މުއްސަނދި މުސްލިމުން ރިއަލް އެސްޓޭޓްގައި އިންވެސްޓް ކުރަން އެންމެ މަގްބޫލު މަންޒަލަކީ މައްކާއާއި މަދީނާ ކަމަށް ސާވޭއަކުން ދައްކައިފި އެވެ.
ލަންޑަންގައި އޮފީސް ހުންނަ ނައިޓް ފްރެންކް ރިއަލް އެސްޓޭޓް ކޮންސަލްޓެންސީ ކުންފުނިން ކުރިއަށް ގެންދިޔަ ސާވޭއިން ދައްކާ ގޮތުގައި މުއްސަނދި މުސްލިމުންގެ 84 ޕަސެންޓް މީހުން އިންވެސްޓް ކުރަން ބޭނުންވަނީ މައްކާ ނުވަތަ މަދީނާގައެވެ.
އޭގެ ތެރެއިން 82 ޕަސެންޓް މީހުން ބުނަނީ ސައުދީ އަރަބިއްޔާގެ އެހެން ސިޓީތަކުން ގެއާއި ހަރު މުދާ ގަތުމުގެ ފުރުސަތު ބޮޑު ކަމުން އެތަންތަނަށްވެސް ޝައުގުވެރިވާ ކަމަށެވެ.
އަލް އިޤްތިސާދިޔާ އިން ރިޕޯޓްކޮށްފައިވާ ގޮތުގައި ގްލޯބަލް ރިއަލް އެސްޓޭޓް ކޮންސަލްޓެންސީ އެންޑް އެސްޓޭޓް އެޖެންސީން ވެސް ވަނީ 09 ގައުމެއްގެ އެންމެ މުއްސަނދި ގިންތީގެ 500 އަށް ވުރެ ގިނަ މުސްލިމުންނާ މި ސާވޭގައި ވާހަކަ ދައްކާފަ އެވެ.
މިއީ 1 މިލިއަން ޑޮލަރު އިންވެސްޓް ކުރަން ޖެހިލުން ނުވާ މީހުންނެވެ. އެމީހުން ބުނެފައި ވަނީ އެމީހުން މައްކާ މަދީނާގައި އިންވެސްޓް ކުރަން ބޭނުންވަނީ ދީނީ ސަބަބުތަކާ ހެދިއެވެ.
