ޕާކިސްތާން ސިންދު ޕްރޮވިންސްގެ ހައިކޯޓުން އަމިއްލައަށް އިސްނަގައިގެން ސަރުކާރާ ދެކޮޅަށް ސޫމޯޓޯ މައްސަލައެއް ބަލަން ފަށައިފިއެވެ. ވެރިކަން ކުރާ ކޮއެލިޝަންގެ ބައިވެރިޔާ އަދި ސިންދުގެ ބާރުގަދަ ޕީޕަލްސް ޕާޓީގެ މެމްބަރުން ވީއައިޕީން ކަމަށް ބަލައިގެން ފުލުހުން އެމީހުންނަށް ވީއައިޕީ އެސްކޯޓާއި ސެކިއުރިޓީ ދެމުން ގެންދާކަން އެނގިގެން ހައިކޯޓުން މައްސަލަ ބަލަން ފަށްއިފިއެވެ. އެ ފަރާތްތައް ވީއައިޕީންގެ ގޮތުގައި ގިންތިކޮށްފައި ވަނީ ކޮން ހައިސިއްޔަތަކަށް ރިއާޔަތް ކޮށްގެންތޯ ސާފުކޮށްދިނުމަށް ސިންދު ހައިކޯޓުން ޕްރޮވިންސްގެ ހޯމް ސެކްރެޓަރީއަށް ވަނީ އަންގާފައެވެ.
މި މައްސަލަ ބަލަމުން ގެންދަނީ ފަނޑިޔާރު ނައީމަތުالله ފުލްޕޮޓޯ އިސްކޮށް ހުންނަވައިގެން ދެ ފަނޑިޔާރުންގެ ބެންޗަކުންނެވެ.
ބެންޗުން ފާހަގަކުރި ގޮތުގައި މީގެ ކުރިންވެސް ސިޔާސީ މީހުން ވިއައިޕީންނަށް ހަދައި އެމީހުންނަށް ކޮމާންޑޯއިން ފޯރުކޯށްދޭ ގާނޫނީ ހައިސިއްޔަތު ސާފުކޮށްދޭން ހޯމް ސެކްރެޓަރީއަށް އަންގާފައިވީ ނަމަވެސް އެކަން ކޮށްފައި ނުވާކަންވެސް ފަނޑިޔާރުން ފާހަގަ ކުރައްވައެވެ.
ޖެނުއަރީ 30 ވަނަ ދުވަހުގެ ނިޔަލަށް އަޑުއެހުން ފަސްކޮށް، ބެންޗުން ވަނީ ހޯމް ސެކްރެޓަރީއަށް ދިން އިރުޝާދު ތަކުރާރުކޮށްފަ އެވެ.
ސިންދު ޕްރޮވިންސްގައި ކުރީގެ އަށް ގަވަރުނަރުންނާއި ޗީފް މިނިސްޓަރުންގެ ސެކިއުރިޓީއަށް 42 ފުލުހުންނާއި ސިންދު އެސެމްބްލީގެ ސްޕީކަރާއި ޑެޕިއުޓީ ސްޕީކަރަށް 10 ފުލުހުންނާއި ޕްރޮވިންސް މިނިސްޓަރުންގެ ސެކިއުރިޓީއަށް 125 ފުލުހުންނާއި އަދި ކޮންމެ ވިއައިޕީއަކަށް 3 ފުލުހުން ހިމެނޭ ގޮތަށް 161 ވީއައިޕީގެ ސެކިއުރިޓީގައި 555 ފުލުހަކާއި 43 ވޭނެއް ބައިވެރި ކުރާ ކަމަށެވެ.
އަދި އިތުރަށް ސިޔާސީ ބޭފުޅުންގެ ސެކިއުރިޓީއަށް 55 ފުލުހަކާއި، ޗީފް މިނިސްޓާގެ އެޑްވައިޒަރުންނަށް 44 ފުލުހުންނާއި ޗީފް މިނިސްޓާގެ ސްޕެޝަލް އެސިސްޓެންޓުންނަށް 20 ފުލުހުންނާއި ފެޑެރަލް މިނިސްޓަރުންނަށް 34 ފުލުހުންނާއި، ސަރުކާރުގެ އެހެން އޮފިސަރުންނަށް 12 ފުލުހުންނާއި އަދި ކުރީގެ މަސްއޫލުވެރިންނަށް 34 ފުލުހުން ހަމަޖައްސާފައިވާ ކަމަށެވެ.
