އީޔޫގެ ޑިޖިޓަލް ކޮވިޑް 19 ސެޓިފިކެޓަކީ ވެކްސިން ފުރިހަމަކޮށްފައި، ނައްސި ނަތީޖާ އެއް ނުވަތަ ކޮވިޑް ބަލިން ރަނގަޅުވެފައިވާ ކަމުގެ ރަސްމީ ލިޔުމެއް ހުށައެޅުމުން ދޫކުރާ ސެޓިފިކެޓެކެވެ. އީޔޫގެ މެންބަރު ނޫން ގައުމުތަކުގެ ދަތުރުވެރީންނަށްވެސް މި ސެޓިފިކިޓް ދޫކުރެވޭނެއެވެ. އެއީ އީޔޫގެ ކޮންމެ ގައުމަކަށްވެސް މި ސެޓްފިކެޓް ދޫކުރުމާއި ނުކުރުމުގެ އިޚުތިޔާރު ލިބިފައިވާތީއެވެ.
އަންގާރަ ދުވަހު އީޔޫގެ ކޮމިޝަނުން ނެރުނު ނޫސްބަޔާނުގައި ވާގޮތުން އީޔޫގެ 7 ގައުމުކަމުގައިވާ ބަލްގޭރިޔާ، ޗެޗްނިޔާ، ޑެންމާކް، ޖަރުމަނުވިލާތް، ގްރީސް، ކްރޮއޭޝިޔާ އަދި ޕޮލޭންޑުން ވަނީ އީޔޫ ގައުމުތަކުގެ ތެރޭގައި ދަތުތުކުރުމަށް މި ސެޓްފިކްޓް ދޫކޮށްފައެވެ.
އަދި ޖުލައި މަހު 1 އިން ފެށިގެން އީޔޫގެ ހުރިހާ ގައުމުތަކުންވެސް މިސެޓިފިކެޓް ދޫކުރާނެކަމަށް ވެއެވެ. އީޔޫ ކޮމިޝަނުން އަންގާރަ ދުވަހު ހާމަކުރެއްވި ގޮތުގައި މިއީ ހިލޭ ދޫކުރާ ރައްކާތެރި ސެޓިފިކެޓެކެވެ. މި ސެޓިފިކެޓް ޑިޖިޓަލްކޮށް، އަދި ކަރުދާހުގައިވެސް ލިބެން ހުންނާނެއެވެ.
އީޔޫގެ ހެލްތް ކޮމިޝަނާ ސްޓެލާ ކްރިއަރ ކައިޑްސް ނޫސް ބަޔާނުގައި ހާމަކުރެއްވި ގޮތުގައި މެންބަރު ގައުމުތަކުން ސެޓިފިކެޓް ދޫކުރާނެ ގޮތާއި ޗެކް ކުރާނެ ގައުމީ ނިޒާމު ކުރިއަށް އޮތް ހަފުތާގައި ނިންމުމަކީ، ބޯމަތި ވަމުން އަންނަ ޗުއްޓީ މޫސުމަށް ވަރަށް މުހިންމު ކަމެކެވެ. ސްޓެލާ މިހެން ވިދާޅުވީ ކުރިއަށް އޮތް ހޫނު މޫސުމުގައި ގައުމުތަކުގެ ސަލާމަތާއި އިތުބާރާއެކު ދަތުރުރުކުރުމަކީ ވަރަށް ގިނަ ރައްޔިތުން ބޭނުންވާނެ ކަމަކަށް ވާތީއެވެ. އެހެން ކަމުން އީޔޫ ޑިޖިޓަލް ސެޓިފިކެޓަކީ މި ދަތުރުވެރިންނަށް ވަރަށް މުހިންމު ލިޔުމަކަށް ވާނެއެވެ.
