"ތިމާ އުފަންވާ ނާމާން މާހައުލުގައި އަބަދު ތާށިވެ ހުރެގެން ނުވާނެ! އަމިއްލަ ދިރިއުޅުން ރަނގަޅު ގޮތަކަށް ބަދަލު ކުރުމުގެ ބާރު ލިބިގެންވާ ކަމަށް ގަބޫލު ކުރަންވާނެ،" މިސް ޔުނިވާސް ތައިލެންޑް 2022 ދުނިޔެއަށް ދިން މެސެޖަކީ މިއީއެވެ.
71 ވަނަ މިސް ޔުނިވާސްގެ ތާޖު ހަވާލުކުރުން ހަމަޖެހިފައި ވަނީ ޖެނުއަރީ މަހުގެ 14 ވަނަ ދުވަހު މިއަދު، ލުއިޒިއާނާގެ ނިއު އޮރްލިންސް މޯރިއަލް ކޮންވެންޝަން ސެންޓަރުގަ އެވެ.
ތައިލެންޑްގެ މިސް ޔުނިވާސް 2022 ކާމިޔާބު ކޮށްފައި ވަނީ ތައިލެންޑްގެ އަނާ ސުއެންގަމް-އިއަމް އެވެ. އޭނާއަކީ، މަގުމަތީގައި ކުނި ކަހާ މަންމައަކާއި ކުނި އެއްކުރާ ބައްޕައެއްގެ ދަރިއެކެވެ.
އޭނާ ވަނީ ޚާއްސަ ގޮތަކަށް އޭނާގެ މައިންބަފައިންގެ މަސައްކަތުގެ ހަނދާން އައުކޮށް އެމީހުންނަށް ޝުކުރުވެރިވެފައެވެ.
އަނާ ލައިގެން ހުރި ހެދުމަކީ، ލުއި ބުއިން ބަންދުކޮށްފައިވާ ދަޅުތަކުގެ ޕުލް ޓެބް ބޭނުންކޮށްގެން ހަދާފައިވާ ހެދުމެކެވެ. އެހެދުމަށް މީހުންގެ ހިތް ދަމައިގެންފައި ވެއެވެ.
މިހެދުން ޑިޒައިން ކުރި މަރިނާތުން ވަނީ ދަޅުގެ މަތިތަކާއެކު ސެވޮރޮސްކީ ޑައިމަންޑްވެސް ހެދުމުގައި ބޭނުން ކޮށްފައެވެ. މި ހެދުމަށް ދީފައިވާ ނަމަކީ، "ހިޑެން ޕްރެޝަސް ޑައިމަންޑް ޑްރެސް" ގެ ނަމުންނެވެ.
ހެދުމުގެ ޑިޒައިނަރު ބުނިގޮތުގައި އޭނާ ސާބިތުކޮށްދޭން ބޭނުންވީ އެހެން މީހުން ބޭނުން ނެތިގެއް އެއްލާލާ ތަކެއްޗަކީވެސް އޭގައި އަގެއް ހުންނަ ތަކެތިކަން ދެއްކުމެވެ.
ތައިލެންޑުން ވަނީ އަނާގެ ކާމިޔާބީ ފާހަގަ ކޮށްފައެވެ. ތައިލެންޑްގެ މިސްޔުނިވާސް ރަސްމީ ހެންޑްލް އިން ވަނީ އޭނާގެ މައިންބަފައިންގެ މަސައްކަތް ފާހަގަ ކޮށް އެމީހުންގެ އަގުވެސް ވަޒަން ކޮށްފައެވެ. އަދި އޭނާ ބޮޑު ކުރުމުގައި އޭނާގެ މާމަގެ ދައުރުވެސް ފާހަގަ ކޮށްފައި ވެއެވެ.
ބައެއް މީހުން އަނާ ސިފަ ކޮށްފައި ވަނީ "ދަ ގާބެޖް ބިއުޓީ ކުއީން" ގެ ނަމުންނެވެ. ނަމަވެސް އެހެން ބަޔަކު ބުނެފައި ވަނީ "އެއީ ވިދާ ބަބުޅާ ޖަވާހިރެއް" ކަމަށެވެ.
