ޗައިނާއިން ބަންދުކޮށްގެން ގެންގުޅޭ އުއިގޫރު މުސްލިމުންނާ ބެހޭ މުހިންމު ޑޮކިއުމެންޓެއް ފްރާންސް ޕްރެސް ނޫސްއެޖެންސީއަށް ފާއްދާލައިފިއެވެ. ފްރާންސްގެ ޕްރެސް އެޖެންސީން ބުނީ ހައްޔަރުކޮށްފައިވާ އުއިގޫރު މުސްލިމުންގެ އެތައް ހާސް މީހުންގެ ނަންތައް ހިމެނޭ ޑޭޓާބޭސްއެއް ލީކުވެފައިވާ ކަމަށާއި މި ޑޮކިއުމެންޓްގައި ޗައިނާގެ ކަމާބެހޭ ފަރާތްތަކުން ހުޅަނގު އުތުރު ސަރަހައްދުގައި ބަންދުކޮށްފައިވާ މީހުންނާ ބެހޭ މުހިންމު މައުލޫމާތުތައް ހިމެނޭ ކަމަށެވެ.
ލީކުވި ލިސްޓުގައި ކޮންމެ ގައިދީއެއްގެ ނަމާއި، އުފަންދުވަހާއި، ގައުމިއްޔަތާއި، އައިޑެންޓިފިކޭޝަން ނަންބަރާއި، ދައުވާއާއި، ދިރިއުޅުނު އެޑްރެހާއި، ހުކުމް އަދި ޖަލު ހުކުމްގެ މުއްދަތު ހިމެނެއެވެ.
އެޖެންސް ފްރާންސް ޕްރެސް އިން ބުނީ މި ލިސްޓުގެ ސައްހަކަން މިނިވަންކަމާއެކު އަދި ޔަގީން ކުރަން މަސައްކަތް ކުރެވިފައި ނުވާ ކަމަށެވެ. ނަމަވެސް ޗައިނާއިން ބޭރުގައި ދިރިއުޅޭ 5 އުއިގޫރު މީހުންނާ އިންޓަވިއު ކުރި ކަމަށާއި މީގައި ހުރި ބައެއް ނަންތައް އެފަރާތްތަކަށްވެސް އެނގޭ ކަމަށެވެ.
ޗައިނާއިން ބުނާ ގޮތުގައި ޢުއިގޫރު މީހުން ހައްޔަރުކޮށްފައިވަނީ ޓެރަރިޒަމާ ދެކޮޅށް ކުރާ މަސައްކަތުގެ ތެރޭން ކަމަށެވެ. އިދިކޮޅު ފަރާތްތަކުން ބުނަނީ، ޗައިނާއިން ޑިޓެންޝަން ސެންޓަރުތަކާއި ޖަލުތަކާއި ކޭމްޕްތަކުގެ ސިއްރު ނެޓްވޯކެއްގައި މިލިއަނަކަށް ވުރެ ގިނަ މުސްލިމު އުއިގޫރުންނާއި ގިނަ އެހެން މުސްލިމް ބައިމަދު ދަރިކޮޅުގެ މީހުން ބަންދުކޮށް ގެން ގެންގުޅޭ ކަމަށެވެ.
މިމީހުން ބަންދުގައި ތިބޭ އިރު ގާތްތިމާގެ މީހުންނާ މުއާމަލާތް ކުރުމަށް ނުވަތަ އެމީހުންގެ ހާލަތާ ބެހޭ ގޮތުން ފުލުހުންނާ ސުވާލު ކުރުމަށް ހުރަސް އަޅާކަމަށްވެސް ބުނެއެވެ.
ލީކް ވެފައިވާ ޑޭޓާބޭސްގައި މިހާރު ދިރިއުޅެމުން އަންނަ ނޫރު ސެމެންގުލް އަބްދުއްރަޝީދުގެ އާއިލީ މީޙުންވެސް ހިމެނެއެވެ. އެމީހުންނަކީ މީގެ ފަސް އަހަރު ކުރިން އާއިލާއާ ގުޅުން ކެނޑި ވީނުވީއެއް ނޭނގިފައިވާ ބައެކެވެ.
މި ލިޔެކިޔުން ތަކުން އެނގެނީ މިމީހުން ބަންދުކޮށްފައި ވަނީ އާއިލާގެ ގެއާ 600 ކިލޯމީޓަރު ދުރުގައި އޮންނަ އަކްސޫގެ ބޭރުގައި ހުންނަ ޖަލެއްގައެވެ. އަދި އެނާގެ ކޮއްކޮގެ މައްޗަށް 15 އަހަރުގެ ޖަލު ހުކުމެއް އިއްވާފައިވާ ކަމަށް ދައްކައެވެ. އަންކާރާގައި ހުންނަ ޗައިނާގެ އެމްބަސީންވެސް ވަނީ މި އަދަބު ކަށަވަރުކޮށްދީފައެވެ.
ކުރިން ޗައިނާއިން އިއުލާން ނުކުރާ އެތައް ބައެއް ތިބި ތަންވެސް މި ޑޭޓާބޭސްއިން ހޯދައި ގަނެވިފައި ވެއެވެ. އެގޮތުން ޝިންޖިއާންގެ ކުނާޝެހިރް ކައުންޓީގެ 10،000 އަށް ވުރެ ގިނަ އުއިގޫރު މުސްލިމުން ޖަލުތަކުގައި ބަންދުކޮށްފައިވެއެވެ.
އެޖެންސް ފްރާންސް ޕްރެސްއިން ވާހަކަ ދެއްކި ބައެއް މީހުން ވަނީ ބަންދުކޮށްފައިވާ މީހުންގެ ލިސްޓުގައި ހިމެނޭ 7 ރަށެއްގެ މީހެއްގެ ނަން ދެނެގަނެ، އެ އެންމެންނަކީވެސް ކުދި ވިޔަފާރިވެރިން ނުވަތަ ދަނޑުވެރިކަމުގެ މަސައްކަތްތެރިން ކަމަށާއި، ޓެރަރިޒަމާ އެއްވެސް ގުޅުމެއް އޮތް ބައެއް ނޫންކަމަށް ބުނެފައެވެ.
ބައެއް މީހުންނަށް އެ ލިސްޓަކީ އަހަރުތަކެއް ފަހުން އެމީހުންގެ ގާތްތިމާގެ މީހުންނާ ބެހޭ ގޮތުން ލިބުނު ފުރަތަމަ މައުލޫމާތެވެ. އެ ލިސްޓުން ހާމަވާ ގޮތުގައި ކޮންމެ ރަށަކުންނާއި އަވަށަކުން އެތައް ސަތޭކަ ބަޔަކު ހައްޔަރުކޮށްފައިވެއެވެ. ގިނަ މައްސަލަތަކުގައި އެއް އާއިލާއަކުން ގިނަ އަދަދެއްގެ ބަޔަކު ހައްޔަރުކޮށްފައިވާ ކަންވެސް އެނގެއެވެ. ދެވަނަ ކަމަށް ބެލެވޭ ޑޭޓާ ލިސްޓުގައި 2008 އާއި 2015 އާ ދެމެދު ހައްޔަރުކުރި 18،000 އުއިގޫރުންގެ ނަންތައް ހިމަނާފައި ވެއެވެ. މިއިން ގިނައީ ކަޝްގަރާއި އަކްސޫ ސަރަހައްދުގެ މީހުންނެވެ.
