މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މަހެއްގެ އާމްދަނީ 100 މިލިއަން ރުފިޔާއަށް އިތުރުކުރުމަށް މަސައްކަތްކުރަމުންދާ ކަމަށް އެ ކުންފުނީގެ ސީއީއޯ މުހައްމަދު ވަޖީހު ވިދާޅުވެއްޖެއެވެ.
މި އަހަރު ނިމޭއިރު މި އަމާޒަށް ވާސިލުވުމަށް ކުންފުނިން މަސައްކަތްކުރަމުންދާ ކަމަށް ވަޖީހު ފާހަގަކުރެއްވިއެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި ވަޖީހު ވިދާޅުވީ، ފާއިތުވި އަހަރު ތެރޭގައި ކުންފުނީގެ ޚިދުމަތްތައް ރަނގަޅުކޮށް، ފައިދާ އިތުރުކުރުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. މީގެ ތެރޭގައި ޚިދުމަތްތައް ފަސޭހަކަމާއެކު ފޯރުކޮށްދިނުމަށް ކޮންޓެއިނަރުތަކަށް ޖާގަ އިތުރުކުރުމުގެ މަސައްކަތްތައް ހިމެނެއެވެ.
މި ބަދަލުތަކާއެކު، ކުރިން މަހެއްގެ މައްޗަށް ލިބެމުންދިޔަ އާމްދަނީ މިހާރު ވަނީ 92 މިލިއަން ރުފިޔާއަށް އިތުރުވެފައިވާކަމަށާއި ކުންފުނީގެ އަމާޒަކީ މި އަހަރު ނިމޭއިރު މަހެއްގެ އާމްދަނީ 100 މިލިއަން ރުފިޔާއަށް އިތުރުކުރުންކަމަށް ވަޖީހު ވިދާޅުވިއެވެ.
އެމްޕީއެލްއަށް މީގެ ކުރިން މަހެއްގެ މައްޗަށް ލިބެމުންދިޔައީ 60 އާއި 70 މިލިއަން ރުފިޔާއާ ދެމެދުގެ އަދަދެއްކަން ވަޖީހު ފާހަގަކުރެއްވިއެވެ. އަދި މެރިޓައިމް ދާއިރާ ފުޅާކޮށް، ރާއްޖޭގެ އިޤްތިޞާދު ކުރިއެރުވުމަކީ ސަރުކާރުން އިސްކަންދޭ ކަމެއްކަމަށްވެސް އޭނާ ވިދާޅުވިއެވެ.
ވަޖީހު އިތުރަށް ވިދާޅުވީ، އެމްޕީއެލްއިން ފަށާފައިވާ އާ ވިޔަފާރިތަކާއެކު ރާއްޖޭގެ އިޤްތިޞާދަށް ހެޔޮ ބަދަލުތަކެއް އަންނާނެ ކަމަށް އުންމީދުކުރެވޭ ކަމަށެވެ. މި ގޮތުން ބަންކަރިންގ ޚިދުމަތާއި ސީ ޓޫ އެއަރ ކާގޯގެ ޚިދުމަތް ފެށިގެން ދިއުމަކީ ކުންފުނީގެ ޚިދުމަތްތައް ފުޅާވެ، އާމްދަނީ އިތުރުވެގެން ދިޔަ ކަމެއްކަމުގައި ސީއީއޯ ވަޖީހް ފާހަގަކުރެއްވިއެވެ.
