ރައީސުލްޖުމުހޫއްރީއްޔާގެ ނައިބު ފައިސަލް ނަސީމް އައްޑޫ ފްލައިން ސްކޫލުގެ ދަރިވަރުންނާއި، ބައްދަލުކޮށް ދަރިވަރުންނަށް ދިމާވެފައިވާ ދަތިކަން އޮޅުން ފިލުވައިފިއެވެ.
ނައިބު ރައީސް ފްލައިން ސްކޫލުގެ ކުދިންނާއި، ބައްދަލުކޮށްފައިވަނީ، އައްޑޫ އަށާއި ފުވައްމުލަކަށް ކުރެއްވި ދަތުރުފުޅުގެ ތެރެއިން، ފުވައްމުލަކު ސިޓީ އަށް ވަޑައިގަތުމަށް ދިޔަ މަގުމަތީ، ގަން އެއާޕޯޓުންނެވެ. މިބައްދަލުވުމުގައި ނައިބު ރައީސް ވަނީ އެކުދިންނަށް ކުރިމަތި ވެފައިވާ ގޮން ޖެހުންތަށް އޮޅުން ފިލުވާފައެވެ.
އައްޑޫ ފްލައިން ސްކޫލުގެ ދަރިވަރުންނާއި އެކު ބޭއްވި ބައްދަލުވުމުގައި، ދަރިވަރުން ވަނީ އެކުދިންނަށް މިހާތަނަށް ދިމާވެފައިވާ މައްސަލަތައް ސަރުކާރުގެ އިދާރާތަކަށް ފޮނުވާފައިވާ ކަމަށް ބުނެފައެވެ. އަދި މި ޝަކުވާތަކުގެ އިތުރުން، މިހާރު ކުދިންނަށް ދިމާވެފައިވާ ޑޮލަރުގެ މައްސަލަ ވެސް ހުށަހަޅުއްވާފައިވާނެ ކަމަށް ދަރިވަރުން ވަނީ ބުނެފައެވެ.
އެގޮތުން ކުރީގައި ކުދިންނަށް އުދުހުމުގައި ދިމާވި ދަތިކަން ހުރެގެން ކޯސް ނުނިންމި އޮތް ނަމަވެސް، މިހާރު ކިޔަވަމުންދާ ކުދިންނަށްވެސް ކޯހަށް ފައިސާ ދެއްކުމުގައި ޑޮލަރު ނުލިބޭ މައްސަލަ ތިލަ ވެފައިވެއެވެ. އާންމު ގޮތެއްގައި ބޭންކް އޮފް މޯލްޑިވްސް މެދުވެރިކޮށް ކުދިން ޑޮލަރުން ކޯސްފީ ދެއްކި ނަމަވެސް، ބޭންކުން މިވަގުތު ޑޮލަރު ދޫކުރަމުން ނުދާތީވެ، ސްކޫލުން ކުދިންނަށް އަންގާފައިވަނީ، މާކެޓު ރޭޓުން ޑޮލަރަށް ދިވެހި ރުފިޔާ ނެގިދާނެ ކަމަށެވެ. ނަމަވެސް މާކެޓު ރޭޓުގެ ގޮތުގައި، ސްކޫލުން ނަގަން ބުނާ އަގު ބޮޑުކަން ކުދިން ފާހަގަ ކުރެއެވެ.
މިބައްދަލުވުމުގައި ނައިބް ރައީސް ފައިސަލް ނަސީމް، ވަނީ މި މައްސަލަ ވަރަށް ގާތުން ބައްލަވަމުންދާ ކަމަށް ވިދާޅުވެފައެވެ. އަދި އެ މަނިކުފާނު ވަނީ ސަރުކާރުގެ ފަރާތުން ފްލައިން ސްކޫލްގެ ދަރިވަރުންނަށް އެހީތެރިވެދެވޭނެ ގޮތްތަކެއް ބައްލަވައިދެއްވުމަށް ފިނޭންސް މިނިސްޓަރުގެ އަރިހުން އެދިވަޑައިގަންނަވާފައި ކަމަށް ވިދާޅުވިއެވެ. މީގެ ތެރޭގައި ޑޮލަރުގެ މައްސަލަވެސް ހިމެނޭ ކަމަށް ވިދާޅުވިއެވެ.
މި ބައްދަލުވުމުގައި ނައިބު ރައީސް އަރިހުގައި ފިނޭންސް މިނިސްޓަރ އިބްރާހިމް އަމީރު ވަނީ ބައިވެރިވެ ވަޑައިގަންނަވާފައެވެ. މިނިސްޓަރ އަމީރު ވަނީ ކޯސްފީގެ މައްސަލަ ހައްލު ކޮށްދިނުމަށް މިނިސްޓްރީގެ ފަރާތުން ކުރެވެން ހުރި ކަންކަން ކުރައްވާނެ ކަމަށް ވިދާޅުވެފައެވެ.
