ލުބުނާނާއި އިޒްރޭލާ ދެމެދު ހަމަލަތައް ހުއްޓާލުމަށް އެއްބަސްވުމަކަށް އައިސްފިއެވެ. އިޒްރޭލު ކެބިނެޓުން ވަނީ އެއްބަސްވުމަށް ރުހުން ދީފައެވެ. ފުލުހުންގެ ހަރުކަށި ތާކިހާ ވަޒީރު ބެން ގްވީރު ބުނެފައި ވަނީ މިއީ އިޒްރޭލަށް ކަޅު ދުވަހެއް ކަމަށެވެ. ލުބުނާނުން ވަނީ މަރުހަބާ ކިޔާފައެވެ. އަދި ދެކުނު ލުބުނާންގެ ރައްޔިތުން ވަނީ އެމީހުންގެ އަވަށްތަކަށް މިސްރާބު ޖަހާފައެވެ.
މިއެއްބަސްވުމަށް އަމަލު ކުރަން ފަށާފައި ވަނީ ބުދަ ދުވަހުގެ ފަތިހު ލުބުނާން ގަޑިން 4 ޖެހިތަނާ (މާލޭގަޑިން ހެނދުނު 9.30 ) ގައެވެ.
ހިފާފައިވާ ފަލަސްޠީނުގެ އުތުރުގައި އުޅޭ ޔަހޫދީން ބުނެފައި ވަނީ މިއީ ހިޒްބުﷲއަށް ދީލާލުމެއް ކަމަށެވެ. އަދި އިޒްރޭލުން ހުދު ދިދަ ނެގީ ކަމަށެވެ.
ބައެއް ފަރާތްތަކުން ވަނީ އެއީ 12 މާއްދާގެ އެއްބަސްވުމެއް ކަމަށް ބުނެފައެވެ. އެކަމަކު މި ނޫހަށް ލިބިފައި ވަނީ 13 މާއްދާގެ އެއްބަސްވުމެކެވެ.
ލުބުނާނުން ވަނީ 4 ވަނަ ނަންބަރުގައި އޮތް ދިފާއުވުމުގެ ހައްގަށް އިއުތިރާޒް ކޮށްފައެވެ. ލުބުނާނުން ބުނެފައި ވަނީ، އެއީ އޮވެގެން ވާނެ އިބާރާތެއް ނޫން ކަމަށެވެ. އަދި އެއީ ބައިނަލްއަޤްވާމީ ގާނޫނުގައި ލުބުނާނަށް ލިބިގެންވާ ހައްގއް ކަމަށެވެ.
9 ވަނަ ނަންބަރުގައި އޮތް ކޮމިޓީގައި އެމެރިކާއާއި އިނގިރޭސިން ހިމެނުމަށް ހުށަހެޅުމުން ލުބުނާނުން އެކަމަށްވެސް އިއުތިރާޒް ކުރިއެވެ. ބެލެވޭ ގޮތުގައި އެ ބައި ވަނީ އުނިކޮށްފައެވެ.
މި އެއްބަސްވުމާ ބެހޭ ގޮތުން ޙިޒުބުﷲ އިން ބަޔާނެއް ނެރެފައެއް ނުވެއެވެ. ނަމަވެސް މި ކަމާ ގުޅޭ ވާހަކަތައް ކުރިއަށް ދިޔައިރު، ޙިޒުބުގެ ސެކްރެޓަރީ ޖެނެރަލް ނައީމް ޤާސިމް ވިދާޅުވީ ޙިޒުބުﷲގެ ފަރާތުން ވާހަކަ ދައްކާނީ ޕާލަމެންޓްގެ ރައީސް ނަބީހް ބައްރީ ކަމަށެވެ. ބައްރީއަކީ ޝީޢީ އަމަލް ޕާޓީގެ ލީޑަރެވެ. އޭނާއާއެކު މަޝްވަރާގައި އުޅުއްވީ ލުބުނާންގެ ވަގުތީ ބޮޑު ވަޒީރު ނަޖީބް މީޤާތީއެވެ.
މީޑިއާއިން ރިޕޯޓުކޮށްފައި ވަނީ 13 މާއްދާގެ އެއްބަސްވުމެކެވެ. ނަމަވެސް މިއީ އެންމެ ފަހުގެ އެއްބަސްވުން ކަމެއް ނުވަތަ ސައްޙަ އެއްބަސްވުން ކަމެއް ޔަގީނެއް ނޫނެވެ.
އެއްބަސްވުން ދިރާސާކޮށްފައި "ހަލި އޮންލައިން" ނޫހުން ތަރުޖަމާ ކޮށްފައިވާ ގޮތަށް ތިރީގައި މިވަނީއެވެ.
1. ލުބުނާނުގެ ފަސްގަނޑުގައި ހިޒްބުالله އާއި ހަތިޔާރު އެޅި އެހެން އެއްވެސް ޖަމާއަތްތަކުން އިޒްރޭލާ ދެކޮޅަށް އެއްވެސް ޙަމަލާއެއް ނުދޭނެއެވެ.
2. އިޒްރޭލުން ލުބުނާނުގައި އެއްގަމާއި ވައިގެ މަގުން އަދި ކަނޑުން ވެސް ލުބުނާނުގެ އަމާޒުތަކާ ދެކޮޅަށް އެއްވެސް ޙަމަލާއެއްދީ އަސްކަރީ އޮޕަރޭޝަނެއް ނުހިންގާނެއެވެ.
3. އިޒްރޭލާއި ލުބުނާނުން އދ.ގެ ސަލާމަތީ މަޖިލީހުގެ ގަރާރު ނަންބަރު 1701 ގެ މުހިންމުކަން ދެނެގަނެއެވެ.
4. ބައިނަލްއަޤްވާމީ މުޢާހަދާތަކުގެ އިމުގެ ތެރެއިން އަމިއްލައަށް ދިފާއުވުމުގެ ޙައްޤު ދެފަރާތަށްވެސް ލިބިގެންވެއެވެ.
5. ލުބުނާނުގެ ދެކުނުގައި ހަތިޔާރު ގެންގުޅުން ނުވަތަ ހަތޔާރު ބޭނުންކުރުމުގެ ބާރާއި ހުއްދަ އޮންނާނީ ހަމައެކަނި ލުބުނާނުގެ ސިފައިންނަށެވެ.
6. ލުބުނާނަށް ހަތިޔާރު ނުވަތަ ހަތިޔާރާ ގުޅުންހުރި ތަކެތި ވިއްކުމާއި، ފޯރުކޮށްދިނުމާއި ނުވަތަ އުފެއްދުމުގެ ހުރިހާ ކަމެއް އޮންނާނީ ލުބުނާނުގެ ސަރުކާރުގެ ބެލުމާއި ކޮންޓްރޯލްގެ ދަށުގައެވެ.
7. ހަތިޔާރާއި އެއާ ގުޅުންހުރި ތަކެތި އުފައްދާ ގަވާއިދާ ޚިލާފު ހުރިހާ ތަންތަނެއް ރޫޅާލާނެއެވެ.
8. އަސްކަރީ ހުރިހާ އިންފްރާސްޓްރަކްޗަރ އަކާއި ސައިޓްތައް ރޫޅާލައި، މި އެއްބަސްވުމަށް ނުފެތޭ ގަވާއިދާ ހިލާފު ހަތިޔާރު އަތުލައި ގަނެވޭނެއެވެ.
9. މިއެއްބަސްވުން ތަންފީޒުކުރުން ސުޕަވައިޒްކޮށް އެހީތެރިވުމަށް އިޒްރޭލާއި ލުބުނާނުން ޤަބޫލުކުރެވޭ ކޮމިޓީއެއް އެކުލަވާލެވޭނެއެވެ.
10. މި އެއްބަސްވުމުގެ ވާޖިބުތަކާ ޚިލާފުވެދާނެ އެއްވެސް ކަމެއް ހިނގައިފިނަމަ އިޒްރޭލާއި ލުބުނާނުން ކޮމިޓީއަށާއި ޔުނިފިލް (ލުބުނާނުގައި ހުންނަ އދ.ގެ ވަގުތީ ފައުޖު) އަށް ރިޕޯޓްކުރާނެއެވެ.
11. ލުބުނާނުގެ ސިފައިން، އިޒްރޭލާ ލުބުނާނާ ދެމެދުގެ ހުރިހާ ސަރަހައްދާއި ދެ ފަރާތަށް ހުރަސްކުރާން އޮންނަ ތަންތަނާއި، ދެކުނު ސަރަހައްދު ކަނޑައަޅާ ރޮނގުގައި ސިފައިން ބައިތިއްބާ ޕްލޭނާ އެއްގޮތަށް ބައިތިއްބާނެއެވެ.
12. އިޒްރޭލުން 60 ދުވަހުގެ މުއްދަތެއްގެ ތެރޭގައި ދެކުނުން ބްލޫ ލައިނާ ދިމާލަށް މަޑުމަޑުން ސިފައިން އަނބުރާ ގެންދާނެއެވެ.
13. އިޒްރޭލާއި ލުބުނާންގެ ބޯޑަރުތައް ކަނޑައެޅުމުގައި އެއްބަސްވުމަކަށް އައުމަށްޓަކައި އިޒްރޭލާއި ލުބުނާނާއި ދެމެދު ނުސީދާ މަޝްވަރާތަކެއް ކުރުމަށް އެމެރިކާ މަގުފަހިކޮށްދޭނެއެވެ.
