ޗައިނާގެ މަތިންދާ ބޯޓުތައް މެލޭޝިއާގެ ވައިގެ ސަރަހައްދަށް ވަނުމުން މެލޭޝިއާ ރުޅިގަދަ ވެއްޖެއެވެ. ޗައިނާއިން މެލޭޝިއާގެ ބޯރނިއޯ ޖަޒީރާގެ ވައިގެ ސަރަހައްދަށް ވަދެފައިވާ މައްސަލާގައި މެލޭޝިއާއިން ވަނީ ޗައިނާ ބޯޓްތައް ފައްސާލަން ވަގުތުން އަސްކަރީ ބޯޓްތައް ފޮނުވާފައެވެ.
މެލޭޝިއާގެ ފޮރިން މިނިސްޓަރ ހިޝާމުއްދީން ޙުސެއިން ވިދާޅުވީ ޗައިނާއަކީ ރަހުމަތްތެރި ގައުމެކެވެ. އެކަމަކު އެއްވެސް ގައުމަކުން މެލޭޝިއާގެ ސިޔާދަތަށް އަރައިގަންނާކަށް ފުރުސަތެއް ނުދޭނެ ކަމަށެވެ.
ބޯރނިއޯއަށް ވަން ޗައިނާގެ މަތިންދާ ބޯޓްތަކާ އެއަރޓްރެފިކް ކޮންޓްރޯލް ޓަވަރުން ގުޅުމަށް މަސައްކަތް ކުރުމުން ޗައިނާ ބޯޓުތަކުން އިޖާބަ ދީފައެއް ނުވެއެވެ.
މެލޭޝިއާއިން ވަނީ މި މައްސަލާގައި މެލޭޝިއާއިން ނުރުހިފައިވާކަން ޗައިނާ ސަފީރު ހާޒިރު ކޮށް އަންގާފައެވެ.
ކޭއެލްގައި ހުންނަ ޗައިނާ އެމްބަސީން ބުނެފައި ވަނީ ޗައިނާއިން މެލޭޝިއާ "ކައިރިން" މަތިންދާ ބޯޓްތައް ދުއްވާފައި ވާނެ ކަމަށެވެ. އަދި ޗައިނާ ބޯޓްތައް ދުއްވާފައި ވަނީ ބައިނަލްއަގްވާމީ ސަރަހައްދުގައި ކަމަށާއި އެއްވެސް ގައުމެއްގެ ސަރަހައްދަށް ޗައިނާ ބޯޓްތަކުން ވަދެފައި ނުވާނެ ކަމުގައި ޗައިނާ އެމްބަސީން ބުންޏެވެ.
ޗައިނާއިން ދަނީ ދެކުނު ޗައިނާ ކަނޑުގެ ސަރަހައްދުގައި ހުރިހައި ގައުމަކަށްހެން ދަތިކޮށް، ދިފާއީ ހާލަތު ވަޒަން ކުރަމުންނެވެ. ވިއެޓްނާމާއި ޖަޕާނާއި ފިލިޕީންސްގެ ސަރަހައްދުން ޗައިނާގެ މަނަވަރުތައް ދުއްވުމާއި ދެކުނު ކޮރެއާ ސަރަހައްދުން ދާއަޅައިގެން މަސްހިފުމަށް މަސްވެރިންގެ މިލީޝިއާއަށް ހިތްވަރު ދިނުމާއި އަދި މެލޭޝިއާއި އިންޑޮނޭޝިއާގެ ސަރަހައްދަށް ވަނުންފަދަ އަމަލުތައް ހިންގަމުންނެވެ.
މިދިޔަ އަހަރުވެސް ޗައިނާގެ މަނަވަރުތަކުން މެލޭޝިއާގެ އީއީޒެޑް ހިމެނޭ ކަނޑުގެ ސަރަހައްދުގައި ތެޔޮ ހޯދުމަށް މަސައްކަތް ކުރަމުން ދިޔަ ބަޔަކަށް ދަތިކޮށް ގަނާކުރުމުގެ މަސައްކަތް އެއްމަސް ދުވަހަށް ކުރިއަށް ގެންދިޔައެވެ. އެންމެ ފަހުން އެމެރިކާގެ މަނަވަރުތަކުން އެސަރަހައްދުގައި ބާރު ދެއްކުމުން ޗައިނާ ފޭއަށް ދިޔައީއެވެ.
