ރާއްޖޭގެ ނޫސްވެރިއަކު އޭގެ ކުރިން ދުވަހަކުވެސް އޯޒޯން ފަށަލައާ ބެހޭ ގޮތުން ނޫހެއްގައި ނުލިޔައެވެ. އޯޒޯން ފަށަލަ، އެބަސް އެންމެ ފުރަތަމަ ބޭނުން ކުރި ނޫސްވެރިއަކީ މަރުޙޫމް ކުޑަނެވި އައްބާސް އެވެ.
މިއަދު އަލަށް ނޫސްވެރިކަމަށް ވަދެފައިވާ ފަރާތްތަކަށް ނޭނގުނު ނަމަވެސް ކުޑަނެވި އައްބާސަކީ މާދުރުނޫން މާޒީއެއްގައި ރާއްޖޭގައި ވަރަށް ދަތި ހާލުގައި ވަރަށް ގިނަ ދުވަސްވަންދެން ނޫސްވެރިކަން ކުރި ނޫސްވެރި އެކެވެ. މަރުޙޫމްގެ ފުރާނައަށް ﷲގެ ހެޔޮ ރަޙުމަތް ހުއްޓެވެ!
ނޫސްވެރިޔާ ކުޑަނެވި އައްބާސް މަތިން ހަނދާން ކޮށްލަން ޖެހެނީ އޯޒޯން ފަށަލައިގެ ވާހަކައިންނެވެ. ތިމާވެށީގެ ވާހަކަ ނިއުޔޯކުގައި ކުރީގެ ރައީސް މައުމޫނު ދެއްކެވީވެސް ކުޑަނެވި އައްބާސްގެ އޯޒޯން ވާހަކަ އާފަތިސް ނަމަކަށް ކިޔާ ނޫހެއްގައި ލިޔުނު ފަހުންނެވެ. އެއިރު އަދި ތިމާވެށީގެ ޗެމްޕިއަން އުޅުއްވީ މަގުމަތީގައި ނުލަފާ އެރުވުމުގައި ސިޔާސީ މަސައްކަތުގައެވެ.
ކޮންމެއަކަށް އައްބާސް ލިޔުނު، އުޑުގައި އުފެދިފައިވާ އޯޒޯން ބާގަނޑާ ބެހޭ ގޮތުން ސައިންސްވެރިން މިހާރު ބުނަނީ އޯޒޯން ފަށަލައިގެ އެ ބާގަނޑު މިހާރު ބެދެމުން އަންނަ ކަމަށެވެ.
ދުނިޔޭގެ ދިރުމަށް އެންމެ ބޮޑު ނުރައްކަލެއްގެ ގޮތުގައި ބެލެވުނު އޯޒޯނުގެ ލޯވަޅު 2066 ވަނަ އަހަރުގެ ނިޔަލަށް މުޅިން އެއްކޮށް ބެދިގެން ދާނެ ކަމަށް ސައިންސްވެރިން ބުނެއެވެ. އެންޓާކްޓިކާގެ މަތިން އޯޒޯން ފަށަލަ ފަސޭހަވަމުން ގޮސް 2066ގައި 1980ގެ އަހަރުތަކުގައި އޯޒޯން ފަށަލަ އޮތް މިންވަރަށް ދުޅަހެޔޮ ވާނެ ކަމަށް ބުނެއެވެ.
އޯޒޯން ފަށަލަ ރަނގަޅު ވުމަށް ބާރުއެޅިގެން ދިޔަ ކަމަކީ، މޮންޓްރިއޯލް ޕްރޮޓޮކޯލްކަމަށްވެސް ސައިންސްވެރިން ފާހަގަ ކުރެއެވެ.
އެޑިޓަރުގެ ބަޔާން:
ރާއްޖޭގެ ނޫސްވެރިކަމަށް ގިނަ ހިދުމަތްތައް ކުރައްވާފައިވާ އައްބާސް މުހައްމަދު (ކުޑަނެވި އައްބާސް) ނިޔާވީ އުމުރުން 72 އަހަރުގައި ހުޅުމާލޭ ހޮސްޕިޓަލްގައި 10/06/2014 ދުވަހު މެންދުރުގެ ވަގުތެއްގަ އެވެ.
އައްބާހަކީ ވަރަށް ގިނަ ދުވަސްތަކެއް ވަންދެން ނޫސްވެރިކަމުގައި ހިދުމަތް ކުރައްވާފައިވާ ބޭފުޅެކެވެ. އެންމެ ގިނަ ދުވަހު ނޫސްވެރިކަމުގައި މަސައްކަތް ކުރެއްވީ އާފަތިސް ނޫހުގަ އެވެ. އެ ނޫހުގެ އިތުރުން ރާއްޖޭގެ އެހެން ނޫސްތަކާއި މަޖައްލާތަކަށް އެތައްހާސް ލިޔުމެއް އައްބާސް ލިޔުއްވާފައިވެ އެވެ.އޭނާގެ ހިދުމަތް އަގުވަޒަން ކުރުމުގެ ގޮތުން ރައީސް މައުމޫން އަބުދުލްގައްޔޫމްގެ ސަރުކާރުގައި އައްބާސް އަށް އާންމު ހިދުމަތުގެ އިނާމު ވެސް ދެއްވާފައިވެ އެވެ. އައްބާސް ދުނިޔެ ދޫކުރެއްވި އިރު ދުނިޔޭގައި ހުންނެވީ އޭނާގެ އެންމެ ބޭފުޅެކެވެ.
