ޕްރިންސް ހެރީގެ ޑައިރީ ސްޕެއާ ވަނީ ފޮތް ވިއްކުމުގެ ހުރިހައި ރިކޯޑެއް މުގުރާލާފައެވެ. އިނގިރޭސިވިލާތުގައި އެންމެ ގިނައިން އެއްދުވަހު ވިކުނު ފޮތް ކަމަށް ވަނީ ހެރީ ޕޮޓާ ވާހަކަތަކެވެ. ނަމަވެސް ސްޕެއަރ ވަނީ އެ ރިކޯޑްވެސް މުގުރާލާފައެވެ. ސްޕެއަރގެ ހަތަރު ލައްކަ ކޮޕީ އިނގިރޭސިވިލާތުގައި އެއްދުވަސް މަތިން ވިއްކާފައި ވެއެވެ.
ޖެނުއަރީ 10 ވަނަ ދުވަހު ޝާއިއުކުރި ފޮތް ވަނީ އެމެރިކާގައިވެސް ރެކޯޑްތައް މުގުރާލާފައެވެ. ކުރިން އެމެރިކާގައި އެންމެ ގިނައިން ވިކުނީ ކުރިން އެމެރިކާގައި ވެރިކަން ކުރި ބަރަކް އޮބާމާގެ ފޮތެވެ. ސްޕެއަރ އަކީ ފޮތް ޝާއިއުކުރާ ޕެންގްއިން ރެންޑަމް ހައުސްގެ އެންމެ އަވަހަށް އެންމެ ގިނައިން ވިކިފައިވާ ނޮން ފިކްޝަން ފޮތް ކަމަށްވެސް ވަނީ ވެފަ އެވެ.
ދަ ހޮލީވުޑް ރިޕޯޓަރާއި ވާހަކަ ދައްކަމުން ރެންޑަމް ހައުސް ގްރޫޕްގެ ރައީސް ޖީނާ ސެންޓްރެލޯ ވިދާޅުވީ ފުރަތަމަ ދުވަހުގެ މި އާދަޔާ ހިލާފު ވިޔަފާރިއަށް ބަލާއިރު ކިޔުންތެރިން ސާފުކޮށް އެއްބަސްވަނީ ސްޕެއާ ފޮތަކީ މީހުން ކިޔަން ޑިމާންޑްކުރާ ފޮތެއް ކަމަށެވެ.
އެމެރިކާގެ ކުރީގެ ރައީސް ބަރަކް އޮބާމާގެ 2020 ވަނަ އަހަރުގެ ފޮތް "އަ ޕްރޮމިސްޑް ލޭންޑް" އެމެރިކާ އާއި ކެނެޑާގައި ފުރަތަމަ ދުވަހު 887،000 ވިއްކުނު އިރު އޭނާގެ އަނބިކަނބަލުން މިޝެލް އޮބާމާގެ މަޝްހޫރު ހަނދާނީ ފޮތް ބިކިންގް 1.4 މިލިއަން ކޮޕީ ވިއްކަން ހަފްތާއެއް ހޭދަވި އެވެ. އެއާ ޚިލާފަށް ހެރީގެ ފޮތުގެ ހަތަރު ލައްކަ ކޮޕީ ފުރަތަމަ ދުވަހު އިނގިރޭސިވިލާތުގައިވެސް ވިކުނެވެ.
