ތަރައްގީވަމުން އަންނަ ދުނިޔޭގެ ގައުމުތަކަށް އެހީތެރިވެދޭނެ ހައްލުތައް ހޯދައި ތަރައްގީކުރުމާ ބެހޭ ދިރާސާތައް ކުރުމަށް "ގްލޯބަލް ސައުތު ސެންޓަރ އޮފް އެކްސެލެންސް" ގެ ނަމުގައި އިންޑިއާއިން ދިރާސާ މަރުކަޒެއް އުފެއްދުމަށް އިންޑިއާއިން ނިންމައިފިއެވެ.
މިކަން ރަސްމީކޮށް އިއުލާން ކޮށްފައި ވަނީ އިންޑިއާ ބޮޑުވަޒީރު ނަރެންދުރަ މޯދީ ހުކުރު ދުވަހު ދުނިޔޭގެ ދެކުނު ބިތުގެ ގައުމުތަކުގެ މަހާސިންތާގައި ވާހަކަ ދައްކަވަމުންނެވެ.
"މޮދީ ވިދާޅުވި ގޮތުގައި "ގްލޯބަލް ސައުތު ސެންޓަރ އޮފް އެކްސެލެންސް" އަކީ ދުނިޔޭގެ ދެކުނު ބިތުގެ ގައުމުތަކުގެ ތަރައްގީގެ މަސައްކަތަށ ބޭނުންވާ ދިރާސާއާއި މައްސަލަތަކުގެ ހައްލުތަކާއި އެކަންކަމުގެ ބެސްޓް ޕްރެކްޓިސް ރިސާޗްތައް ހިންގައި ކުރިއަށް ގެންދާނެ މަރުކަޒެވެ. އަދި އެމަރުކަޒުން ދުނިޔޭގެ ދެކުނު ބިތުގެ ގައުމުތަކަށް ފައިދާ ކުރާނެ ކަމުގައިވެސް ވިދާޅުވިއެވެ.
އެ މަރުކަޒުން ކުރިއަށް ގެންދާނެ ދިރާސާއާއި ހޯދައި ދޭނެ ހައްލު ތަކާ ބެހޭ ގޮތުން މިސާލު ދައްކަވަމުން އޭނާ ވިދާޅުވީ، އިލެކްޓްރޯނިކް-ޕޭމަންޓްސްއަށް ބަދަލުކުރުމުގެ މައްސަލައާއި ސިއޙީދާއިރާގެ ކަންކަމާއި، އެޑިއުކޭޝަން ސެކްޓާއާއި، އީ-ގަވަރނަންސް ފަދަ ދާއިރާތަކުން އިންޑިއާއިން ތަރައްގީކުރާ ޑިޖިޓަލް ޕަބްލިކް ފިކުރީ މުދަލަކީ، ތަރައްގީވަމުން އަންނަ އެހެން ގައުމުތަކަށްވެސް ބޭނުންތެރި މުދަލަކަށް ވާނެ ތަކެތި ކަމަށެވެ.
އެގޮތުން، ޖައްވީ ދާއިރާއާ ބެހޭ ޓެކްނޮލޮޖީ އާއި ނިއުކްލިއާ ހަކަތަ ފަދަ ދާއިރާތަކުން ވެސް އިންޑިއާ އިން ހޯދާފައިވާ ބޮޑެތި ކުރިއެރުންތައް ތަރައްގީވަމުން އަންނަ ގައުމުތަކާ ޙިއްސާ ކުރެވޭނެ ކަމުގައި ވިދާޅުވިއެވެ.
އެގޮތުން "ގްލޯބަލް ސައުތު ސެންޓަރ އޮފް އެކްސެލެންސް" އިން "ގްލޯބަލް ސައުތު ސައިންސް އެންޑް ޓެކްނޮލޮޖީ އިނިޝިއޭޓިވް" ފަށާނެ ކަމުގައިވެސް ވިދާޅުވިއެވެ.
