކުރަމުންދާ މަސައްކަތް، ސަމުއާގެ އައު އަންހެން ބޮޑު ވަޒީރު ފެންކޮށްލެއްވީ ކަމަށް މުޙައްލިލުން ވިދާޅުވެއެވެ. ޗައިނާއިން ވަނީ 128 މިލިއަން ޑޮލަރުގެ ބަނދަރެއް ޕެސިފިކްގެ ސަމުއާގައި ބިނާ ކުރުމަށް ނިންމާފައެވެ. އައު ބޮޑު ވަޒީރު ފިއާމީ ނާއޮމީ މަޓާފާ ވިދާޅުވާ ގޮތުގައި މިވަރުގެ ބޮޑު އަދަދަކީ އޭނާގެ ގައުމާ އެކަށީގެންވާ ވަރުގެ އަދަދެއް ނޫން ކަމަށެވެ.
މަޓާފާ އަކީ ސަމުނާގެ ފުރަތަމަ އަންހެން ބޮޑު ވަޒީރެވެ. ކުރީގެ އިދިކޮޅު ވިދާޅުވަނީ އޭނާގެ ސަރުކާރުން ޗައިނާއާއެކު ގާތް ގުޅުން ދަމަހައްޓާނެއެވެ. ސަމުއާގައި ޗައިނާއިން ބަނދަރެއް ހެދުމަކީ އެގައުމުގެ ރައްޔިތުން ބައިކޮށްލި މައްސަލައެކެވެ. މިކަމާ ގުޅިގެން ކުރީގެ ބޮޑު ވަޒީރަށް ޕާލަމެންޓްގެ އަޣުލަބިއްޔަތުވެސް ގެއްލިގެން ދިޔައީއެވެ.
އެމެރިކާއާއި އެމެރިކާގެ ޕެސިފިކް ބައިވެރިން ވަނީ މިކަމާ މެދު ނުތަވަސްކަމުގެ ނަޒަރަކުން ބަލާފައެވެ. އަދި ޗައިނާގެ ބަނދަރުގެ ސަބަބުން ސަމުއާއަށް ބޭރުގެ ފަރާތްތަކުގެ ވާދަވެރިކަންވެސް އިތުރިވެގެން ދިޔައެވެ. އަސްކަރީ ބޭނުންތަކަށް ބޭނުންވާ ފަދަ ސްޓްރެޓިކް އެސެޓްތައް އެމެރިކާގެ ވާދަވެރިންގެ އަތްމައްޗަށް ދިއުމަށް އެމެރިކާ ބޭނުމެއް ނުވެއެވެ.
ކުރީގެ ބޮޑު ވަޒީރާއެކު ބަނދަރު ހެދުމަށް އެއްބަސްވެ ޗައިނާއިން ބުނެފައި ވަނީ، މިސްޓަރ ޓޫލިއާޕާ އަކީ ޗައިނާގެ ގާތް ރަހުމަތްތެރިއެއް ކަމަށެވެ.
ސަމުއާއަށް އެންމެ ގިނައިން ދަރަނި ދީފައިވާ ގައުމަކީ ޗައިނާއެވެ. ދެ ލައްކަ މީހުންގެ އާބާދީއެއް އޮންނަ ސަމުއާގެ 40 ޕަސެންޓް ދަރަންޏަކީ ޗައިނާގެ ދަރަންޏެވެ.
ސަމުއާ އަކީ މަސްވެރިކަމާއި ފަތުރުވެރިކަމާއި ކާށި ވިއްކައިގެން އުޅޭ ގައުމެކެވެ.
ސަމުއާގެ މައި އެއަރޕޯޓް ހަދާދީފައި ވަނީ ޖަޕާނުންނެވެ.
