ޖުލައި މަހުގެ 10 ވަނަ ދުވަހުގެ ރޭ މާބަނޑު މީހަކު ވިއްސުމުގެ ތެރޭގައި ބަނޑުގައި އޮތް ދަރިފުޅުގެ ބޯ ވަކިވެފައިވަނީ ވިއްސުމުގެ ތެރޭގައި ކަމަށް އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނެފި އެވެ.
އެ ހޮސްޕިޓަލުން މިހެން ބުނީ އެ ހޮސްޕިޓަލުގައި 10 ޖުލައި 2021 ދުވަހުގެ ރޭ މާބަނޑު މީހަކު ވިއްސުމުގެ ތެރޭގައި ބަނޑުގައި އޮތް ދަރިފުޅުގެ ބޯ ވަކިވެފައިވާ ކަމަށް ބައެއް ނޫސްތަކުގައި ލިޔެފައިވާ ޚަބަރާއި ގުޅިގެން ނެރުނު ބަޔާނެއްގަ އެވެ.
އެ ބަޔާނުގައި ބުނެފައިވަނީ އެ ހޮސްޕިޓަލަށް ދެއްކިއިރުވެސް ބަނޑަށް ނިޔާވެފައިވާ ކުއްޖެއް، ވިއްސުމުގެ ތެރޭގައި ބޯ ވަކިވެފައިވާ ކަމަށެވެ. އަދި މިހެން ދިމާވެފައިވަނީ މައިމީހާގެ ޞިއްޙީ މައްސަލަތަކެއް ހުރުމުންނާއި ދަރިފުޅު ބަނޑަށް ނިޔާވެފައިވާތާ ގިނައިރުތަކެއް ވެފައިވާތީ ކަމަށް ވެސް ބުންޏެވެ.
އައިޖީއެމްއެޗުން ބުނީ ބަލިމީހުންގެ ތަފްޞީލީ ޞިއްޙީ މަޢުލޫމާތު ހޮސްޕިޓަލުގެ ފަރާތުން ހާމަކުރުމަކީ ޤާނޫނީ ކުށަކަށް ވުމުގެ އިތުރުން މި މައްސަލައާ ބެހޭ މަޢުލޫމާތު، އެ ނޫސް ބަޔާނުގައި ހިމަނާފައިވާ މިންވަރަށް ފިޔަވައި އިތުރަށް ހާމަނުކުރުމަށް އާއިލާގެ ފަރާތުން މި ހޮސްޕިޓަލުގައި ވަނީ އެދިފައި ކަމަށެވެ.
ވީމާ، އާއިލާގެ ހުއްދައާ އެކު މި ނޫސްބަޔާނުގައި ހާމަކޮށްފައިވާ މަޢުލޫމާތުގެ އިތުރުން އިތުރު މަޢުލޫމާތެއް ހާމަކުރެވެން ނެތްކަމަށް އެ ހޮސްޕިޓަލުގެ ބަޔާނުގައި ވަނީ ބުނެފަ އެވެ.
މީގެ އިތުރުން މިވާހަކަ ނޫސްތަކާއި ސޯޝަލް މީޑިއާގައި ނުދެއްކުމަކީ އާއިލާގެ އެދުމެއް ކަމަށް އާއިލާގެ ފަރާތުން ހޮސްޕިޓަލުގެ ޑޮކްޓަރުންނާއި ބައްދަލުކޮށް ނިޔާވެފައިވާ ކުއްޖާގެ ބައްޕަ ބުނެފައިވާ ކަަމަށް ވެސް ބަޔާނުގައި ވެއެވެ. އަދި މި ހިތާމަވެރި ދަނޑިވަޅުގައި އާއިލާގެ އެދުމަށް އިޙްތިރާމް ކުރުމަށް މީޑިއާ އާއި އެހެނިހެން ފަރާތްތަކަށް އައިޖީއެމްއެޗުން ވަނީ ގޮވާލާފަ އެވެ.
