ދިވެހި ޤައުމުގައި އޮތް އެއްބައިވަންތަކަމާއި، އެއްބައެއްވަންތަކަން ދަމަހައްޓައި، ޤައުމަށް ދިމާވެދާނެ ނުރައްކާތަކުން ސަލަމާތްވުމަށް އެންމެން ގުޅިގެން މަސައްކަތްކުރުމަށް އެންމެހާ ދިވެހީންނަށް އެމްއާރުއެމްއިން ގޮވާލަައިފިއެވެ. އެ ޕާޓީން މިކަމަށް ގޮވާލައިފައިވަަނީ ނަސްރުގެ ދުވަަހުގެ ތަހުނިޔާ ފޮނުވުމަށް ނެރެފައިވާ ބަޔާނެއްގައެވެ.
އެޕާޓީން ބުނެފައިވަނީ ނަސްރުގެ ދުވަހަކީ ޤައުމީ ފެންވަރުގައި ފާހަގަ ކުރަން ޖެހޭ ދުވަހެއް ކަމަށެވެ. އެދުވަހު ޝަހީދުވި ހިތްވަރުގަދަ ދިވެހި އަބްޠާލުންނަށް މާތްﷲ ހެޔޮރަހްމަތްލެއްވުމަށް އެދި ދުއާކުރާ ކަމަށާއި ދިވެހި ޤައުމުގެ މިނިވަންކަމާއި ސިޔާދަތު އަބަދައްޓަކައި ރައްކާތެރި ކޮށްދެއްވުމަށް ވެސް ދުއާކޮށްފައިވެއެވެ.
"ނަސްރުގެ ދުވަހުގެ ތަހްނިޔާ ދިވެހި އެންމެހައި އަޚުންނާއި އުޚްތުންނަށް އަރިސްކުރަމެވެ. ދިވެހިންގެ ބަޔަކު ބޭރުގެ ކުލީ ސިފައިންގެ ބަޔަކާއެކު، ދިވެހިރާއްޖޭގެ ވެރިރަށް މާލެ އަށް އަރައި، މިޤައުމުގެ މިނިވަންކަމާއި ސިޔާދަތު ނަގާލުމަށް ދިން އުދުވާނީ ޙަމަލާއިން ދިވެހިރާއްޖެ ސަލާމަތްކުރައްވައި، ނަޞްރު ދެއްވިކަމަށްޓަކައި، އަރަހުށި ހުސް ޠާހިރުވަންތަ ﷲ ސުބްޙާނަހޫ ވަތަޢާލާއަށް ޙަމްދާއި ޝުކުރު ދަންނަވަމެވެ. އަދި މިއަހަރަގެ ފަޚުރުވެރި ނަސްރުގެ ދުވަހުގެ ހެޔޮއެދުމާއި ތަހްނިޔާ ސަލާމަތީ ބާރުތަކުގެ އެންމެހައި ބޭފުޅުންނަށާއި، ދިވެހި އެންމެހައި ލޮބުވެތި ރައްޔިތުންނަށް އަރިސްކުރަމެވެ. ނަސްރުގެ ދުވަސް ފާހަގަ ކުރުމުގެ ތެރެއިން އަޅުގަނޑުމެން ހަނދާން އާކުރަން މިޖެހެނީ، ދިވެހީންނަށް ދެން އެފަދަ ދުވަހެއް މެދުވެރި ނުވުމުގެ މަތިވެރި އުންމީދު އާކުރަމުންނެވެ."
1988 ވަނަ އަހަރުގެ ނޮވެމްބަރ 3 ގައި ރާއްޖެއަށް ކުރިމަތިވި ބަޣާވާތަކީ ދިވެހީންގެ މަދުބަޔަކާއި، ސްރީލަންކާގެ ޓެރަރިސްޓް ޖަމާޢަތަކާ އެކުވެގެން ދިން ނުރައްކާތެރި ޓެރެރިސްޓް ހަމަލާއެކެވެ. އެދުވަހުގެ ހަމަލާއަކީ ދިވެހި ތާރީޚުގައި މިހާތަނަށް ފާހަގަކުރެވޭ އެންމެ ބާރުގަދަ އެންމެ ބިރުވެރި އަދި އެންމެ ނުރައްކާތެރި ޙަމަލާ ކަމަށް ވެސް އެމްއާރުއެމްއިން ބުނެފައިވެއެވެ.
އެދުވަހު 18 ވަރަކަށް ގަޑިއިރުވަންދެން ރާއްޖޭގެ ވެރިރަށް މާލޭގެ މައްޗަށް އަތްގަދަކޮށްގެން ތިބީ ޤައުމުގެ އަދާވާތްތެރި ދުޝްމަނުން ކަމަށާއި އެބައިމީހުން ހަނގުރާމަ ކުރަމުން ގެންދިޔައީ މުޅި ޤައުމު އެބައިމީހުންގެ އަތްމައްޗަށް ގެންދިއުމަށް ކަމަށް ވެސް ބުނެފައިވެއެވެ. އެދުވަހުގެ ޙަމަލާގައި 19 ދިވެހި ދަރީން ޝަހީދުވިއެވެ.
ރާއްޖެއަށް އެދުވަހު ކުރިމަތިވި ޢުދުވާނީ ޙަމަލާއާ ގުޅިގެން ދުނިޔޭގެ އެތައް ޤައުމެއް އޮތީ ދިވެހި ޤައުމާއި ރައްޔިތުން ހިމާޔަތްކޮށްދިނުމަށް ތައްޔާރަށް ކަމަށް ވެސް ބުނެފައިވެއެވެ. "ދިވެހި ސަރުކާރު އެހީއަށް އެދުނު ޤައުމުތަކުގެ ތެރެއިން އެންމެ އަވަހަށް ރާއްޖެއަށް އެހީ ފޯރުކޮށްދިނީ ރަހުމަތްތެރި އިންޑިއާ އިންނެވެ. މި ފުރުޞަތުގައިވެސް އިންޑިއާގެ ސަރުކާރާއި ރައްޔިތުންނަށް، ދިވެހި ރައްޔިތުންގެ ނަމުގައި އިޚުލާސްތެރި ޝުކުރު ދަންނަވަމެވެ. އަދި ހަމައެހެންމެ، އެދުވަހު ވަރަށް ގިނަ އިރުތަކެއް ވަންދެން ދިވެހިރާއްޖޭގެ ހިތްވަރުގަދަ ސިފައިން ޓެރަރިސްޓުންނާއި ހަގުރާމަކުރަމުން ގެންދިޔައެވެ. ދުޝްމިނުންގެ ބަޑީގެ ވަޒަންތަކުން ދިވެހި ސިފައިންގެ 8 މީހަކު ޝަހީދުވެ އެތައްބަޔަކު ޒަޚަމްވެފައިވެއެވެ. ނަމަވެސް ދިވެހި ސިފައިން ދެމިތިބީ އެބައިމީހުންގެ ޤައުމީ ވާޖިބު އަދާކުރުންމަތީ ތެދުވެރިކަމާއި އަމާނާތްތެރިކަމާއެކުގައެވެ."
