އެމެރިކާގެ އުސޫލީ ޔަހޫދީންގެ އަތުން 47 މިލިއަން ޑޮލަރު ޕަކަޅާލި ޔަހޫދީ މީހާ އިޒްރޭލުގައި ދިރިއުޅެމުން ދަނިކޮށް އަތުލައިގެންފިއެވެ. ޔޯސީ އެންޖެލް ވަނީ 2018ން 2021އާ ދެމެދު ޔަހޫދީންގެ އަތުން އިންވެސްޓް ކުރުމަށް ފައިސާ ހޯދާފައެވެ. ލޮސްއެންޖެލްސްއާއި ނިއުޖަރޒީގައި ޔަހޫދީންނާ ދެކޮޅަށް ނަފްރަތުގެ ހަމަލާތަކެއް އާންމު ވުމުން އޭނާ ދިމާކުރީ ސެކިއުރިޓީ ކެމެރާ ވިއްކައި އިންޓޯލް ކޮށްދޭށެވެ.
ދެން މީހުންނަށް އޭނާ ތައާރަފްވީ ތައުރާތް ކިޔަވައިދޭ ދަންނަ ބޭކަލެއްގެ ގޮތުގައެވެ. މީހުންގެ އަތުން ލިބުނު ފައިސާއިން އޭނާގެ ފިހރައާ ކައިރީގައި ޔަހޫދީ ފައްޅިއެއްވެސް ހެއްޖެވެ.
ދެން އޭނާ މަސައްކަތް ފެށީ ބިން ގަތުމާއި ތަންތަން ކުއްޔަށް ދިނުމުގެ ވިޔަފާރިއަށް އިންވެސްޓް ކުރަން މީހުންގެ އަތުން ފައިސާ ހޯދާށެވެ. އިތުބާރާއެކު ފައިސާ ލިބެމުން ދިޔަހެން އޭނާ ވަނީ ކެސިނޯގައި ޖުވާ ކުޅުމަށް ހޭދަކުރުން އިތުރކޮށްފައެވެ. އަދި ހަފްތާއަކު ދެ ފަހަރު ޕްރައިވެޓް ޖެޓްގައި އިޒްރޭލަށް ދަތުކޮށްވެސް ހެއްޖެވެ. އެންމެ ފަހުން އިޒްރޭލުގައި ފިލައިގެން އުޅެނިކޮށް މިހާރު އޭނާ ވަނީ ހައްޔަރުކޮށްފައެވެ. އޭނާގެ މައްޗަށް ކުށް ސާބިތުވެއްޖެނަމަ 10 އަހަރުގެ ހުކުމެއް ލިބޭނެއެވެ.
