ރާއްޖޭގެ ފަތުރުވެރިކަމަށް 50 އަހަރު ފުރޭ މުނާޞަބަތާއި ގުޅުވައިގެން ބާއްވާ ޔޮޓް ރެލީ "ސަވާދީއްތަ ދަތުރު" ހއ. ހޯރަފުށިން ފަށައިފިއެވެ.
ރާއްޖޭގެ ފަތުރުވެރިކަމަށް 50 އަހަރު ފުރޭ މުނާޞަބަތާއި ގުޅުވައިގެން މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން އެމް.އައި.ޓީ.ޑީ.ސީއާއި މިނިސްޓްރީ އޮފް އާރޓްސް، ކަލްޗަރ އެންޑް ހެރިޓޭޖް އަދި އެމް.އެން.ޑީ.އެފްގެ ސިވިކް ކުންފުންޏާއި ގުޅިގެން ބާއްވާ މި ހަރަކާތުގައި، 12 ޔޮޓާއިއެކު ރާއްޖޭގެ ފަސް އަތޮޅެއްގެ 14 ރަށަކަށް ދަތުރު ކުރުމަށް ވަނީ ހަމަޖެހިފައެވެ.
އެގޮތުން ހއ އަތޮޅުގެ އުލިގަން، ހޯރަފުށި، މަތީރަށް، ބިލެއްދޫތިލަ، ގަލަންދޫ، އިހަވަންދޫ، ބާރަށް ، އުތީމް ހިމެނެއެވެ، އަދި ހދ ނޮޅިވަރަންފަރު، ށ އަތޮޅުން ފުނަދޫ، ފަރުކޮޅު، ނަލަންދޫ ހިމެނެއެވެ. އަދި ނ އަތޮޅުން ދަތުރު ކުރަން ހަމަޖެހިފައިވަނީ ލަންދޫ އާއި މަނަދޫ އަށެވެ. އަދި ރާއްޖޭގައި ލިޔެލާ ޖެހުމުގެ މަސައްކަތުގައި ފާހަގަ ކޮށްލެވޭ ބ.ތުޅާދޫވެސް ހިމެނެއެވެ.
ސަވާދީއްތަ ދަތުރު ފެއްޓެވުމަށްޓަކައި ހޯރަފުށީގައި ވަނީ ހާއްސަ ރަސްމިއްޔާތެއް ބައްވާފައެވެ. މިރަސްމިއްޔާތުގައި ޓުއަރިޒަމް މިނިސްޓަރ ޑޮކްޓަރ ޢަބްދުﷲ މަޢުސޫމް އާއި މިނިސްޓްރ އޮފް އާރޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން އާއި މިނިސްޓަރ އޮފް ހަޔަރ އެޑިޔުކޭޝަން ޑޮކްޓަރް އިބްރާހީމް ޙަސަން އާއި އެމް.އައި،ޓީ،ޑީ،ސީގެ އެމް.ޑީ މުޙައްމަދު ރާއިދު އަދި އ.ދ.ގެ ރެޒިޑެންޓް ކޯޑިނޭޓަރ ކެތެރިން ހެޒްވެލް ބައިވެރިވެ ވަޑައިގެންނެވިއެވެ.
