އިސްލާމް ދީނުން ވަނީ އަހަރެންގެ ހުރިހައި ސުއާލުތަކަށް ޖަވާބު ދީފައެވެ! މިއީ ދެކުނު ކޮރެއާގެ މަޝްހޫރު ޕޮޕް ލަވަކިޔުންތެރިޔާ، ޔޫޓިއުބަރު، ދާއުދު ކިމް، އުމުރާއަށް ސައޫދީ އަރަބިއްޔާއަށް ގޮސް މައްކާގައި ހުރެގެން އިއްޔެ އިންސްޓަގްރާމްގައި ހިއްސާކުރި ވާހަކައެވެ.
ގެފުޅު ކުރިމަތީގައި ހުއްޓި ހުރެގެން ނަގާފައިވާ ފޮޓޯގައި ދާއުދް ކިމް ހުރީ އިޙުރާމް ހެދުމުގައެވެ.
"އަހަރެންނަކީ ﷲ ޚިޔާރު ކުރި އެންމެ ނަސީބު ވެރި މީހާ" ކަމަށް އޭނާ ބުންޏެވެ.
2019 ވަނަ އަހަރުގެ ސެޕްޓެމްބަރު މަހު ކިމް ވަނީ އޭނާ އިސްލާމްވިކަން އިއުލާންކޮށް ޔޫޓިއުބް ވީޑިއޯއެއް ގައި ކިޔައި ދީފައެވެ.
އިސްލާމްވި ފަހުން އޭނާ ވަނީ އިސްލާމް ދީނާ ބެހޭ ވީލޮގްތަކެއްވެސް އުފައްދާފައެވެ.
2022 ވަނަ އަހަރު ރޯދަ މަހު އުމުރާ ކޮށްފައެވެ. ކިމް އިސްލާމް ދީން ގަބޫލުކުރީ 2019 ވަނަ އަހަރު އެވެ.
މިއުޒިކް ދުނިޔޭގެ ޕްރޮފެޝަނަލެއްގެ ގޮތުން އޭނާ މަޝްހޫރުވެފައި ވަނީ ޖޭގެ ނަމުންނެވެ. 1983ގައި އުފަންވި މި ޒުވާނާގެ އަސްލު ނަމަކީ، ކިމް ކިޔުން-ވޫ އެވެ. އޭނާ އަކީ ދެކުނު ކޮރެއާގެ ލަވަކިޔުންތެރިއެކެވެ. އަދި އެކްޓަރެކެވެ. އޭނާ އަކީ އީޑީއެމް ޓްރިއޯ ޓްރެކްސްއެކްސްގެ މެމްބަރެއްގެ އިތުރުން އެންޓަޓެއިންމަންޓްގެ ޕްރޮޖެކްޓް ގްރޫޕް ދަ ބެލަޑްގެ ކުރީގެ މެމްބަރެކެވެ.
ޖޭ ކިމް ވަނީ އިސްލާމްވެގެން އޭނާގެ ނަން ދާއުދު ކިމް އަށް ބަދަލުކޮށްފަ އެވެ. މިހާރު އޭނާއަކީ ޔޫޓިއުބަރެއް އަދި ވީލޮގަރެކެވެ. އޭނާގެ ކުރީގެ ގިނަ ވީޑިއޯތަކުން އޭނާ އިސްލާމްދީންގެ މައުލޫމާތު ހޯދާ މަންޒަރު ދައްކާފައި ވެއެވެ. އަދި ކޮރެއާގައި އީދު ފާހަގަ ކުރާ ގޮތްވެސް ދައްކާފައި ވެއެވެ.
އޭނާ އިސްލާމް ދީން ގަބޫލު ކުރީ ސޯލްގެ އިސްލާމިކް ސެންޓަރުގައެވެ.
