މިސްރުގެ އިގްތިސާދު ބަނގުރޫޓޫވުމާ ދިމާއަށް މިސްރާބު ޖަހައިފިއެވެ. ހަފްތާއެއް ވަންދެން މިސްރުގެ ފައިސާ ޕައުންޑްގެ އަގު ޑޮލަރުގެ ނިސްބަތުން ފެއްތެމުން ގޮސް މިހާރު، ކަޅު ބާޒާރުގައި ޑޮލަރުގެ އަގު ވަނީ ޑޮލަރެއްގެ ނިސްބަތުން 40 ޕައުންޑަށް އަރާފައެވެ. މިސްރުގެ ފައިސާގެ އަގު ވަނީ 104 ޕަސެންޓަށް ވެއްޓިފައެވެ.
މިއީ މިސްރުގެ ތާރީޚުގައިވެސް މިހާ ބޮޑުކޮށް ފައިސާގެ އަގު ވެއްޓުނު ފުރަތަމަ ފަހަރެވެ. މިސްރުގެ ޖުމްހޫރިއްޔާގެ ކުރީގެ ރައީސް ޖަމާލު އަބްދުއްނާސިރުގެ ވެރިކަމުގައި މިސްރު ޕައުންޑް އުޅުނީ ޑޮލަރުގެ ނިސްބަތުން 43 ގުރުސްގައެވެ. ގުރުސްއަކީ މިސްރުގެ ލާރިއެވެ.
ސާދާތުގެ ވެރިކަމުގައި ޑޮލަރުގެ ނިސްބަތުން ޕައުންޑް އުޅުނީ 70 ގުރުސްގައެވެ. އަދި މުބާރަކްގެ ވެރިކަން ނިމުނު އިރު 5 ޕައުންޑްގައެވެ. އަދި މުރުސީގެ ވެރިކަން ނިމުނު އިރު 6.5 ގައެވެ. ސީސީގެ ވެރިކަމުގައި 40 ޕައުންޑްގައެވެ.
މިސްރަކީ އިންޓަރނޭޝަނަލް މަނިޓަރީ ފަންޑުން އާޖެންޓީނާއަށް ފަހު އެންމެ ގިނައިން ދަރަނި ނަގާފައިވާ ގައުމެވެ. އާޖެންޓީނާއިން 56 ބިލިއަން ޑޮލަރު ނަގާފައިވާއިރު މިސްރުން ވަނީ 20 ބިލިއަން ޑޮލަރު ނަގާފައެވެ.
އަހަރުން އަހަރަށް މިސްރުގައި ތަކެތީގެ އަގު ބޮޑުވުން އުޅެނީ 24 ޕަސެންޓްގައެވެ. މިސްރުގެ ފައިސާގެ އަގުވެއްޓުމުން، ދަތުރު ފަތުރު ކުރާ ފަރާތްތަކަށް މިސްރުގައި ދިރިއުޅުން ވަނީ އަގުހެތޮވެފައެވެ.
މިސްރުގެ ފައިސާގެ އަގު ވެއްޓުމުން ގަލްފްގެ ގައުމުތަކުން ވަނީ ފައިސާގެ އަގު ކޮންޓްރޯލު ކުރުމަށް ފައިސާއަޅާފައެވެ. އަދި މިސްރުގެ ރައީސް ވަނީ ރައްޔިތުންނަށް އިގްތިސާދަށް އެހީވެދިނުމަށް ފަންޑު ފޮށްޓަށް ފައިސާ އެޅުމަށްވެސް އިލްތިމާސްކޮށްފައެވެ.
މިސްރަށް ޖެއްސުން ކުރަމުން އިޒްރޭލު މީހުން ޓުއިޓާގައި ބުނަމުން ދަނީ ސުއިސް ކެނަލް ހިންގަން އިޒްރޭލާ ހަވާލުކޮށްފިނަމަ އިޒްރޭލުން މިސްރުގެ ހުރިހައި ދަރަންޏެއް ދައްކައި ދީފާނެ ކަމަށެވެ.
