އިންޑިއާ އިން 5ޖީ ނެޓްވޯކް އިންފްރާސްޓްރަކްޗާ ތައާރަފްކުރުމުގައި އެމެރިކާ އާއި ޔޫރަޕް ފަހަތައް ޖައްސާލަމުންދާ ކަމަށް ދުނިޔޭގެ އެންމެ ބޮޑު އެއް ޓެލެކޮމް އިކުއިޕްމަންޓް އުފައްދާ ކުންފުނި އެރިކްސަން އޭބީގެ ޗީފް އެގްޒެކެޓިވް ވިދާޅުވެއްޖެއެވެ. ބޮރްޖޭ އެޚޮލްމް ވިދާޅުވީ ދުނިޔޭގައި 5ޖީ އަދިވެސް އޮތީ އޭގެ ޅަފަތުގައި ކަމަށެވެ.
ޗައިނާއިން ދުނިޔޭގައި 5ޖީގެ ރޮނގުން ކުރި ހޯދަމުންދާއިރު، އެމެރިކާއިން ދަނީ ޔޫރަޕަށް ވުރެ ބާރަށް 5ޖީގައި ތަރައްގީވެ ކުރި ހޯދަމުންނެވެ.
ޔޫރަޕްގައި ގަވާއިދުތައް ހަރުކަށި ކުރުމުގެ ސަބަބުން އިންވެސްޓަރުންނަށް އެމީހުންގެ ފައިސާ އަނބުރައި ނުލިބިދާނެތީ އިންވެސްޓަރުން ފަސް ޖެހޭ ކަމަށްވެސް ވިދާޅުވިއެވެ.
އޭނާ އިތުރަށް ތަފްސީލުކޮށްދެއްވި ގޮތުގައި ޗައިނާއިން ބޭރުގައި އެންމެ ބާރަށް 5ޖީ ތަރައްގީ ވަމުން ދަނީ އިންޑިޔާގައެވެ. އަދި ޗައިނާއާ އަޅާ ކިޔާއިރު އެއީ ވަރުގަދަ އިންފްރާސްޓްރަކްޗާއެއް ކަމަށް އޭނާ ވިދާޅުވި އެވެ.
އިންޑިއާގައި 5ޖީއަށް މާކެޓް ޑިމާންޑް ބޮޑުވެފައި އޮތުމުގެ ސަބަބުން އޮޕަރޭޓަރުން މަސައްކަތް ކުރަމުންދަނީ ޑިމާންޑަށް މަސައްކަތް ކޮށް ދިނުމަށް ކަމަށް އޭނާ ވިދާޅުވިއެވެ. އެޚޮލްމް ވިދާޅުވީ އިންޑިއާއިން އަމިއްލައަށް އުފައްދާފައިވާ 5ޖީ އިންފްރާސްޓްރަކްޗާގެ ސަބަބުން ޓެކްނޮލޮޖީ ކުންފުނިތަކަށް އަމިއްލައަށް ސޮލޫޝަން އުފެއްދުމުގެ އިންފްރާސްޓްރަކްޗާ ލިބިފައިވާ ކަމަށެވެ. އަދި އިންޑިއާގެ ޑިޖިޓަލް އިންފްރާސްޓްރަކްޗަރ އަކީ ދުނިޔޭގެ ފެންވަރުގެ ޑިޖިޓަލް އިންފްރާސްޓަކްޗާއެއް ކަމަށް ވިދާޅުވެ އޭނާ އެކަމަށް ތައުރީފް ކުރެއްވިއެވެ.
