އެމެރިކާ ސިފައިން އަފްޣާނިސްތާނުން ފައިބައިގެން ދިއުމާއެކު ޕާކިސްތާނުން ބޭނުން ވަނީ އަފްޣާނިސްތާނުން އިންޑިއާއާއެކު ގުޅުން ކަނޑާލުމަށް ކަމަށް އަފްޣާނިސްތާންގެ ކުރީގެ ރައީސް ހަމީދް ކަރްޒާއީ ވިދާޅުވެއެވެ. ޖަރުމަންވިލާތު ނޫހަކަށް މަޢްލޫމާތު ދެއްވަމުން އޭނާ ވިދާޅުވީ، ތާލިބާން މެދުވެރިކޮށް އަފްޣާނިސްތާން ސަރުކާރަށް ފިއްތުންތައް ކުރިމަތި ކުރަންވެސް ޕާކިސްތާނުން ބޭނުން ވެއެވެ.
ޖަރުމަންވިލާތުގެ ޑަޝްޕީގަލް ނޫހަސް ދެއްވި އިންޓަރވިއުގައި ކަރްޒާއީ ވިދާޅުވީ ޕާކިސްތާންގެ މިއެދުމަކީ މުސްތަހީލު އެދުމެއް ކަމަށެވެ. އަދި މިކަން މިގޮތަށް ހަދައި ދީފިނަމަ، އަފްޣާނިސްތާނުން އަމިއްލަ ސިޔާދަތު ނަގާލަނީ ކަމަށްވެސް އޭނާ ވިދާޅުވިއެވެ. އަދި އިންޑިއާއަށް އަފްޣާނިސްތާންގެ އަންހެން ކުދިންނާއި ފިރިހެން ކުދިން ފޮނުވުމުގައި ފައިދާއެއް އޮތް ނަމަ އަފްގާނިސްތާނުން އެކަން ކުރަންވީކަމުގައި އޭނާ ވިދާޅުވިއެވެ. ޕާކިސްތާންގެ މަގްސަދަކީ، އަފްޣާނިސްތާނަށް ސްޓްރެޓިޖިކް ގޮތުން ނުފޫޒު ފޯރުވުން ކަމަށް އޭނާ ވިދާޅުވިއެވެ.
އަފްޣާނިސްތާން ހަނގުރާމައާ ބެހޭ ގޮތުން އޭނާ ވިދާޅުވީ، މި ހަނގުރާމައަކީ، އަފްޣާނިސްތާންގެ ހަނގުރާމައެއް ނޫން ކަމަށެވެ. ނަމަވެސް މިއީ ބަޔަކު އަފްޣާން މީހުން އެއްބަޔަކު އަނެއްބަޔަކަށް ތެޅުވުމަށްޓަކައި ބޭނުން ކުރާ ވަސީލަތެއް ކަމުގައެވެ.
ސެޕްޓެމްބަރު 11 ގެ ހަމަލައަށްފަހު އެމެރިކާއިންވެސް ދުނިޔޭގައި ނުފޫޒު ދެއްކުމަށް ޓަކައި އަފްޣާނިސްތާންގެ ސްޓްރެޓެޖިކް ސަރަހައްދުގެ ބޭނުން ހިފީ ކަމުގައި ކަރްޒާއީ ވިދާޅުވިއެވެ. ހަމައެފަދައިން ޕާކިސްތާނުންވެސް އެމީހންގެ އެޖެންޑާއަށް ތާލިބާނުން ބޭނުން ކުރީ ކަމުގައެވެ.
