ސްރީލަންކާގެ ބޭރު ބަނދަރުގައި އަޑިއަށް ދިޔަ ބޯޓާއެކު އެ ބޯޓްގެ ސިއްރުތައް ވެސް ޣައަރަގް ވެއްޖެއެވެ. އެމްވީ އެކްސްޕްރެސް ޕާރލް އަޑިޔަށް ދިޔައިރު ބޯޓާ ބެހޭ ގޮތުންނާއި ސްރީލަންކާ ސަރުކާރާ ދެކޮޅަށް ބޯޓާ ބެހޭ މަޢްލޫމާތު ހޯދުމަށް އެދި ލަންކާ ސްޕްރީމް ކޯޓަށް، ތިމާވެށްޓަށް މަސައްކަތް ކުރާ ޖަމާއަތެއް ވަނީ ދައުވާއެއް ވައްދާފައެވެ. މި ބޯޓާ ދެކޮޅަށް ސްރީލަންކާއިން ވެސް ޖިނާއީ ތަހްގީގެއް ފަށާފައި ވެއެވެ.
މި ބޯޓް އަޑިއަށް ދިޔައީ ބޯޓްގެ އަލަތު ދަތުރުގައެވެ. ބޯޓްގައި "ނުރައްކާތެރި ކާގޯ" ހުރިކަމަށް ލިސްޓް ކޮށްފައި ވެއެވެ.
މި ބޯޓް ބަނދެފައި އޮތީ ޗައިނާގެ ޝިޕްޔާޑަކުންނެވެ.
ބޯޓް ގައި އަލިފާން ރޯވި އިރު ބޯޓް ބަނދެދިން ކުންފުނީގެ ފަސް މުވައްޒަފުން ބޯޓުގައި ދަތުރު ކުރަމުން ދިޔައެވެ. އަލިފާން ގަނޑު ކޮންޓްރޯލް ނުވުމުން މި ފަސް މީހުން ވަނީ ކޮލޮމްބޯއަށް ފައިބާފައެވެ.
ބޯޓް އަޑިއަށް ދިޔައިރު، ބޯޓްގެ މުދާ ސަލާމަތް ކުރުމަށް ނުވަތަ ކައިރިއަށް ފީނުމަށް ބޯޓްގެ ކައްޕި ހުއްދައެއް ނުދިނެވެ.
އެމްވީ އެކްސްޕްރެސް ޕާރލް އަޑިއަށް ދިޔުމާ ގުޅިގެން ސްރީލަންކާގެ ނިގަމްބޯ ސަރަހައްދުގައި އައްސޭރިފަށަށާއި މަސްމަހާމެއްސަށް ގެއްލުން ލިބިފައި ވެއެވެ.
ސްރީލަންކާ ކައިރިން ކެމިކަލްއާއި އަލިފާނާ ގުޅުން ހުރި ހާދިސާތައް މިހާރު ވަނީ އާންމު ކަމަކަށް ވެފައެވެ. މީގެ ކުރިން ރޭޑިއޯ އެކްޓީވް (ނިއުކްލިއަ) މާއްދާއެއް ހިފައިގެން ޗައިނާއަށް ދަތުރު ކުރި ބޯޓެއްވެސް ސްރީލަންކާއަށް ވަންނަން އުޅުނެވެ. މި ބޯޓްގައި ނިއުކްލިއަރއާ ގުޅޭ މާއްދާއެއް ހުރިކަމަކަށް ކުރިން ނުބުނެއެވެ. ނަމަވެސް ފަހުން އެކަން ބޭޒާރުވުމާ ގުޅިގެން ލަންކާއިން ބޭރު ބަނދަރު ސަރަހައްދުން ބޯޓް ބޭރު ކޮށްލީއެވެ.
އެމްވީ އެކްސްޕްރެސް ޕާރލްއާ މެދުވެސް އުފެދޭ ސުއާލަކީ ބޯޓްގައި ނުރައްކާތެރި ކެމިކަލް ކަމަށް ލޭބަލް ކޮށްފައި ހުރީ ކޮން މުދަލެއް ބާވައެވެ؟ އަލިފާން ރޯވި ކަމަށް ބުނެފައި ވަނީ ނައިޓްރިކް އެސިޑްގައި އާއި ޕްލާސްޓިކްގެ ރޯމެޓީރިއަލް އެއްގައެވެ. ޕްލާސްޓިކްގެ ރޯމެޓީރިއަލް އަކީ އިންޑިއާގެ ގްޖުރާތުގެ ބަންދަރަކުން ބަރާކޮށްގެން ގެންދިޔަ އެއްޗެކެވެ.
ޗައިނާގެ ޗޯހާންޝޮންގހޮންގ އިންޓަރނޭޝަނަލް ޝިޕްޔާޑުން ބޯޓް ބަނދެ ނިންމުމަށްފަހު އެ ކުންފުނީގެ ބަޔަކު ބޯޓްގައި ބައިތިއްބާފައި ވަނީ ކީއްވެގެން ބާވައެވެ. އަދި މިމީހުން އަވަސް އަވަހަށް ކޮލޮމްބޯ އަށް ފޭބުމަށްފަހު ދެން ވީ ކިހިނެއް ހެއްޔެވެ؟
މިސުއާލުތަކަށް ޖަވާބެއް އަދި ނެތެވެ!
