އއ. މާޅޮހުގެ ދެކުނުން ބަންޑުން ޖަހާލި ލޯންޗުން ގެއްލިގެން ހޯދަމުންދިޔަ އުމުރުން 28 އަހަރުގެ މުޙައްމަދު މިންހާޖު، ހޯދުމަށް އެމްއެންޑީއެފް ކޯސްޓްގާޑުން ކުރިއަށްގެންދިޔަ ސާޗް އެންޑް ރެސްކިޔު އޮޕަރޭޝަން ހުއްޓާލައިފި ކަމަށް ވިދާޅުވެއްޖެއެވެ.
އެމްއެންޑީއެފުން ވިދާޅުވީ މިންހާޖު ހޯދުމަށް ކޯސްޓްގާޑުން ކުރިއަށްގެންދިޔަ ސާޗް އެންޑް ރެސްކިޔު އޮޕަރޭޝަނުގައި އިއްޔެ ވެސް ވަނީ 300 ސްކޮޔަރ ނޯޓިކަލް މޭލުގެ ސަރަޙައްދެއް ބަލައިފައި ކަމަށެވެ.
އޭނާ ހޯދުމުގެ އޮޕަރޭޝަން ވަނީ ހަތަރު ދުވަހަށް ކުރިއަށް ގެންގޮސްފައެވެ. މި އޮޕަރޭޝަނުގައި، ކަނޑުމަގުން އެމްއެންޑީއެފް ކޯސްޓްގާޑު ޝިޕް ޝަހީދު ޢަލީއާއި، ކޯސްޓްގާޑު ފާސްޓް އިންޓަސެޕްޓަރ ކުރާފްޓް "ހަކުރާ"، 665 ސްކޮޔަރ ނޯޓިކަލް މޭލުގެ ސަރަހައްދެއް ބަލާފައިވެއެވެ. އެމްއެންޑީއެފް ޑޯނިއަރ ފްލައިޓްގައި ވަނީ ވައިގެމަގުން 2000 ސްކޮޔަރ ނޯޓިކަލް މޭލުގެ ސަރަހައްދެއް ބަލާފައި ކަމަށް ވެސް އެމްއެންޑީއެފުން ވިދާޅުވެފައިވެއެވެ. މި އޮޕަރޭޝަން ހުއްޓާލީ އޭނާ ނުފެނުނު ކަމަށް ބަލާފައި ކަމަށް ވެދާނެއެވެ.
