ދެކުނު ޗައިނާ ކަނޑުގައި ފިލިޕީންސްގެ ކަނޑުގެ ސިފައިން އާދަޔާ ޚިލާފަށް ގިނަ އަދަދަކަށް ފޯރި މަރަން ފަށައިފިއެވެ. ފިލިޕީންސްއިން ތުހުމަތު ކުރާ ގޮތުގައި އެގައުމުގެ އިގްތިސާދީ ސަރަހައްދުން ޗައިނާގެ ނޭވީން ގެންގުޅޭ ޗައިނާ މަސްވެރިންގެ މިލީޝިއާ ބޯޓްތަކުން ވަދެ ދަނީ މަސްވެރިކަން ކުރަމުންނެވެ. އަދި ފިލިޕީންސްގެ މަސްވެރިންނަށްވެސް ދުއްތުރާ ކުރަމުންނެވެ.
ފިލިޕީންސްއިން ބުނާ ގޮތުގައި ޗައިނާގެ މަސްވެރި މިލީޝިއާގެ 220 އުޅަނދު އަބަދުވެސް ފިލިޕީންސްގެ ސަރަހައްދަށް ވަދެ މަސްވެރިކަން ކުރަމުން ދެއެވެ.
އޭޝިއާ މެރިން އިން ހޯދާފައިވާ މެކްސާރ އާއި ޕްލަނެޓްގެ ފޮޓޯތަކުން ފެންނަ ގޮތުގައި ފިލިޕީންސްގެ ކަނޑުގެ ސިފައިން ވަނީ އިތުރު އުޅަނދުތައް ބޭނުން ކޮށްގެން ފިލިޕީންސްގެ އީއީޒެޑްގައި ފޯރި މަރަން ފަށާފައެވެ.
ފިލިޕީންސްގެ އެކްސްކްލޫސިވް އިކޮނޮމިކް ޒޯނަކީ، ޗައިނާއިން މައްސަލަ ޖައްސާ ސަރަހައްދެކެވެ. މި ސަރަހައްދުގައި ހިމެނޭ ފިލިޕީންސްގެ ބައެއް ޖަޒީރާތަކާއި ތިލަ ފަޅުތަކަށް ޗައިނާއިން ވަނީ އަތް ގަދަ ކޮށްފައެވެ.
ނިމިދިޔަ މަހުގެ 25އާ ހަމައަށް ފިލިޕީންސްގެ 13 އުޅަނދަކުން އީއީޒެދްގައޮ 57 ފަހަރަށް ދަތުރުތައް ބާއްވައި ފޯރި މަރާފައި ވެއެވެ. މިއިން ބައެއް އުޅަނދުތަކަކީ ކަނޑުގެ ސިފައިންގެ އުޅަނދުތަކެވެ.
ފިލިޕީންސްގެ އުޅަނދުތަކުން ބުރުޖަހާފައި ވަނީ ސްޕާޓްލީޒް އައިލެންޑާއި ސްކާބޮރޯ ޖަޒީގެ ކައިރިންނެވެ. މިއީ ޗައިނާއިން އެ ޖަޒީރާތަކުގައި ސިފައިންގެ މަރުކަޒުތައް ހަދާފައިވާ ތަންތަނެވެ. އަދި މި ހިސާބުގައި ޗައިނާގެ އުޅަނދުތައް ގިނަ އަދަދަކަށް ދުއްވައި ހަދައެވެ.
ޗައިނާއިން މަސްވެރިންގެ މިލީޝިއާތައް ދާއިމީ ގޮތަކަށް ދެކުނު ޗައިނާ ކަނޑުގައި ބައިތިއްބައިގެން އުޅުނަސް، ފިލިޕީންސްގެ ރައީސް މަސައްކަތް ކުރައްވަނީ މައްސަލަ ހޫނު ނުވެ ހައްލު ކުރެވޭތޮއެވެ. ނަމަވެސް ޗައިނާއިން ދެކުނު ޗައިނާ ކަނޑުގައި މުރަނަކަން ދެއްކުމުން، މިހާރު އޭނާގެ ސަރުކާރާ ދެކޮޅަށްވެސް ގިނަ ބަޔަކު ދަނީ ފާޑު ކިޔަމުންނެވެ.
ދެ ގައުމުގެ ކަނޑުގެ ސިފައިން ފުށުއަރާ ސަރަހައްދެއްގައި މި ގޮތަށް ފޯރި މަރަމުން ދިއުމުން ހަމަނުޖެހުމަކަށް މަގުފަހި ވެދާނެތީ މުހައްލިލުން ބިރުވެރިކަން ފާޅު ކުރެއެވެ.
