ﷲ ތަޢާލާގެ ޛިކުރު ކުރުމަކީ އެންމެ މަތިވެރި އަޅުކަމުގެތެރެއިން ހިމެނޭ ކަމެކެވެ. އެހެނީ އެ އިލާހު ވަނީ އެކަމަށް އަޅުގަނޑުމެންނަށް އަމުރުކުރައްވާފައެވެ. މިކަން އަންގަވައި އެކަލާނގެ ވަޙީކުރެއްވި ބަސްފުޅެއްގައި ވެއެވެ. فَاذْكُرُونِي أَذْكُرْكُمْ وَاشْكُرُوا لِي وَلَا تَكْفُرُونِ ﴿١٥٢﴾ (سورة البقرة). މާނައީ: [ފަހެ، ތިޔަބައިމީހުން ތިމަން އިލާހަށް ޛިކުރު ކުރާށެވެ. އޭރުން ތިމަން އިލާހު ތިޔަބައިމީހުންގެ މަތިން ހަނދުމަކުރައްވާހުށީމެވެ.]
އަދި ހަމަ އެހެންމެ އިސްލާމްދީނުގެ އެންމެ މުހިއްމު އެއްރުކުން ކަމުގައިވާ ނަމާދުވެސް ގުޅިފައިވަނީ ﷲ ގެ ޛިކުރާއެވެ. ﷲ ތަޢާލާގެ ވަޙީ ބަސްފުޅުގައިވެއެވެ. وَأَقِمِ الصَّلَاةَ لِذِكْرِي ﴿١٤﴾(سورة طه). މާނައީ: [އަދި ތިމަންރަސްކަލާނގެ ހަނދުމަކުރެއްވުމަށްޓަކައި، ނަމާދު قائم ކުރައްވާށެވެ!]
ﷲ ތަޢާލާގެ ޛިކުރުން ޣާފިލުވެގަތުމަކީ ވަރަށް ނުރައްކާތެރިކަމެކެވެ. އެއީ އުނދަގޫ ދިރިއުޅުމަކަށް މަގުފަހިވެގެން ހިނގައިދާނެކަމެކެވެ. އެކަލާނގެ ވަޙީކުރައްވާފައި ވެއެވެ. وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ ﴿١٢٤﴾ (سورة طه). މާނައީ: [އަދި ތިމަންރަސްކަލާނގެ ޛިކުރަށް ފުރަގަސްދީފި މީހާ (ދަންނާށެވެ!) ފަހެ، ހަމަކަށަވަރުން، އެމީހަކަށް އޮތީ، ދަތި ދިރިއުޅުމެކެވެ. އަދި قيامة ދުވަހުން އެމީހަކު ކަނުމީހެއްގެ ގޮތުގައި محشر އަށް ފޮނުއްވާހުށީމެވެ.] އަދި އެހެން އާޔަތެއްގައި އެކަލާނގެ ވަޙީ ކުރައްވާފައި ވެއެވެ. وَمَن يَعْشُ عَن ذِكْرِ الرَّحْمَٰنِ نُقَيِّضْ لَهُ شَيْطَانًا فَهُوَ لَهُ قَرِينٌ ﴿٣٦﴾ (سورة الزخرف). މާނައީ: [رحمن ވަންތަ ރަސްކަލާނގެ ހަނދުމަކުރުމަށް ކަނުވެގަންނަ މީހާއަށް ތިމަންރަސްކަލާނގެ شيطان އެއް ފާކުރައްވާހުށީމެވެ. ފަހެ، شيطان އާ އޭނާޔާ ވަކިނުވެ، އެކުގައި އުޅޭނެތެވެ.]
ޛިކުރުގެތެރެއިން އެންމެ މަތިވެރި ޛިކުރަކީ ތައުޙީދުގެ ކަލިމައެވެ. جَابِر رَضِيَ الله عَنْهُ ވިދާޅުވިއެވެ. ނަބިއްޔާ صَلَّى الله عَلَيْهِ وَسَلَّمَ ޙަދީޘްކުރެއްވި އަޑު ތިމަންކަލޭގެފަނު އެއްސެވީމެވެ. "أَفْضَلُ الذِّكْرِ لَا إِلَهَ إِلَّا اللهُ". (أخرجه الترمذي). މާނައީ: {އެންމެ މަތިވެރި ޛިކުރަކީ "لَا إِلَهَ إِلَّا اللهُ"އެވެ.}
އަދި ހަމަ އެހެންމެ ކީރިތި ޤުރްއާން ކިޔެވުން ހިމެނެނީވެސް އެންމެ މަތިވެރި ޛިކުރުގެ ތެރޭގައެވެ. ﷲ ތަޢާލާގެ ވަޙީ ބަސްފުޅުގައި ވެއެވެ. إِنَّ الَّذِينَ يَتْلُونَ كِتَابَ اللَّهِ وَأَقَامُوا الصَّلَاةَ وَأَنفَقُوا مِمَّا رَزَقْنَاهُمْ سِرًّا وَعَلَانِيَةً يَرْجُونَ تِجَارَةً لَّن تَبُورَ ﴿٢٩﴾ (سورة فاطر). މާނައީ: [ހަމަށަވަރުން، ﷲ ގެފޮތް ކިޔަވައި، އަދި ނަމާދު قائم ކޮށް، ތިމަންރަސްކަލާނގެ އެއުރެންނަށް ދެއްވި ތަކެތިން ސިއްރާއި ފާޅުގައި ހޭދަކޮށްއުޅޭ މީހުންނީ، ގެއްލުން ނުވާނެ ވިޔަފާރިޔަކަށް އެދޭ ބަޔެކެވެ.]
އަދި މީގެ އިތުރުންވެސް ﷲ އަށް ތަސްބީޙަ އާއި ތަޙްމީދު ކިޔުމާއި، ހެނދުނާއި ހަވީރުގެ ޛިކުރުތަކަކީ ގިނަގުނަ ޘަވާބާއި ދަރުމަ ހުރި ކަންކަމެވެ.
މާތް ނަބިއްޔާ صَلَّى الله عَلَيْهِ وَسَلَّمَ ގެ އަރިހަށް މީހަކު އައިސް ދެންނެވިއެވެ. އޭ ﷲ ގެ ރަސޫލާއެވެ! އެންމެ މާތް ޢަމަލަކީ ކޮބައިތޯއެވެ؟ ޙަދީޘްކުރެއްވިއެވެ. [އެއީ ﷲ ގެ ޛިކުރުން ތިބާގެ ދޫ ތެމިގެންވާ ޙާލު، ތިބާ ދުނިޔެއިން ވަކިވެގެން ދިއުމެވެ.]
އަޅުގަނޑުގެ ދުޢާއަކީ އަޅުގަނޑުމެންނަކީ ﷲ ތަޢާލާގެ ޛިކުރު ގިނަގިނައިން ކުރާ، ﷲ ހަނދުމަކޮށް އެ އިލާހަށް ގިނަގިނައިން ކުއްތަންވާ އަޅުންގެ ތެރެއިން ލެއްވުމެވެ.
(ނިމުނީ)
