އިންޑިއާގައި އަންނަ ހަފްތާގައި އަމަލު ކުރަންފަށާ ގާނޫނަކުން ރައްޔިތުންގެ މުވާސަލާތީ ޕްރައިވެސީ ގެއްލިގެން ހިނގައިދާނެކަމަށް ބުނެ، ވަޓްސްއެޕް އިން އިންޑިއާ ސަރުކާރާ ދެކޮޅަށް ދައުވާ ކޮށްފިއެވެ. ދިއްލީ ހައިކޯޓަށް ވަޓްސްއެޕް ކުންފުނިން ހުށަހަޅާފައިވާ ދައުވާގައި އެދިފައި ވަނީ އައު ގާނޫނުން ގާނޫނުއަސާސީން ރައްޔިތުންނަށް ލިއްބައި ދީފައިވާ ޕްރައިވެސީއާ ޚިލާފްވާ ކަމަށް ކަނޑައަޅައި ދިނުމަށެވެ.
މި ގާނޫނުގައި އެންމެ ބޮޑު މައްސަލައަކަށް ވެގެން އުޅެނީ ވަޓްސްއެޕް މެސެޖެއް އެންމެ ފުރަތަމަ ފެށި މީހާއާ ބެހޭ މަޢްލޫމާތު ހާމަ ކުރުމާ ބެހޭ ގޮތުންނެވެ. ވަޓްސްއެޕްއިން ބުނާ ގޮތުގައި ދެ މީހެއްގެ ދެމެދު ހިނގާ މުވާސަލާތަކީ އެންކްރިޕްޓް ކުރެވިފައިވާ މުވާސަލާތެއްކަމުން، އެފަދަ މަޢްލޫމާތެއް ހާމަ ކުރުމަކީ ފަންނީ ހަމަތަކުން އެކަށޭނެ ކަމެއް ނޫނެވެ. އަދި ސަރުކާރުން އެދޭ ގޮތަށް އެކަން ކުރާނަމަ، އެންކްރިޕްޝަން ދޫކޮށްލަން ޖެހޭނެއެވެ.
ވަޓްސްއެޕްއަކީ އިންޑިއާގެ 400 މިލިއަން މީހުން ބޭނުން ކުރާ އެޕެކެވެ.
މި މައްސަލާގެ ހައްސާސްކަމުން ބައެއް ފަރާތްތަކުން މީޑިއާގައި މި ކަމާ ބެހޭ ގޮތުން ވާހަކަ ދައްކާކަށްވެސް ބޭނުމެއް ނުވިއެވެ. ވަޓްސްއެޕްއިންވެސް އިތުރު ތަފްސީލް ދޭކަށް ބޭނުވެއެވެ.
މި ދައުވާއަކީ، އިންޑިއާގެ ސުމޭކް ވެށީގައި ހިނގަމުންދާ ކޮޅުންތަކުން ކުޑަ މިންވަރެކެވެ. ވެރިކަން ކުރާ ޕާޓީއާއި އިދިކޮޅު ފަރާތްތަކާއި ފާޑުކިޔުންތެރިންގެ މެދުގައި ސުމޭކް ވެށި ބައިކޮށް، ބޮޑެތި ގޮންޖެހުންތަކާ ކުރިމަތިލާން ޖެހިފައި ވެއެވެ. ސަރުކާރުން ބޭނުން ވަނީ ސުމޭކް މުވާސަލާތަށް ނުފޫޒުފޯރުވާށެވެ.
ސުމޭކް މުވާސަލާތުގެ މަހާ ކުންފުނިތައް ކަމުގައިވާ ގޫގްލްގެ ބަފާ ކުންފުނި،. އަލްފަބެޓާއި ޓުއީޓާއާއި ފޭސްބުކްއިން ވަނީ އިންޑިއާގައި އިންވެސްޓް ކޮށްފައެވެ. މިކުންފުނިތައް އިންޑިއާގެ ހަރުކަށި ސުމޭކް ގާނޫނުގެ ދަށަށް އައުމުން ވިޔަފާރިއަށް ބުރޫއަރާނެ ކަމަށް ލަފާވެއެވެ.
މި ހުރިހައި ކަމެއްގެ މެދުތެރޭގައި މިހަފްތާ ފެށުނު އިރު، އިންޑިއާ ފުލުހުން ވަނީ ނިއުދިއްލީ އޭރިއާގައި ޓުއިޓާގެ އޮފިސްތަކަށް "ޒިޔާރަތް" ކޮށްފައެވެ. މީސްމީޑިއާއާއި އިދިކޮޅު ފަރާތްތަކުން ސިފަކޮށްފައިވަނީ މިކަން ރެއިޑެއްގެ ގޮތުގައެވެ.
މިކަން ފެށުނު ހިސާބަކީ، އިދިކޮޅު ފަރާތްތަކަށް ނިސްބަތް ކޮށް ވެރިކަން ކުރާ ޕާޓީގެ ވަޒީރުންނާއި އިސްބޭފުޅުން ކުރެއްވި ޓުއީޓްތަކެއް އަލަށް އުފައްދާފައިވާ ފެކްޓް ޗެކް ކުރާ އަމިއްލަ ފަރާތަކުން ފެކްތް ޗެކްކުރުމަށްފަހު އެކަން އާންމު ކުރިފަހުން، ޓުއިޓާއިން ބީޖޭޕީގެ ވެރިންގެ ޓުއީޓްތަކަކީ "މެނިޕިއުލޭޓެޑް މީޑިއާ" ކަމަށް ލޭބަލް ކުރުމުންނެވެ.
ކޮވިޑް19 ކޮންޓްރޯލް ކުރުމުގައި އިންޑިއާ ސަރުކާރާ ބެހޭ ގޮތުން ފާޑުކިޔާފައިވާ މެސެޖްތައް ނެގުމަށް އުނިކުރުމަށްވެސް އިންޑިއާ ސަރުކާރުން މީސްމީޑިއާ ކުންފުނިތަކަށް ފިއްތާފައި ވެއެވެ.
އިންޑިއާއިން ދަ އިންޓަރމީޑިއަރީ ގައިޑްލައިންސް އެންޑި ޑިޖިޓަލް މީޑިއާ އެތިކްސް ކޯޑް ނެރެފައި ވަނީ ފެބްރުއަރީ މަހުއެވެ. ކޮވިޑްއާއެކު އިޖުތިމާއީ ދިރިއުޅުމަށް ހިޔަނި އެޅެމުންދާއިރު ޚިޔާލު ފާޅުކުރުމުގެ މިނިވަންކަންވެސް ދަނީ ހީނަރު ވަމުންނެވެ.
