ތަރައްގީ ވަމުން އަންނަ ބޮޑެތި އިގްތިސާދުތަކުގެ ޖަމުއިއްޔާ ބްރިކްސްގެ ޚާރިޖީ ވަޒިރުންގެ ވާޗުއަލް ބައްދަލުވުމެއް ބާވައިފިއެވެ. ބްރިކްސްގައި ހިމެނެނީ، ބްރަޒިލްއާއި ރަޝިޔާއާއި އިންޑިއާއާއި ޗައިނާއާއި ސައުތު އެފްރިކާ އެވެ.
ބްރިކްސްގެ ޚާރިޖީ ވަޒިރުންގެ ބައްދަލުވުމުގައި ކޮވިޑް19ގެ ވަބާއާ ގައުމުތަކުން ކުރިމަތިލުމަށްޓަކައި ވެކްސިން ލިބުމުގެ މުހިންމު ކަމާ ބެހޭ ގޮތުން ވާހަކަ ދެއްކެވިއެވެ. މި ބޭފުޅުން ވަނީ ވެކްސިން ހެޔޮ އަގުގައި ލިބޭ ގޮތަށް ވަގުތީ ގޮތުން ވެކްސިންގެ ފިކުރީ ހައްގު ދޫކޮށްލުމަށް އިންޑިއާއާއި ދެކުނު އެފްރިކާއިން ދުނިޔޭގެ ވިޔަފާރި ޖަމުއިއްޔާއަށް ހުށަހަޅާފައިވާ ހުށަހެޅުމަށް ތާއީދު ކުރައްވާފައެވެ. އަދި ހުރިހައި ގައުމަކަށްވެސް ވެކްސިން ލިބޭގޮތަށް ގައުމުތަކުން އަމިއްލައަށް ވެކްސިން އުފެއްދުމަށް ފުރުސަތު ދިނުމަށްވެސް ބާރުއެޅުއްވިއެވެ.
ބްރިކްސްގެ މި ބައްދަލުވުމަކީ މި ޖަމާއަތުގެ މި ދައުރުގެ ރިއާސަތު ބަލަހައްޓާ އިންޑިއާގެ އެދުމަކަށް ބާއްވާފައިވާ ބައްދަލުވުމެކެވެ. ޗައިނާގެ ޚާރިޖީ ވަޒީރުވެސް ބައިވެރިވެ ވަޑައިގަތް މި ބައްދަލުވުމުގައި އިންޑިއާގެ ޚާރިޖީ ވަޒީރު ވަނީ ގައުމުތަކުގެ އިސްތިގްލާލަށް އިޙުތިރާމް ކުރުމަށް ބާރުއަޅުއްވައި ވާހަކަ ދައްކަވާފައެވެ. ދެން އޮތް ހަތަރު ގައުމުންވެސް އިންޑިއާގެ ހުށަހެޅުމަށް ތާއީދުކުރިއެވެ.
މީގެ އިތުރުން އިންޑިއާއިން ވަނީ ޓެރަރިޒަމާ ދެކޮޅަށް މަސައްކަތް ކުރުމަށްޓަކައި ވަށާޖެހޭފަދަ ބައިނަލްއަގްވާމީ އެއްބަސްވުމަކަށް ގައުމުތަކުން އެއްބަސްވުމާ ބެހޭ ގޮތުން ވާހަކަ ދައްކާފައެވެ. އަދި މިއަހަރުގެ ތެރޭގައި ބްރިކްސްގެ ގައުމުތަކުގެ ޓެރަރިޒަމްއާ ބެހޭ މަސްއޫލުވެރިން އެފަދަ ވަށާޖެހޭ ޓެރަރިޒަމާ ދެކޮޅު ފްރޭންވަރކެއް ނިންމުމަށް ވެސް އެއްބަސްވެ ވަޑައިގަތެވެ.
ބްރިކްސްގެ ޚާރިޖީ ވަޒީރުން ވަނީ އަފްޣާނިސްތާންގައި ހިނގަމުންދާ ހަމަނުޖެހުންތަކާ ބެހޭގޮތުން ވާހަކަ ދައްކަވައި އަފްޣާނިސްތާންގައި ސުލްހަ ގާއިމް ކުރުމަށް ބާރުއަޅުއްވާފައެވެ.
ބްރިކްސްގައި އިންޑިއާއާއި ޗައިނާގެ ޚާރިޖީ ވަޒިރުން ބައިވެރިވެ ވަޑައިގަތް އިރު ލަދާކްގައި އިންޑިއާ ސިފައިންނާއި ޗައިނާ ސިފައިން އަދިވެސް ތިބީ ކުރިމަތި ލުމެއްގައެވެ.
ބްރިކްސްއަކީ ދުނިޔޭގެ އާބާދީގެ 41 އިންސައްތަ ތަމްސީލު ކުތރާ ޖަމާއަތެކެވެ. އަދި ދުނިޔޭގެ ޖީޑީޕީގެ 24 އިންސައްތައާއި ދުނިޔޭގެ ވިޔަފާރީގެ 16 އިންސައްތަ މި ގައުމުތަކުން ހިއްސާ ކުރެއެވެ.
