އަންހެން ކުދިން ޚިތާނު ކުރުމާ ދެކޮޅަށް މީހުން ހޭލުންތެރި ކުރުމަށް މަސައްކަތް ކުރި ކެންޔާގެ ނަރުހަކަށް ދެލައްކަ ފަންސާސް ހާސް އެމެރިކާ ޑޮލަރުގެ އިނާމެއް ލިބިއްޖެއެވެ.
ކެންޔާގެ ރަށް ފުށުގެ ހިސާބެއްގައި އުޅޭ އަނާ ކިބްލީ ޑޫބާގެ އެކުވެރިން ބުނާ ގޮތުގައި އޭނާއަކީ ޖަމާއަތަށް ކޮށްދެވެން އޮތް ކޮންމެ ޚިދުމަތެއް ކޮށްދޭން ތައްޔާރަށް ހުންނަ އަންހެނެކެވެ. އަދި އޭނާއަކީ މީހުން އުނގެނުމަށް ލޯބި ޖެއްސުމަށް ސްކޫލެއްވެސް ހިންގާ މީހެކެވެ.
ނަރުސް މީހާއަށް އެވޯޑް ލިބުމާ ގުޅިގެން ބުނީ މި އެވޯޑަކީ މުޅި ކެންޔާއަށް އޭނާގެ ސްކޫލު ފުޅާކުރުމަށް އެހީތެރިވެދޭނެ އެވޯޑެއް ކަމަށެވެ
އޭނާ ހިންގާ ސްކޫލުގައި ހެނދުނު ކުދިންނަށް ކިޔަވައި ދިނުމަށްފަހު މެންދުރު ފަހުގެ ގަޑީގައި ލިޔަން ދަތުމުގެ ކިލާސްތައް މައިންބަފައިންނަށް ހިންގައެވެ. ބައެއް ފަހަރަށް މެންދުރުގަޑީގައި ދެ އުމުރު ފުރައަށް އެއްކޮށް ހޯމްވޯކު ހެދުމުގައިވެސް އެހީތެރި ވެދެއެވެ.
މި ނަރުސް ކުއްޖާ ބުނާ ގޮތުން އޭނާއަކީ އޭނާގެ އަވަށުން ޔުނިވާސިޓީ ތައުލީމު ހާސިލްކުރި ހަމައެކަނި އަންހެން ކުއްޖާއެވެ. އަދި އޭނާއަކީ، 19 ކުދިންގެ އާއިލާގައި ޕްރައިމަރީ ސްކޫލަށް ފަހު މައްޗަށް ތައުލީމު އުނގެނެން ފުރުސަތު ލިބުނު ހަމައެކަނި އަންހެން ކުއްޖާ ކަމަށެވެ.
މިހާރު އުމުރުން 31 އަހަރު ވެފައިވާ މި ކަނބުލޭގެއަކީ ތިމާވެށީގެ ރޮނގުން މާސްޓާޒް ހަދާފައި ހުރި މީހެކެވެ.
ޑުބާއީން ދީފައިވާ މިއިނާމަށް އޭނާ ހޮވިފާ ވަނީ 24 ހާސް މީހުންނާ ވާދަ ކޮށްގެންނެވެ. އޭނާއަކީ ގަދަކަމުން 14 އަހަރުގައި މީހަކާ ދެވަން އުޅެނިކޮށް ސަލާމަތްވި ޒުވާނެކެވެ.
ކެންޔާގައި އަންހެން ކުދިން ޚިތާނު ކުރުމަކީ ގާނޫނީ ގޮތުން މަނާ ކަމެކެވެ. ނަމަވެސް 91 ޕަސެންޓް މީހުން ސަގާފަތާ އެއްގޮތަށް އެކަން ކުރެއެވެ.
