އިނގިރޭސިވިލާތުގެ ވިޔަފާރި ދާއިރާއާ ބެހޭ ގޮތުން އިއްޔެ މީޑިއާ ރިޕޯޓްތައް ބުނެފައި ވަނީ ކުރިން ޖަރުމަންވިލާތުން އިނގިރޭސިން އެތެރެ ކުރަމުން އައި ވަރަށް މިހާރު ޗައިނާއިން މުދާ އެތެރެ ކުރަމުންދާ ކަމަށެވެ. ވިލާތު އިއްތިހާދުން އިނގިރޭސިން ވަކި ވުމުން ޗައިނާއަށް ފައިދާ ކުރީ ކަމަށެވެ.
ހަމައެއާކު ފެނިގެން ދަނީ، ޗައިނާއާ ދެކޮޅަށް ވިޔަފަރީގެ ދަތިކުރުމުގެ ފިޔަވަޅުތައް ބޮޑެތި އިގްތިސާދުތަކުން އަޅަމުންދާ ތަނެވެ. ޔޫރަޕްގެ ޖަމާއަތުން ވަނީ ޗައިނާއާއެކު މިނިވަން ވިޔަފާރި ބުރެކި ޖައސާފައެވެ. އެމެރިކާއިން އެތައް ފިޔަވަޅެއް އަޅާފައި ވެއެވެ. ހަމައެފަދައިން އޮސްޓްރޭލިއާއާއި ޖަޕާނާއި އިންޑިއާއިންވެސް މެއެވެ.
ޗައިނާއާ ދެކޮޅަށް މައްސަލަތައް ޖައްސާ ގައުމުތަކުން އެތައް ފުށަށް ކެނޑޭ މައްސަލަތަކެއް ޗައިނާއާ ދެކޮޅަށް ނަގައެވެ. ޓައިވާން ކަނޑު އޮޅީގައި އާއި ދެކުނު ޗައިނާ ކަނޑުގައި އަވަށްޓެރިންނާ ދެކޮޅަށް ޗައިނާއިން ގެންގުޅޭ އުދުވާނީ ގޮތްތަކާއި ހޮންގކޮންގއާއި ޓިބެޓާއި ޝިންޖިއާނގައި ޗައިނާއިން ގެންގުޅޭ އިންސާނީ ހައްގުގެ މުރަނަކަމާއި، އިންޑިއާގެ ލަދާކް ސަރަހައްދުގައި ގެންގުޅޭ ހަރުކަށި ކަމަކީ، ލިސްޓްގައި ފާހަގަ ކުރެވޭ ކަންތައްތަކެވެ. މިއަށް އިތުރު ކުރަން ޖެހޭ އެހެން މައްސަލަތަކަކީ، ޗައިނާއިން ޓެކްނޮލޮޖީ ބޭނުންކޮށްގެން، މަޢްލޫމާތުގެ ރަސްމަގުގައި ހިންގާ ކަމަށް ބޮޑެތި ގައުމުތަކުން ތުހުމަތު ކުރާ ނޭއްގާނީ އަމަލުތަކެވެ. އަދި ޗައިނާއަށް ފޫޅު ކަނޑާފައިވާ ކޮވިޑް19ގެ ވަބާވެސް މިލިސްޓަށް އިތުރު ކޮށްލަން ވީއެވެ.
ޗައިނާގެ ކޮމިއުނިސްޓް ޕާޓީގެ ގްލޯބަލް ޓައިމްސް ނޫސްއިންވެސް ގަބޫލުކުރާ ގޮތުގައި ޗައިނާއިން މިހާރު ކުރަން ޖެހިފައިވާ ހަނގުރާމައަކީ ޗައިނާއާ ދޭތެރޭ ދުނިޔޭގެ މީހުން ދެކޭ ގޮތް ބަދަލު ކުރުމުޖގެ ހަނގުރާމައެވެ. ކޮމިއުނިސްޓް ޕާޓީގެ ވެރިކަމަށް ސަތޭކަ އަހަރު ފުރުމުގެ މުނާސަބާއަށް ތައްޔާރުވާއިރު މިއީ ބެއިޖިންގއަށް އޮތް ބޮޑު ގޮންޖެހުމެކެވެ.
ޗައިނާގެ ރަހުމަތްތެރި، އަދި ކުރީގެ ވިޔަފާރި އެންމެ ބޮޑު ބައިވެރިޔާ، އޮސްޓްރޭލިއާއާއި ޗައިނާގެ ގުޅުޅުން ވަނީ ހުރިހައި މައިދާނެއްގައިވެސް ގޯސްވެފައެވެ. މިދިޔަ ހަފްތާތަކުގައި އޮސްޓްރޭލިއާއަށް ދީފައިވާ ސައިބާ ހަމަލާތަކުގެ ޒިންމާވެސް އޮސްޓްރޭލިއާއިން އަޅުވާފައި ވަނީ ޗައިނާގެ ބޮލުގައެވެ. ވޫހާންގެ ލެބޯޓްރީއަށް ނިސްބަތް ކުރާ ވަބާ، ކޮވިޑް19 ފެތުރިގެން އައިގޮތް ހޯދުމަށް އަދިވެސް އެމެރިކާއާ އެއްކޮށް އޮސްޓްރޭލިއާއިން ގޮވާލައެވެ.
ޔޫރަޕްގެ ޖަމާއަތަކީ، ކޮވިޑް19 އާ ގުޅިގެން ފެނިގެން ދިޔަ، ޗައިނާގެ އިންވެސްޓްމެންތްތަކަށް އެންމެ ފުރަތަމައަށް ސަމާލުވި އެއް ގައުމެވެ. ކޮވިޑްގެ ވަބާގައި އެންމެން ހޭބޯނާރާ މިދިޔަ އަހަރު އުޅުނު އިރު ޗައިނާއިން ދިޔައީ ވިލާތު އިއްތިހާދުގެ ގައުމުތަކުގެ ޓެކްނޮލޮޖީ ސާމާނު އުފައްދާ ކުންފުނިތައް ގަންނަމުންނެވެ. މިހާރު ޔޫރަޕުން ވަނީ ޗައިނާގެ އިންވެސްޓްމެންޓަށް ހުރަސްތަކެއް ކުރިމަތި ކޮށްފައެވެ. ޗައިނާއަކީ ބޯކޮށް އުފެއްދުންތެރިކަމަށް ސަބްސިޑީ ދޭ ގައުމެކެވެ. މީގެ ސަބަބުން ޗައިނާގެ މުދަލުގެ އަގު ހެޔޮވެ، ޔޫރަޕްގެ އުފެއްދުންތަކަށް ޗައިނާއާ ވާދައެއް ނުކުރެވެއެވެ.
ޔޫރަޕްގެ ޖަމާއަތަކީ، 45 މިލިއަން ކަސްޓަމަރުންގެ މައްޗަށް އެކުލެވިގެންވާ މާކެޓެކެވެ.
ވިލާތު އިއްތިހާދުގެ 27 ގައުމުގައި ވަނީ، ރޯމެޓީރިއަލްއާއި ޕާމަސޫޓިކަލް އިންގްރިޑިއަންޓްސްއަށް ބޭނުންވާ 137 ބާވަތުގެ އުފެއްދުމެއް ލިސްޓްކޮށްފައެވެ. ޗައިނާ އަކީ ރޯމެޓީރިއަލް ކޮންޓްރޯލް ކުރާ ގައުމެކެވެ. ބޭހުގެ ބާވަތްތައް އުފެއްދުމަށް ބޭނުންވާ އިންގްރިޑިއެންޓްސްވެސް އަންނަނީ ޗައިނާއިން ނެވެ.
ޔޫރަޕަށް އައި ހޭލުންތެރިކަމާއެކު މިހާރު ވަނީ ޗައިނާ ނޫން ފަރާތްތަކުން މިސާމާނު ލިބޭތޯ މަސައްކަތް ކުރުމަށް ނިންމާފައެވެ.
އެމެރިކާއަށް ބަލާއިރު ޓްރަޕްވެސް ވަނީ ޗައިނާގެ ޓެކްނޮލޮޖީ ކުންފުނިތަކާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. ޖޯ ބައިޑެންގެ ސަރުކާރުން ވެސް ވަނީ މި ފަހުން އިތުރު ހަތް ކުންފުންޏެއް އެމެރިކާގެ ދަތިކުރުމުގެ ފިޔަވަޅުގައި ލިސްޓް ކޮސްފައެވެ. މި ކުންފުނިތަކަކީ، ސުޕަ ކޮމްޕިއުޓިންގގައި މަސައްކަތް ކުރާ ކުންފުނިތަކެވެ. އެމެރިކާގެ ދަތި ކުރުންތަކުން ޗައިނާއަށް އެންމެ އުނދަގޫ ވަނީ ކޮމްޕިއުޓަރ ޗިޕް ލިބުމުގެ ދަތިކަމާ ކުރިމަތިލާން ޖެހޭތީއެވެ. ގްލޯބަލް ޓައިމްސްއިން އެމެރިކާގެ ދަތިކުރުމުގެ ފިޔަވަޅުތައް ސިފަ ކުރަނީ މަދިރިއެއްގެ ދަތް އެޅުންފަދަ ކަމެއް ކަމަށެވެ. އެހންނަމަވެސް މިކަން ހައްލު ކުރުމަށް ޗައިނާއިން ފިޔަވަޅުތައް އެޅިނަމަވެސް އަދި ކާމިޔާބު ވާ ގޮތެއް ނުވެއެވެ.
ވާވޭއަކީ އާންމު ފަރުދުންގެ ފގެންވަރުގައި ބޭނުންކުރާ ޓެކްނޮލޮޖީ ފޯރުވައިދޭ މުހިންމު ކުންފުންޏެކެވެ. އެމެރިކާގެ ދަތިކުރުމުގެ ސަބަބުން ވާވޭއަށް ބޮޑެތި ގޮންޖެހުންތަކާ ކުރިމަތި ލާން ޖެހިފައި ވެއެވެ. މިދިޔަ ދެ ހަފްތާގެ ތެރޭގައި މުވާސަލާތީ ބީލަމަށް ހުށަހެޅި ދެ ގައުމު ކަމަށްވާ އިންޑިއާ އާއި އިތިއޯޕިއާގެ ބީލަންވެސް ޗައިނާ ކުންފުންޏަކަށް ލިބިފައެއް ނުވެއެވެ. އިންޑިއާއިން ވަނީ ގަސްތުގައި ވާވޭ ކަޓުވާލާފައެވެ. އިތިއޯޕިއާގެ ބީލަން ކާމިޔާބު ކުރީ އެމެރިކާގެ ކޮންސޯޓިއަމަކުންނެވެ.
ޗައިނާއާ ދެކޮޅަށް އެޅުމުގެ މަގުމަތީގައި އުޅޭ އެހެން ފިޔަވަޅަކީ އޮސްޓްރޭލިއާއާއި އިންޑިއާއާއި ޖަޕާން ބައިވެރިވާ ފިޔަވަޅެކެވެ. މިތިން ގައުމުން ގުޅިގެން މަސައްކަތް ކުރަނީ ދުނިޔޭގެ ސަޕްލައި ޗެއިންގައި ޗައިނާއަށް ބަރޯސާވުން ކުޑަ ކުރާށެވެ.
ޗައިނާއިން ވަނީ މި ތިން ގައުމުގެ ނިންމުން ހަރުކަށި އިބާރާތުން ކުށްވެރިކޮށްފައެވެ. ޗައިނާއިން ސިފަ ކުރި ގޮތުގައި މި ގައުމުތަކުގެ މި މަސައްކަތަކީ ޗައިނާ އެކަހެރި ކުރުމަށް ކުރާ މަސައްކަތެކެވެ.
ޗައިނާ އެކަހެރި ކުރުމަށް މަސައްކަތް ކުރެވެމުންދަނީ ހަމައެކަނި ސަޕްލައި ޗެއިންގައި އެކަންޏެއް ނޫނެވެ. އެމެރިކާގެ ސެނެޓްގައި މިދިޔަ އެޕްރީލްގައި ވަނީ ސްޓްރެޓެޖިކް ކޮމްޕެޓިޝަން ބިލް ހުށަހަޅާފައެވެ. މިއިން އަސްކަރީ ގޮތުންވެސް އެމެރިކާއާއި ބައިވެރިން ގުޅިގެން ޗައިނާ އެކަހެރި ކުރާނެ ކަމަށް ބެލެވެއެވެ.
ޗައިނާއާ ދެކޮޅަށް ކުރެވޭ މަސައްކަތުގައި އިންސާނީ ހައްގުތައް ނިވާފަތްގަނޑަކަށް ބޭނުން ކުރެވެއެވެ. ނަމަވެސް އިންސާނީ ހައްގުތަކުގައި އެންމެ އަޚުލާގު ރަނގަޅީ ކާކުގެތޯ ނުވަތަ އެންމެ މަދުން ލޭ އުނގުޅިފައި ހުރީ ކާކުގެ އަތުގައި ތޯ ވަޒަން ކުރެވޭނީ ކިޔުންތެރިންގެ ހަނދާނުގެ ތާޒާކަމާއި މަޢްލޫމާތުގެ މުއްސަނދިކަމުގެ ކައްޓާއިން ވަޒަން ކޮށްގެންނެވެ.
