ޝިންޖިއާންގައި ޗައިނާއިން މުސްލިމުންގެ މޫނު ދަނެގަނެ، އެމީހުންނާ މެދު ތަފާތު ކުރާކަމަށް އެމެރިކާއިން ތުހުމަތު ކުރަމުން ދަނިކޮށް، އެ ޓެކްނޮލޮޖީ ނިއުޔޯރކް ފުލުހުން ބޭނުންކުރާކަން ބޭޒާރުކޮށްލައިފިއެވެ. އެމްނެސްޓީ އިންޓަރނޭޝަނަލް އިން ބުނިގޮތުގައި ނިއުޔޯކްގެ ފަސް އަވަށުގެ ތެރޭން ތިން އަވަށެއްގައި ނިއުޔޯކް ޕޮލިސް ޑިޕާޓްމަންޓުން ވަނީ މޫނު ދަނެގަންނަ ޒާތުގެ ކެމެރާތައް ހަރުކޮށްގެން މީހުން ދަނެގަތުމަށް މަސައްކަތް ކޮށްފައެވެ.
ނިއުޔޯކް ފުލުހުން މި ކެމެރާތައް ބޭނުން ކުރަނީ، މިހާރުވެސް ނަސްލީ ތަފާތު ކުރުމުގެ ކަންކަން ހިންގަމުން ގެންދާ ދަރިކޮޅުތަކާ ދެކޮޅަށް ކަމަށްވެސް އެމްނެސްޓީން ބުނެއެވެ.
މެއި މަހުން ފެށިގެން އެމްނެސްޓީން ވަނީ ހިލޭސާބަހަށް މަސައްކަތް ކުރާން ޝައުގުވެރިކަން ފާޅުކުރި ބަޔަކު މެދުވެރިކޮށް ގޫގްލް މެޕުން ފާހަގަކޮށްގެން ނިއުޔޯކްގެ މަގުތަކުގައި ހުރި ކެމެރާތައް ބަލާފައެވެ. ގާތްގަނޑަކަށް 15280 ކެމެރާ ފާހަގަ ވެފައިވާ ކަމަށް އެމްނެސްޓީން ބުނެއެވެ.
ފުލުހުން ފާރަލަމުންދާ އަވަށްތަކަކީ، މެންހެޓަންއާއި ބްރޫކްލިންއާއި ބްރޮންކްސްގައެވެ.
ބްރޫކްލިން އަކީ ކަޅު ނަސްލުގެ 54 އިންސައްތައަށް ވުރެން ގިނަ މީހުން އުޅޭ އަވަށެކެވެ. އަދި 30 އިންސައްތަ ހިސްޕަނިކް ދަރިކޮޅުގެ މީހުން އުޅޭ އަވަށެކެވެ. މި އަވަށުގައިވެސް 577 މޫނު ދަނެގަންނަ ކެމެރާ ހަރުކޮށްފައި ވެއެވެ.
ނިއުޔޯކް ފުލުހުންނަކީ ނަސްލީ ތަފާތު ކުރުމުގެ ފަޟީހަތްތަކެއްގައި ބޭޒާރުވެފައިވާ ބައެކެވެ. ފުލުހުންގެ މަސައްކަތް އިސްލާހު ކުރުމަށް ގިނަ ފިއްތުންތައް ނިއުޔޯކް ފުލުހުންނަށް ކުރިމަތި ވެފައި ވެއެވެ.
