ޕާކިސްތާންގެ މަޝްހޫރު ނޫސްވެރިއާ ޙާމިދު މީރް ގެ ޕްރޮގްރާމް، ހުއްޓުވުމުން އެމްނެސްޓީ އިންޓަރނޭޝަނަލްއާއި ޕާކިސްތާންގެ ނޫސްވެރިންގެ ޖަމުއިއްޔާއާއި ޕާކިސްތާންގެ ހިއުމަން ރައިޓްސް ކޮމިޝަނުން އެކަން ކުށްވެރިކޮށްފިއެވެ.
ހާމިދު މީރް އަކީ ތަޖުރިބާކާރު ނޫސްވެރިއެކެވެ. ޖިއޯ ނިއުސް ޓީވީގައި ހަފްތާއަކު ފަސް ދުވަހު އޭނާ ކެޕިޓަލް ޓޯކްގެ ނަމުން ޕްރޮގްރާމެއް ގެނެސްދެއެވެ.
ބީބިސީ އުރުދޫއާ ވާހަކަ ދައްކަވަމުން ޙާމިދު މީރް ވިދާޅުވީ އޭނާ ވަނީ ދިގު ޗުއްޓީއެއްގައި ބެހެއްޓުމަށް ޖިއޯ ނިއުސްއިން ނިންމާފައެވެ. އަދި އާއިލާއާ ދެކޮޅަށް ބިރު ދެއްކުމުގެ އަމަލުތައް ކުރިމަތިވަމުން އަންނަ ކަމުގައި ވިދާޅުވަމުން، މީގެ ކުރިންވެސް ވަޒީފާ ގެއްލި ފުރާނައަށް ނުރައްކާވާފަދަ ހަމަލައަކާ ކުރިމަތިލާފައިވާތީ މިފަހަރުވެސް ބިރު ގަންނަވައި ނުލެވޭނެ ކަމުގައި އޭނާ ވިދާޅުވިއެވެ.
ޙާމިދް މީރް ވަނީ މި ހަފްތާގައި އިސްލާމްއާބާދުގައި ތަގްރީރު ކުރަމުން ސަރީހަ އިބާރާތުން ސިފައިންނަށް ފާޑު ކިޔާފައެވެ. އަދި ސިފައިންގެ ވެސް ހިސާބުކިތާބު ބެލެވެން ޖެހޭނެ ކަމަށް ބުނެފައެވެ.
ޕާކިސްތާންގައި ސިފައިންނާ ބެހުމަކީ ހުރަސް ކޮށްގެން ނުވާނެ އިމެކެވެ.
ހާމިދް މީރްގެ ތަގްރީރުގައި އޭނާ ވަނީ ޕާކިސްތާންގައި ޚިޔާލު ފާޅުކރުމަށް ދިމާވާ ހުރަސްތަކާ މެދުވެސް ވާހަކަ ދައްކާފައެވެ.
ދާދިފަހުން ސަރުކާރަށް ފާޑުކިޔާ ޔޫޓިއުބާ އަސަދު އަލީ ތޫރުގެ ގެއަށް ވަދެ އޭނާއަށް ދިން ހަމަލަވެސް ހާމިދު މީރް ވަނީ ކުށްވެރިކޮށްފައެވެ.
ޕާކިސްތާންގެ މީޑިއާ މިނިސްޓަރ ފަވާދް ޗޯދްރީ ވަނީ މިކަން އަވަހަށް މިމައްސަލައިން ސަލާމަތްވެ ވަޑައިގަތުމަށް ޓުއީޓެއް ކުރައްވާފައެވެ. އޭނާ ވިދާޅުވީ، ކޮން ޕްރޮގްރާމަކަށް އަރުވާނީ ކާކުކަން ނިންމާނީ އެ ސްޓޭޝަނަކުން ކަމަށެވެ. އެކަމާ ސަރުކާރުން ނުބެހޭ ކަމަށެވެ.
ބީބީސީއާ ވާހަކަ ދައްކަމުން ހާމިދު މީރް ބުނެފައި ވަނީ އޭނާގެ އަންހެން ދަރިފުޅަށް ބަޔަކު ޖެއްސުންކޮށް ފުރައްސާރަ ކުރަމުންދާ ކަމަށެވެ. އަދި މާ އިހު ޒަމާނުގެ މައްސަލައެއްގައި ފެޑަރަލް އިންވެސްޓިގޭޝަން އެޖެންސީން އޭނާގެ ބޭބެވެސް ޔަހްގީގަށް ގެންދަމުންދާ ކަމަށެވެ.
އިދިކޮޅި މުސްލިމް ލީފް ނަވާޒްގެ ނާއިބް ރައީސާ މަރްޔަމް ނަވާޒް ވިދާޅުވީ ހާމިދް މީރް އެކަހެރިކޮށްލައިގެން ރޯވި މިއަލިފާން ގަނޑު ނުނިވޭނެ ކަމަށެވެ.
