އިންސާނީ ހައްގުތަކާ ބެހޭ އދގެ ކައުންސިލްގައި، ފަލަސްތީންގެ ސަރަހައްދުގައި ބައިނަލްއަގްވާމީ ހިއުމަނިޓޭރިއަން ލޯ ހިންގުމަށް ގޮވާލާ ގަރާރަށް ވޯޓް ލީއިރު އިންޑިއާއިން ވަކިކޮޅަކަށް ވޯޓު ނުލައި ހިމޭނުން އިން މައްސަލަ ފަލަސްތީނުގެ ޚާރިޖީ ވަޒީރު ވަނީ އިންޑިއާގެ ޚާރިޖީ ވަޒީރުގެ ސަމާލުކަމަށް ގެންނަވާފައެވެ.
އިންޑިއާގެ ސުލޫކުން ނުތަނަވަސްވެފައިވާ ފަލަސްތީނުގެ ޚާރިޖީ ވަޒީރު ރިޔާޟުލް މާލިކީ ވަނީ ރަސްމީ ސިޓީއަކުން މިމައްސަލަ އިންޑިއާގެ ޚާރިޖީ ވަޒީރު އެސް ޖަޔަޝަންކަރަށް ދަންނަވާފައެވެ.
ފަލަސްތީންގެ އިންސާނީ ހައްގުތަކާ ބެހޭ ގޮތުން ބަހުސްކުރި މި ސެޝަންގައި އިންޑިއާއިން ކަން ކުރި ގޮތާ މެދު ހިތްހަމަ ނުޖެހިގެން ފަލަސްތީނުން ފޮނުވި ސިޓީގެ ކޮޕީއެއް ފެނިފައިވާކަމަށް ވިއޮން ނިއުސްއިން ވަނީ ބުނެފައެވެ. މިސިޓީގައި ބުނެފައި ވަނީ އިންޑިއާއިން އަމަލު ކުރިގޮތުން ފަލަސްތީނުގެ މީހުންގެ ހައްގުތައް ލިބުމުގައި މުހިންމު މަސައްކަތެއް ކުރުމުގެ ފުރުސަތު އިންޑިއާއަށް ގެއްލިގެން ދިޔައީ ކަމަށެވެ.
އިންސާނީ ހައްގުތަކާ ބެހޭ އދގެ އިދާރާގެ ޖެނީވާ ހެޑްކުއަރޓާޒްގައި އޮތް ބައްދަލުވުމުގައި 47 ގައުމު ބައިވެރިވި ޖަލްސާގައި 24 ވޯޓުން ފާސްވި ގަރާރުގައި ވަނީ ބައިނަލްއަގްވާމީ އިންސާނީ ހައްގުތަކާ ބެހޭ ގާނޫނާއި އިންޓަރނޭޝަނަލް ހިއުމަނިޓޭރިއަން ގާނޫނު އިރުމަތީ ގުދުސްއާއި ފަލަސްތީންގެ ސަރަހައްދުގައި ތަންފީޒު ކުރަން ގޮވާލާފައެވެ.
އިންޑިއާގެ ކަނާތުފިޔައިގެ ބީޖޭޕީ ވެރިކަމަށް އައި ފަހުން ނިއުދިއްލީން ވަނީ އިޒްރޭލާ ގާތް ގުޅުމެއް ބާއްވައި ފަލަސްތީނާ ދުރުހެލި ވުމުގެ ސިޔާސަތެއް ގެންގުޅެން ފަށާފައެވެ. އިންޑިއާއިން ކަޝްމީރު މައްސަލާގައި ޓެރަރިޒަމްގެ ވާހަކަ ދައްކާއިރު ފަލަސްތީނު ސަރަހައްދުގެ ހައްގުތައް ހަނދާން ނައްތާލާފައިވާ ކަން ފާހަގަ ވެއެވެ.
މާލިކީ އިންޑިއާގެ ޚާރިޖީ ވަޒީރަށް ސިޓީ ފޮނުއްވާފައި ވަނީ އިންޑިއާއިން ވޯޓްގައި ބައިވެރި ނުވިތާ ތިން ދުވަސްފަހުންނެވެ.
